Blader door transcripties » Lokale Kronieken uit de Nederlanden 1500-1850

archieftoegang 1507_Beek_Trec, pagina 55

Als dyt hoerde inde sach diesse wylde monick inde prister, tertyt pryoer van Henegouwe, myt naeme Her Cornelis , wart hee verblydt inde ontfynck diesse twe jonghe ghesellen, inde gaeff hoen den Heylighen Orden, inde ontfynck sy inder professie, den eynen vuer eynen clerck oem prister te werden, inde den anderen vuer eynen leken, inde lyet sy gutlicke wederoem goen den wech den sy koemen waeren tot honre schoene kyrcken inde plaetsschen vurs., oem aldoer aen te heffen inde te begynnen eyn cloester, inde voert noch brueders aen te nyemen off te ontfanghen, ter eren Gotz inde der heylighen orde, die sy nu aldoer van hoem ontfanghen hadden.
Item inde alsus syn sy nu te huyss gekoemen inde aldoer erstwerff begonnen inde aengehaven die reformacie vander heyliger orden vurs. inden joer ons Heren due men screyff dusent CCCC inde LXV.
Alsus hoebben diesse twe broders vurs. sych ser erlicken gehalden, inde wael inde erlicke te saemen getyert inde voert gegangen in duchtden inde in gueder discipline. Inde broder Johan der clerck is balde hyr noe prister geworden, inde (heeft) terstont by hoem ouch andere guede klercken inde leycke brueders aen ghenoemen, inde pristeren ghemackt, inde Gotz dyenst terstont aldoer erlicke gedoen, inde die VIJ getyden aldoer, nacht inde dach gesonghen inde geleyssen, also dat behorlicke waes noe honre orde.
Also gynck hoen guede fame overal; also dat sy mallick lyeff kreych die van hoen hoerde seggen. Inde mallick alom in den lande deylden inde gaeffven hoen die elmoessen ser myldelycke, also dat sy ser wael stonden, inde herlicke inde erlicke voert gynghen int geystelicke inde int tyttelicke.
Dat te Kynroede dat manscloster erst begaen. Inde alsus bleven sy sitten inde dyenden Got almachtich omtrent VIJ joer lanck. Als men screyff dusent CCCC.LXXIIIJ so waes eyn erbarigher Jouffrouwe myt naemen joufrouwe Katheryn van Kessenich by Thoer, inde die hoerde vanden erbarighen bruederkens van Synte Odilienberghe inde van honnen gueden leven inde groetten afflaeten, inde ontboet diessen jonghen broder Johan vurs., pryor tot Synte Odilieberghe tot hoer, inde lacht hoem vuer dat sy grotte begertte hedde totter heyliger orde des Heylighen Graffs vurs. Inde mytten kortsten so woerden sy eyns, inde sy gaeff hoen erde inde plaetz myt eyn cleyn holtten capelleken, in eyn cleyn gehochtte off dorppe geheytten Kynroede, inder parochie van Kessenych. Doer die ondersetten ser aff verblydt woeren die in dat dorpken wonden, doer sy al sullighen duyrbaren schaet vuer honre duere kreghen, van myssen, van affloeten, want sy ser redelicke verre van honre perochyen kercke wonden, inde des sondachs ser verre te goen hadden solden sy mysse hoeren.
Inde (sy) hoelden uyt diessen cloester te Synte Odylienberghe vurs. der bruederen twe off dry ser erlicke myt wagenen, inde brachtten sy also in hoen dorpken Kynroede vurs., inde hulppen hoen dat sy aldoer eyne schoene erffve off plaetze kreghen aen der cleyne holtten capellen, inde maecktden terstont aldoer eyn ser fyn, cleyne closterken, fyn inde sympel betummert myt sympelen, cleynen holtten huysseren. Inde die kerke (waert) gewyt myt dry altoeren, inde eynen gewyden cleynen kerckhoeff, inde eynen ommeganck off pant vyerkantich doeromme goende. Allet puntelicke inde gerieffelicke.
Inde (sy) dyenden Got mytten ersten ser vuyrichlicken inde malicke hadde sy lyeff. Inde hoen erste pater, dee dat aennaem off alsus begaen, syn naem waes broder Loedewycus, inde der andere broder off prister noe den ersten broder Johan van Abroeck vurs. dee dat erste begeyn inde aenhever waes, also vurschreven steyt. Inde sy terden sych ser waele inde begonsten erffve inde guet te gelden inde rycke te werden, inde Got hertelicke te dyenen, doer sy groette ere inde loeff aff hadden. Dat wyllich der duvel vander hellen begonde te benyden inde ser noede hobbende, inde staecke dat vuyr synre schalckheyt doer bynnen, inde seyde synen boessen soet doerin, so dat dit guet regiment inde leven der brueder, die aldoer vergadert woeren om Got te dyenen, nyet langhe en duyrde. Oemtrent IIIJ joer (waest) dat allet ser guet inde erlicken tuegynghe, inde ouch nyet langher. Also ten leysten al te nyetten quam, inde der eyne hy uyt lyeppe, inde der andere gons ewech quam. In omnem terram exivit sonus eorum. Dat ser te beclaghen waes.
Der pater vurs. dee toch selver ewech inde kreych eyne plaetz inde capelle by Caster, inden lande van Gulick. Inde doer toech hy op woenen inde funderde aldoer ouch eyn nuwe closter geheytten tot Synte Lenartz, by Grevenbroeck, dat sy noch hoebben inde besytten die broders van diessen orden. Inde dyt closter began Anno LXXVIIJ inde LXXIX. Inde is dat andere manscloester dat sy begonnen hoebben van honre orden.
Alsus bleyff dat arme schamel klosterken off convent van Kynroede ledych inde ydel stoen, dat doer nyemant in en bleyff van allen bruederen, die aldoer gewoent hadden mer dan alleyn twe broderen, eyn prister eyn alt inde ser erbaer maen, myt naemen broder Vranck, inde eyn jonck lekebroder dee aldoer syn heylighe professie gedoen hadde by die bruderen, myt naeme broder Henrick van Eyck, eyn guet, erbar knecht. Diesse twe die bleyffven alleyn in hoen convent, inde leden schande inde spytz genoch vanden quaden onwettenden volcke; inde wystten nyet wees bestoen, inde woeren ser bedroeft inde beschampt in hoen hertte, inde deden vast dat beystte dat sy konden off mochtten, inde hyelden hoen guttelicke by eyn te saemen myt cleynre weelden. Alsus stonde dit closterken vurs. nu ydel inde ledich sonder alleyn dysse twe erbaer mannen off broderen vurs., die woeren noch al alleyn doer bynnen.