Blader door transcripties » Lokale Kronieken uit de Nederlanden 1500-1850

archieftoegang 1507_Beek_Trec, pagina 63

Allet dat nu hyr vuer gescreffven steyt, heet al beleyfft inde gesyen, inde selver geordynert inde geconfirmet, als Generael, der erbare maen inde broder Johan van Abroek vurs., der aenheffver off begynner der zaligher Reformacie der conventen inde closteren vurs. Got geyffve hoem...... hee is doch aller eren inde loeffs wert.
Item in diessen selven joere vurs. XVe inde VIJ, inden vasten, omtrent Palmen, so quam (in Brabant) die ser edele inde hoeghe geboeren Margharita, Maxmilianus der rompsschen Conyncks dochtter, inde hertoch Philippus suster, dee nu int joer voerleden uyt Brabant in Spangghen gereyst off getoeghen waes myt synre huysfrouwen, inde aldoer den doet gestorffven. Diesse edele vrouwe Margaretha vurs., die erst in hoeren jonghen joeren in Spanghen gehuwt off bestaet waes geweyst aen den jonghen conynck van Spanghen, doer sy ser wael myt te vreden waes, kreegh doeraff eyn ser schoene jonghen soen, dee eyn geboeren Conynck van Spanghen inde van voele andere rycken off landen doerby geleghen solde geweyst hobben, doer grotte wonderlicke blytscappe off vrouden aff waer alle die lantscappen doer inde doer.
Och lassy! nyet langhe so heyt diesse blytscappe geduert in Spanghen; want by den wylle Gotz, so is diesser jonger connynckinne maen inde Here die doet gestorffven, inde ouch myt hoem syn eynich geboeren jonghe soen, doer due ser voele lydens inde rouwe aff waes alle Spanghe landen deur;alst ouch wael byllick waes, want doer in bleyff due egheyn mans gebuertte mer te leven vander croenen van Spanghen.
Alsus so waes diesse ser edele vrouwe Margarita vurs. ser bedruckt inde al vol rouwen, inde waes due aldoer vrempde inde ser ellendich. Inde balde doer noe, myt vrunden raet, so waert sy due bestaet in Zchavoën, aen eynen Hertoch van Zavoën, ser ryck inde edel; inde doer waert due diesse ser edel vrouwe hen gevuert by eynen maen des sy nye gesyen en hadde, in eyn lant doer sy die spracke off taele nyet en verstonde. Mer och lassy, nyet langhen tyt so is ouch hoer Here inde maen aldoer gestorffven, also dat sy cleyn blytscappe inde genuchtde op ertryck gehaet en heet. Inde sy is due hyr nae ten leysten wederoem in Brabant bracht inde gekoemen op datum inde joere boven gescreyffven.
Item noch allet in diessen tyde off joere vurs. so syn noch allet gebleyffven die voetknechtten off Garde, dat fell inde boesse volcke, doer ouch hyr voer ser voel aff gescreyffven steyt. (Inde syn) allet gebleyffven in diessen landen vurs. Brabant, Loen inde alle andere cleynre smalre Heren landen, op diesse syde vander Maessen inde op die andere syde, Valkenborch, Roede, Lymborch, Daelheym, Gronselt, Steyn, Elsloe, Here Hoensbroeck inde al voel andere cleyne smalre Heren inde lentgens inde dorpkens. Inde syn alsus alom getoeghen vanden eynen dorppen totten anderen, nu hy nu doer, alomme gelick in vuerleden tyden inde joeren die heyden off tatteren ploeghen te trecken. Die er huyde nyet en hadden, die woerender morghen off overmorghen te verbeyden; inde alsus so waert der arme huysmaen off lantmaen overal in allen landen off dorppen, die buytten steden off muyren loeghen jemerlicke vervoert, vernyelt inde verdorffven, inde hoen guet inde suyren arbeyt jemerlicke quyt.
Inde nyemant en waes van den Heren amptluyden, regerres der landen off dorppen vurs. den dit ter hertten gyngheoff jamerde. Mer alle gader dit duer die vyngher saeghen inde lyetten dat onsalighe volck gewerden, inde trecken, inde liggen overal doert hoen belieffde sonder eynich wederstant. Got bettert!
Dysse jamer, last, schade, druck inde lyden waes boeffven moete groet inde ser swoer te lyden. Nochtant so en schadden die Heren inde amptsluyden nyet te myn, inde (men) moestte den grotten schaet geven; inde men hedde hoen aen den pechtte nyet eynen coppe rogge gekort off aff geslaeghen van nyemans grot noch cleyne. Got ontfarmps!
Item in diessen selven joer vurs. als men screyff XVe inde VIJ, inden vastten, te wetten opten Sondach vuer Palmen, so waert erstwerff gewyt off geconsacrert ten Observantten tot Luydick, die kyrcke honss closters, dat sy aldoer ouch erstwerff aengehaeffen, inde nuwes begonnen hadden myt hulppe der gueder luyden. Inde dat closter vurs. is nu geheytten tot Jherusalem. Inde diesse consecracie off wydynghe diesser kyrcken vurs. dede selver in syne persoene, mytter hant, die edele Here inde buscop van Luydicke, Erardus van der Mercke vurs. Inde dit waes syn erste kercke, die hee selver in syne persoene in wydde. Inde dit dede hee in syn ander joer, dat hee buscoppe waes geweyst.
Diesse Here off buscoppe vurs. waes ser oetmodigh inde guetwyllich inde bereyt alle tyt die gottelicke dynsten inde die officie synre prelature selver te doen in synre eyghen persoene, die heylighe Sacramenten inde opten wytten donresdach Crysma inde Olysel selver mytter hant te macken, die palmen te wyen opten Palmdach, opten poeschdach die heylighe Mysse selver te synghen off te doen in syn kercke tot Luydick op Synte Lambrechts-altoer, syne wydebuscop neven syn syde stoende in pontificalibus, dat is in syn buscops habyt. Also dat daen alle tyt, alst hoeghe feystlicke daeghen waeren, also twe buscoppen gesyert off gecleyt in buscopshabyt, te saemen by eyn stonden in den gottelicken dyenst ons lyeffs Heren Jhesu Christi; doer sych alle syn lyeven Heren inde Canonycken synre kyrcke ser aff verblydden inde ouch alle andere guede erbarighe luyden, geystelicke inde werltlicke.
Och laessy! inden joere vurs. XVe inde VIJ, so stondet noch even qualicke in diessen landen vurs. van Brabant inde Gelrelant. Die boessheyt wyess so lanck so mer tusschen diesse twe landen, inde die orloeghen worden ser groet inde swaer aen beyden syden over den armen lantmaen inde huysmaen, die buytten den stercken steden loeghen.