Blader door transcripties » Lokale Kronieken uit de Nederlanden 1500-1850

archieftoegang 1507_Beek_Trec, pagina 57

Doeraff die salighe moder vurs., ouch ser verblyt wart, dat hoer heylige orden inde persoenen der orden vermeret mochtten werden, inde heyft dat guttelicke gekonsentert, inde V off VJ susteren uyt hoeren huysse off convent vurs. gegeven, doeraff die moder ouch waes eyn vanden dry susteren vurs. die erstwerff die heylighe orden aennoemen inde ontfynghen, also hy al vorschreven steyt.
Inde ser kortz hyr noe so is diesse moder suster Katheryn van Wert getoeghen totter Nuwerstat vurs. oem aldoer ter eren Gotz eyn closter aen te heyffven off te begynnen, also die guede luyden van der Nuwerstat dat begert hadden. Inde dit is alsus geschiet off tuegeganghen als men screyff: Dusent CCCC inde LXXXVJ.
Also hadde dit closterken ter Nuwerstaet syn erste aenheven off begyn. Inde der erste Pater den sy hadden waes eyn guet, erbarige broder uytten closter van Synte Odilienberghe vurs., myt naemen geheytten broder Peter. Inde hee inde die erbarige moder vurs., suster Katheryn van Wert regerden dat sympel closterken te Nuwerstaet te saemen ser erlicke inde gotlicke, die wylle tytz dat sy beyden leyffden, inde ontfynghen voele guede mechtden inde gueder luyden kynder by hoen, inde wonnen hoen broet vromelicke, inde leyffden gotlicken, inde hedden aldoer ser wael gelegen, ryck inde salych worden, hedden die landen payss inde vrede moeghen hobben, inde die plaetssche sunderlynghen doer sy nu wonden.
Alsus hobt ghyr nu gehoert so wye diesse jouffrouwen erstwerff te Nuwerstat vurs. koemen syn. Inde noch hyrnoe, so suldt ghyr veynden beschreyffven inde hoeren so wy sy ouch wederoem van danne koemen syn.
Dat closter tot Gersten . Hyrnoe nyet langhen tyt, so is geweyst eyn guet, ryck, erbaer hoeffman, eyn Joncker, mytnaemen geheytten Joncker Wynant van Gerstten, woenende boeven Duyren inden lande van Guylick, by Solp inde ouch by Veyenhoeven. Inde hee hadde recht vuer syn sloet, doe hee op woende, bennen synen graffven oem syn sloet off huyss, liggen eyn capelle off kyrckxken gewyt in Synte Anthonys ere, inde doeraen off neven eyn cluysse, doerin dat wonden eyn begyne myt IIIJ off V susteren, inde dynden Got in sympelheyt, inde leyffden der elmoessen van Joncker Wynans huyss inde van Veyenhoeffve, dat sloet, inde woeren guede, sympele kynder.
Alsus so horde off so vernaem diesse joncker Wynant vurs. van der werdicheyt diesser heyliger orden des Heyligen Graffs ons leyffs Heren tot Jherusalem inde van honnen grotten affloeten die sy hoebben, inde die syn, ter plaetsschen doer sy woenen off hoen closters hoebben; inde kreych den gueden, erbarigen pryor vurs. van Synte Odilyberghe by hoem ser vrundelicke, oem aldoer by hoem, in syne capelle veur syn sloet diesse heylighe orden te krighen, inde die moder inder cluyssen myt hoeren kinderen den heyligen orden vanden heyligen Grave ons Heren te geven, inde aen te nemen ter eren Gotz. Dat wyllich hoen beyden ser wael bevyle off guet docht te syn.
Inde dit gynge al tue, inde die guede, alde moeder inder cluyssen myt hoeren mechtden inde kinderen ontfynghen den heylighen orden vurs., inde deden alle te saemen hoen salighe professie, also dat behoerende is. Mer also en konde off so en wyst diesse alde myt hoeren kynderen vurs. die gewonheyt, ordinancie, manyere, getyden inde statuten nyet der H. Orden vurs., die sy nu ontfanghen hadden. Also trostsy due der guede pryor vurs., inde sacht hoer dat sy te vreden weren inde verduldich, hee solde hoer seynden erbarige mechtden vanden orden, inde die solden by hoen koemen, inde hoen alle deynghen lieren inde zeggen des hoen van noede syn solde.
Inde dyt is alsus geschiet. Inde der pryor vurs. is tot Kynrode koemen inde heyft aldoer due tertyt ghenoemen, den gueden alden pater Vranck vurs., inde die guede erbarighe moder, suster Meynt vurs., inde die due myt noch IIIJ off V susteren te saemen gesant totten Gerstten by diesse moder inde susteren vurs., doer sy ser wylle koemen waeren inde blydelicke ontfanghen worden, inde lerden aldoer den gueden kynderen hoen manyeren der heyligen orden vurs.
Inde due mytten selven, als die erbarige Pater inde Moder vurs. van Kynroede alsus uytgenoemen inde ewech waeren, so stelde off satte der pryor vurs. te Kynrode wederoem int closter eynen Pater off broder van synen closter myt naeme broder Lauerens, inde eyne ander suster uytten selven closter vurs. tot eyne Mater. Inde die regerden voertaen dat closter te Kynrode vurs. ser erlicken inde wysselicken, alst noch hy nae wael blycken inde luyden sal.
Inde dat dyt alsus gescheyt is off tuegeganghen dat den Pater inde Mater van Kynroede, alsus van Kynroede ter Gersten koemen (syn) inde aldoer begonnen te regeren, also nu verscreven steyt, dat is geschiet off tue geganghen inden joer als men screyff dusent CCCC inde XC.