Blader door transcripties » Lokale Kronieken uit de Nederlanden 1500-1850

archieftoegang 1507_Beek_Trec, pagina 56

Ten leysten, nyet ser langhe hyrnoe, so waes der guede pryor van Synte Odylienberghe, der erste aenhever van diesser orden ser bedruckt inde ser bedruefft in synre hertten, dat diesse brueder vurs. sych alsus qualicke tyerden inde uyt inde ewech gelouppen waeren, inde dit closterken vurs. alsus ledich inde ydel stonde, alleyn mytten twe bruederen. Inde hee hadde dat ser noede dattet also ledich stoen solde indeonbewont van persoenen off luyden van honre orden, inde naem raet myt sommyghen gueden vrunden inde erbarighe mannen, die hee ser lieff hadde, inde die ouch hoem inde syne heylighe orden ser lyeff hadden, inde die ere der orden inde salighen voertganck ser gerne gesyen inde gehaet hedden. Inde (sy) bedachtten sych te saemen inde meynden, dat men eyn jouffvrouwen closter doervan macken solde. Die vrouwen solden sych baet behelppen inde wech koemen daen die mannen. Also waert diesse raet gesloetten, dat dit alsus guet syn solde oem die plaetssche wederoem ter eren te breynghen.
Also gynghe die guede pryor vurs. van stonden aan bynnen Ruremunde. Doer lach eyn erbaer susteren closter bynnen, vander feyl-susteren van Synte Augustinus regel, geheytten in den Bongart, die die syecken off krancken visiteren off bystoen, die des noet hobben inde honre begeren. Daer hadde diesse guede, erbarighe prior vurs. eyne suster inde ser erbarighe maget in woenen, die aldoer eyn suster in waes, myt naemen suster Meynt van Abroeck . Inde myt die spraeck hee al heymelick inde gaeff hoer diessen raet inde synen opsaet inde begertte te kennen, inde so waet syne meynynghe inde vuernemen were, inde dat dit alsus syn wylle inde voernemen were. Inde vrachtde hoer so waet sy rede inde hyrtue sacht, inde off hee sych ouch op hoer wael solde durven verloetten, dit groet werck te bestoen, inde off sy hoem ouch wael solde wyllen volgen inde op diesse plaetssche te trecken, inde den heylighen orden vanden Heylighen Grave ons Heren aen nyeme, inde hoem helppe synen opsaet volbrenghen ter eren Gotz etc.
Die erbarige maget sprack ser wysselicke inde guttelicke tot hoeren ser lyeven broder alsus: Dat sy al bereyt syn wolde te doen ter eren Gotz inde der heyliger orden, dathee van hoer begerde, inde sy myt lyffve inde zeele gedoen konde. Doeraff der pryor ser verblyt waert, inde Got inde synre liever suster doervan danckende waes dat sy hoer so gutwyllen over gaeff, inde synen handen hoeren wylle stelde.
Inde terstont mytten selven (heft hy) dit der erbariger moder vanden selven convent geoppenbart inde te kennen gegeinde hoer oetmodelicke gebeden, oem orlof vuer syn suster vurs. inde ouch myt doorby oem noch twee ander susteren uyt hoeren huysse by syn suster, oem dit groette werck erlicke te bestoen inde wysselycke aen te setten, dattet gotelicke mocht begennen inde erlicke voert goen, ter eren Gotz; doer die lieve erbarige moder ser aff verslaghen waert inde bedroeft, also hoer huyss te ydelen inde der beyster susteren quyt te werden. Doch uyt gotlicker lyeffde oem eyn guet werck doen, doer ser voele guetz uyt koemen mochtte so heet sy dit guttelicke gekonsentert inde tue laetten goen, inde heyft hoen dry ersamyge susteren gegeven, te wetten myt naemen: die erste waes syn suster, Suster Meynt van Abrock, die ander hyet Suster Katheryn van Bruggen, die derde hyet Suster Katheryn van Wert.
Inde diesse dry erbarige mechtden hobben orloff genoemen van hoen lyeffve, erbarighe moder te Ruremunde in hoen closter, doer sy herttelicke noede aff scheden, inde syn alle dry den pryor vors. tot synen convent noe gevolget te Synte Odilienberghe vurs. Inde doer synt ouch noch dry ander werltlicke mechtden by gekoemen, oem diesse heylige orden te ontfanghen inde ouch myt te trecken tot Kynroede vurs., oem aldoer Got te dyenen. Dyt beghyn off dat erste aenheven vanden ersten mechtden off jouffvrouwen dat hy in diessen landen is gesyen off geschyet, dat is erstwerff begoennen inde aengeheffven op Synte Odylienberghe vuers. op eynen heyligen sondach, te wetten op Synte Dyonisius avent, dee due tertyt quam op eynen mondach , inden joer als menscreyff dusent CCCC inde LXXVIIJ. Due deden diesse dry erste mechtden inde geystelicke susteren vurs. hoen salige professie tot Synte Odylienberch int closter, inde ontfynghen die heylige orden van Jherusalem, inde worden due Canonickynnen der heyliger orden des Heylighen Graffs ons lyeffs Heren. Inde die ander dry wertlicke mechtden vurs. woerden ouch mytten selven gecleyt myt dat habyt der heyliger Orden vurs. op denselven sondach. Myt grotter eren inde blytschappe gynge dat tue.
Inde due des anderen dachs op mondach, te wetten op Synte Dyonisius dach (werden sy) erlicke inde herlicke op waeghen gesat inde myt ser grotter eren tot Kynroede waert gevoert in dat desolaet closter, doer die mannen off brueder uyt verdwast woeren inde ewech gelouppen, sonder die twe brueder Her Vranck inde broder Henriek, so als ouch nu hy vurschreven steyt. Inde alsus so syn die erste jouffvrouwen van diesser heyliger orden erstwerff aengehaven inde begonnen op diessen heylighen Berch vurs., inde erstwerff due tot Kynrode gekoemen, inde hoen begyn aldoer begonnen. Inde due waert der vurs. broder Vranck, aldoer den susteren off jouffrouwen vurs, dye nu aldoer koemen woeren, tot eynen Pater inde bychtvader tue gevocht inde gesaet, inde bleyff due noch myt synen lekebroder vurs. aldoer in hoen convent off cloesterken, inde leyffde due te samen myt grotter vreden, inde grotter eren te samen myt malckanderen. Inde suster Meynt vurs. waert mater gesaet off geordinert over die susteren vurs., inde sy regerde ser erlicken inde gotelicken dat guet inde die susteren vurs.
Dat dat jouffvrouwen kloster tot Nuwerstat quam off began. Also nu diesse guede erbarighe mechtden vurs. tot Kynrode bleyffven sytten in rustte inde in erbarheden van ser gueden leven, also dat hoen guede naem inde fame hoens gueden levens lieppe off gynghe overal, al omme inde omme, inde alle guede mynsschen sych verblyden die van hoen hordensegghen; also dat mallicke syne kynder off dochteren begerden by hoen te stellen off te breynghen oem Got te dyenen; also dat sy ser tuenamen inde voert gynghen aen geystelicke inde tytlicker haeffven off guederen.
Also woeren due tertyt guede inde erbarighe luyden wenende, geystelick inde werltliek, bynnen der Nuwerstat, by Myllen off Syttart, die wyllighe horden inde vernoemen van den gueden inde erbarighen leven dyesser erbarigher kynder off susteren vurs. tot Kynroede, inde kreghen grotte mynne inde lyeffde tot dysser orden inde lyeffven mechtden vurs. Also dat sy opsatten inde begerden ouch eyn closterken te hobben off te maken by hoen in honre staet, inde diesser mechtden eynsdeyls inde die heylighe orden by hoen also te krighen off te hobben, oem honre grotter gracie inde afloeten wylle, die sy hobben inde ouch is te krighen off te verdyenen ter plaetsschen off steden doer sy wonen off closteren hobben.
Inde also syn diesse vurs. guede luyden off burger van der Nuwerstat vurs. totten erbarighen prior tot Synte Odylien berghe gegangen inde hoem hoen meynynghe off guede mynne inde grotte begertte te kennen gegeven, die sy hadden tot synre heylighen orden; doer dee guede pryor ser aff verblydt waes inde Got van Hemelryck inde hoen ser aff danckende waes, inde hoen dat gegeven inde gekonsentert heet.
Inde terstondt hyrnoe mytten selven, (so is) erffve inde plaetze bynnen der Nuwerstaet gecocht off gegolden, inde tymmer inde huysynghe doerop gestalt, inde due tot Kynroede geganghen tot derre erbarige moder, suster Meynt van Abrock, die erste persoene vander dry susteren vurs., die den orden erstwerff ontfanghen hadden, inde hoer oetmodelicke gebeden oem IIIJ off V susteren, aldoe by hoen ter Nuwerstat te koemen, oem aldoer ter eren Gotz inde ouch mytter eren honre saliger orden vurs. aldoer by hoen eyn closter off convent te macken, inde Got den Here aldoer te dyenen.