Blader door transcripties » Lokale Kronieken uit de Nederlanden 1500-1850

archieftoegang 1507_Beek_Trec, pagina 49

Item terstont hyr noe, te wetten des mondachs vuer des Heylighen Sacramentsdach, so reystde hee vruch van Luydicke, myt synen heren inde vrunden, noe Trycht, oem ouch aldoer in te koemen, inde gehuldet te werden, also daen dat ouch van alder tyt die costuyme is geweyst. Mer hy quam erst toe Lychttenberch in dat observanten closter, doer nu syn Here inde vuervader in begraven lach, als vurschreffven steyt, die edel buscop Here Johan van Horne. Inde doer oetmoede dis edel Here inde buscop vurs. sych, inde saet ave van synen perde, inde gynck doer in, inde visiterde die kyrcke, dat graff syns vurvaders vurs., indesanck aldoer die heylighe Mysse vuer syns vuervaders inde Heren zeele myt groetter eren inde oetmodigheyt, doer mennych mynssche ser aff gestycht waes, inde hoem doervan grotten loeff, ere inde pryss goeven. Inde als die mysse uyt waes, inde die commendacie op des gueden Heren graff gedoen inde volbracht was, so bleyff hy aldoer in dat cloester by die bruederen syne noene etten, myt synen edelen Heren inde anderen volcke, dat hy by hoem hadde inde myt hoem te Trycht quam.
Inde also noe den etten, inde als hy gerust hadde inde syn vespers inde compellet gelesen hadde, inde alst aen den avent quam, oemtrent by VIJ uyren, so quam hy te Trycht bynnen, myt grotter vrouden, inde die van Trycht ontfynghen hoem myt alte ser grotter eren inde blytscappen inde myt grotten koste. Inde alsus bleyff hy by die van Trycht dynsdach, gonsdach, donresdach, inde due waest des Heylighen Sacramensdach inde te Trycht groette feyst. Inde diesse edel Here inde oetmodych buscop vurs. veroetmoede sych also ser, opden Heylighen Sacramensdach, inde sanck selver in eyghen persoene, die heylighe Hoegmysse te Synte Servoes, opten hoeghen altoer, inde gynck mytten Heren oem in die processie, inde drueghe due aldoer in die processie, selver dat Heylighe Sacrament omme duer die staet, doer men dat van alder gewoendte plecht te draeghen; inde gynck herlicken in syn buscoppelicke cleyder ser oetmodelicke, doer die van Trycht, inde ouch mennych guet ander mynssche, geystelicke inde wertlicke ser aff verblyt woeren, die dit saghen inde horden, inde dancktden inde loeffden Got ser blydelicke disser groetter oetmodicheyt.
Inde due terstont hyrnoe (wert hy) in allen steden inde plaetsschen, inden landen gehult inde ingevoert ser erlicke inde oetmodelicken, inde allet myt payse inde grotten rustten inde vrede. Got hobs loeff. Amen.
Item in diessen selven joer vurs als men schreyff XVhondert inde VJ, opten IXden dach in Augusto, te wetten op eynen Sondachs avens, omtrent te X uyren inden auxst, inde ouch op Synte Lauerencius avont, dee due op eynen mondach quam, waes grotte ongestuyr weder van blixie inde vuyrre. So waest des selven sondachs, op synte Lauerens avont ser heyt weder inder locht, inde ser suet inde gheslacht weder alle den dach, al totten avont tue, omtrent tusschen VIIJ inde IX uyrren.
Inde due begonde sych die locht te veranderen al ser suttelicke, al tot IX uyren geslaghen woeren eyn guede halff uyre, inde due begonde eyn ser gruwelicke weder, sunderlynghen van ser groetten vuyre van blyxie inde donre, inde ouch daernoe mytten selven van ser grotten reghen. Also dat eyn ser eysselicke inde ververlicke weder waes inder locht, bynae also gruwelicke inde eysselicke, alst ouch eyns waes hyr vorleden tyden, op eynen Synte Lauerensdachs avont, due men schreyff dusent CCCCe inde LXXVIJ, dee due opten sondach quam, inde so eysselicke weder ouch waes, dat men meynde inde sorgede dat die werlt vergoen solde mytten vuyre.
Inde so grotte jamer waes, inde schade geschiede over alle diessen landen, mer sunderlynghe te Syttart, in dat stetgen, gelegen in den lande van Born, doer due tertyt so grotten jaemer waes, inde schaede geschiede vanden helsschen vuyrre. Der Heren van den capyttel Xde schuyre, al vol korns inde myt leyden gedeckt ser suverlicke, verbrande al kael te gronde aff, inde ouch doer hart by off teghen over die stratten, eyne ander grotte schuyre al voel korns, inde due ouch mytten selven twe off dry burgers huyssen, doer by dat closter der canoneken geleghen. Also dat doer op die tyt so grotten jamer, rouwe, drucke inde lyden waes onder geystelicke inde wercklicke, dat sy anders nyet en dochtten off en meynden daen (dat) hoen staet inde sy alle gader myt, vergoen inde verbornnen solden van den helsschen vuyre.Also dat sy decke wylen inde moede off wyllen woeren hoen portten oppen te doen, inde alle te saemen jonck inde alt hoen staet te laetten, inder uyt ewech te ruymen off te louppen inde al verloerren te laetten dat sy doerin hadden.
Alsus ist ouch nu leyder geweyst overal diessen landen hyr omtrent, so eysselicke inde ser gruwelicke weder, dattet ser grotten schaeden inde jamer gedoen heet overal, op eyn plaetz mer daen op die ander. Op sommyghen plaetsschen luyden doet verslaghen inde grotten schade aen boumen inde sunderlynghen aen ouftboemen, op voel plaetsschen aen huysseren, daecken, schoerensteynen, gelaessen vynsteren inde desgelicken; inde aen voele kyrcken inde kyrcktornen, inde sunderlynghen aen die ghene die in den kyrchen woeren, oem die klocken te luyden teghen dat onweder , ser voele spytz inde verdrietz gedoen; die eyne vuer doet geslaeghen, nyeder geworppen, die clockenzeylen ser onwerdelicken uytten handen gerocht etc.
Inde sunderlynghen inder staet van Maestrycht, ser voele wonders is aldoer geschiet te voele plaetsschen; als ten Predickerbroeder kyrcken honnen kyrckthorn op honre kyrcken boven die cloecken opwaertz aff gebroecken, gelicken den cloeckwercke, inde due van dannen gevoert boven hoen gerwekamer off sacristie, dat daecke doerboeven open gescort inde ter broecken, inde dat overwolffte off sulre myt in denselven thorn oem gekert dat onderste opwart, inde also (den thorn) duer dat daecke inde sulre der sacristie gestecken inde also doerin laetten stecken inde hanghen sonder nyeder vallen ter erden, dat eyn ser wonder wercke waes aen te syen. Inde dat cruytz boven van denselven thorn, mytten hencken dat doer op stonde aff gebrocken inde ewech geworppen. Dat vant men.... .
Item ouch allet op diessen tyt inde uyre vurs. so gescach ouch grotten woest inde schade bynnen Trycht, op voele ander plaetsschen, geystelicke inde wertlicke, aen daecken, gelaessen vynsteren, schoeresteynen inde des gelicke, inde sunderlynghen aen goetzhuyssen, kyrcken, thornnen, inde ouch inden kyrcken menigherhande wonderlicke wercken aen bylden, dueren, stylen, etc. Inde sunderlynghen ten Mynderbruederen in honnen choere, aen honre taffelen opten hoeghen altoer, die bylden doerin al swaert inde bruyn ghemackt, inde noch voele anders wonders mer; honnen thorn op hoen kercke ouch ser geschandalizert inde te broecken, inde dat daecke doervan aen eyne syde van boeven tot beneden al uyt gecretz inde ter broecken.