Transkripte durchsuchen » National Archives / Archiv South Holland

Archivzugang 1.04.02, Inventarnummer 1053, Blatt 469

72
beswaert was daer door vry watt vertsaecht waeren temeer om datt
ditt Jaer daer egeene scheepen altoos van't vaderlant waeren aengecomen
datt deluyden discouragie veroorsaeckt, dan op ons vertreck bleeff
daer alles in goeden doene, een lieutenant ppoffel voet werde
als Capitein in behoyrlycker voegen ouer beyde de forten geauthoriseert
den vaendrich Josias demoor als lieutenant ende een sargeant als vaendrich
dandere opene officien die by versterven vacerende waeren wierden
oock mede becleet met de bequaem st soldaeten vande Compansie ende om
noch te meer onsen yuer tot dienst der generaliteyt te becoonen hebben van
ons scheepsprovisie aent fort overgegeven een legger spaense wijn, een aem,
olye ende een speckvatt asyn alles opgevult met noch drie tonnen vleys
drie tonnen speck ende dertich haesen onder behoyrlycke recepisse.
om tselve weder op amboyna te ontfangen van seecker provisie die het
schip Banda daer voor de forten van Banda gelaaten hadde, diet
voorwaer in banda sonder eenige versuymenisse soude hebben connen
brengen daer mede beteren dienst soude gedaen hebben dan met soo lange
In Amboyna te leggen, tselve schip Banda hebben wy gemoet tusschen
manipe ende buro den 23en Aprill laestleeden syn beste doende om
naer moluco te seylen ende wy om naer banda onse reyse te vervoorderen
By ditto schip Banda hebbe aenden heer Gouverneur Generael een briefken
in eygen handen geschreuen, ende om myne E heeren van alles naer
behoyren volcomen kennisse tegenen, seynde daer aff hier beneffens
de Copie, Verhoope by myne E heeren doorsaecke ten besten sall geduyden
werden ende datt my het grootste ongelyck niet genen sullen Int geene
daer jck over clachtich ben, maer datt alles behoyrlycken Jnsiende
bevinden sullen haeren dienaer ten deele Reden te hebben, hier bij en
is jnt minste noyt yets van U E dienst verachtert maer eerder
gevoordert, dewyl quellinge van Geest ende gemoet den menschen
Wackerhout, ende scherpsiniich maeckt, ende alhoe wel eergiericheit
een snood gebreck is, meene nochtans alle eercrachtende menschen
daer mede besmet syn ende dattet oock een dwingende spoor is om naer
deucht tetrachten, het doet my wee Int gront mynder herten aen UE
myn heeren mentie van dees dingen doen moet, doch voerde in myn
gemoet daer toe gedwongen, alsoo tselve my gestaadich beloof
t
datt myne E heeren verstaen sullen met sulcke proceduyren my
ongelyck geschiet is, Dees materie als daer van tracteere maeckt
my verdrietich ende moyelycken, Ende duchte over tselffde knaagen
sall soo lange en Indien wesen sall met menschelycke passie, doch sall
my In U E dienst niet doen verslappen, Daeromme bidde seer
dienstelycken ende ootmoedelycken aen myne E heeren dat het selve by
U E voor geen vermetele houaerdye ende opgeblaesentheyt werde
gehouden, want voorwaer my byt schip Banda, In Banda, tot Amboyno
ende hier tot Bantam soo nederich gedraegen hebbe als yemant ter
werelt soude doen, maer dattet geduydet werde als Jmmers faulte
moet weesen voor een gemeen menschelyck gebreck
Ick hadde wel verhoopt schryuen van myne E' heeren by ditto schip te becomen
doch hebbe niet vernomen alsoo alle haere schriften met stenan
doensen Jnden witten leuw naer ternate gesonden hadden, Enenwel wt
monpelinge vant volck verstonden v E eenige victualle voorden leuw
byt selve waeren seyndende, ende aenden Commandeur Reael daer naer vragende
gaff my een cleyne memorie van seeckere prouisie, die In Banda
voor den leuw was gescheept, ende alsoo den tyt om met den leuw Inde
eycanden van Banda tecomen hoochnoodich vandoene hadden, hebben
niet eens ernstich geeracht om die wt Banda telichten te meer
gesien deesen leuw doch weder In ternate is gedestineert wt Japan
met viures te comen, wanneer tselve vanden heer Gouverneur generael
saal mogen versoucken doch duchte daer niet besonders aff becomen saer