Blader door transcripties » Lokale Kronieken uit de Nederlanden 1500-1850

archieftoegang 1507_Beek_Trec, pagina 64

Die onsalighe Hertoch Karle van Gelre, due hee horde inde vernaem van den doet syns neyffve, Hertoch Phylippus vurs. inde dat Lant van Brabant inden kynden hande waes koemen inde onbehert, inde die Rompssche Conynck Maxmilianus vurs. sych ouch al so voele te doen gaeff boven in synen landen, dat hee hyr qualicke gestaelt waes te koemen in Brabant by die cleyne inde jonghe onmundighe kynderkyn, Hertoch Phylippus syns sons kynderkyn, inde Brabant egheyne houfft off regerres en hadde, inde alles bysterlick te werck gynghe, inde die regerders inde amptluyden der landen alle der lantscappen duer sott inde verbleyndt woeren in steden inde op sloetten; so vergaetten nu die Gelressen der soene off contract, dat in vuerleden daghen ghemackt waes tusschen hertoch Phylippus vurs. inde hoen, inde hoeffven due hoen houfft wederoem op in die locht, inde noemen due die vêe off orloegh wederoem aen, inde kreghen die Franssoissen uyt Vranckryck hyraff myt groetten hermacht, inde deden ser grotten schaeden overal den Brabanders in allen den platten off bloetten landen, also vurscreven steyt.
Inde dit is nu wederoem in diessen joere vurs. omtreynt uytgoens Meyss aengehaeffven inde begonnen inden lande van Valkenborch. Die koëen inde beysten (werden) gehalt op derGraetheyden inde alle te saemen tot Ruremunde ingedreyffven, doer sy ser wyllecomen waeren. Got bettert! Inde ser balde off haest hyrnoe (syn sy) wederoem gekoemen tot Beyck, Opgelene, Elslo . Inde aldoer omtreynt waert gebrant inde aengesteken, inde also die arme ververde huysluyden doermyt ververt; also dat sy myt hoen due brandschadden inde hoen moesten gelouffven, oem VJ wecken tytz vrede te hoeben.
Item terstont synt sy wederoem int lant gekoemen oem Herle, Her-Hoensbrucke, Schennen, Austenroede, inde sunderlynghe te Schynwelt in dat dorppe ser groette schaeden inde woesten gedoen in die kyrcke, inde aldoer doet geslaghen inde vermoert omtrent XXXIJ maen, die sych op die kercken onthalden hadden; inde voert overal myt vanghen, rouffven, doetsloen inde swerlicke brantschadden, aldoer geleyft nyet als Crysten, mer als Joden inde Heyden over die arme huysluyden. Got herbarmps!
Inde terstont alhyr noe synt (sy) balde wederoem tot Merssen koemen, inde oem Merssen gebrant, geschant, gevanghen, geroufft inde ser grotten last den armen huysmaen gedoen; inde grotten rouff van besten myt hoen tot Ruremunde in gevoert. Inde alsus so stondet al jemerlicke inde qualicke mytten schamelen huysmaen inden landen van Valkenborch. Inde die Brabanders deden egheyn weren hyr teghen. Dat land waes in kynder handen: vae terrae cujus rex puer est.
Och lassy! der ser swoerre inde groetter orloeghe tusschen Brabant inde Gelderlant hadde al ser langhe geduyrt inde gestanden, also eynsdeyls in diessen boecke off Regyster vurs. steyt, inde en naem noch al egheyn eynde. Noch nyemant en waes also hoeghe off groet van Heren off van Voersten, die hyr tusschen ten beyste gesproecken hadde offoem den peyss off vrede gekalt hedde. Got ontfarmps! Also dat diesse onsaelighe orloeghen so lanck so swoerder inde merder woerden, inde die arme lantluyden, die buytten die steden soetten, inde ser gherne rust inde vrede gehaet hedden aen beyden syden, inde in vreden hedden moeghen hoen broet wennen, al te gronde jemerlicke verdoerffven worden op beyden syden, nu vanden vyanden, morghen vanden vrunden, die sy jemerlicke overtoeghen inde overloeghen inde al uyt terden inde vervorden, also dat die huysluyden nyet en behyelden doer sy aff hedden moeghen leven. Inde van groetter ellandigheyt inde armoede kwamt dat sy dat hoen moesten laetten stoen, inde uytten lande ewech dwasden, inde in anderen landen toeghen inde broet baden.
Eene latere hand schreef de volgende aanteekeningen:
Inden jaer ons Heren, du men screyff XVe inde XXXII, inden maent Julius, is joffer Margryet van den Dryess gestorven op Synte Mertens avent translacio in den somer. Requiescat in pace. Amen.
Ao duysent Ve ende XLIV, inden maent october, des goensdachs nae Beecker groete kyrmys, soe waest eynen allren groten wynt inder naucht, dat men nyet en horde noch en saech, dou is die Kyrck van Steyn geschant vanden dyeffen; der Kercken synt genomen twee kelcken ende twee olyvatter, ende dat Heylich Sacrament onder die voeten geworpen, ende voert alle kesten open gebroken, ende dat lyvaet aldaer uyt genomen etc. Ende die dieff hebben die kyrck daer open gebroken myt eynen couter eynder ploeghe.