Blader door transcripties » Lokale Kronieken uit de Nederlanden 1500-1850

archieftoegang 1507_Beek_Trec, pagina 48

Dyesse edel Here vurs. off tuekomende buscop waes des alden Her Robrechtz van Arenberchs soen, wyllich Her Robrecht waes eyn recht broder des ovelen ser fellen Her Wyllems van Arenberch, dee den Edelen Here buscop Lodewyck van Borbon so jemerlicke vermorde, inde buytten die staet Luydicke doet sloeghe, inde die staet van Luydick in kreych, inde alle dat lant van Luydicke myt hulppe synre vrunden, die hoem ser wael stonden in synre boesheyt, doer noemoels ser voele quaetz inde ongelucks ghenoch aff quam den armen lande inde ouch den armen lantluyden, alomme in allen landen, inde hoem noch noemoels ser qualicke op quam inde gelont waert, also ouch hyr voere in diessen Register geschreffven steyt, so wy hee te Tricht doet bleyff, inde aldoer syn houfft myt synen langhen barde affgeslagen wart . Inde der jonghe Her Robrecht van Arenberch, die dat noemoels so gruwelicke inde so ververlicken wroecke over die Hornssche, Loenssehe inde ouch anderen landen hyr omtrent, so jemerlicke verdaerff, inde al grotte schaede dede myt branden, myt vanghen, rouffen, stelen inde des gelicken, oem synen oeme, syns vaders Her Robrechts vors. broder, Her Wyllems van Arenberchs doet te vrecken, dat is ouch gewest des tuekoemenden buscops broder. Inde datis al derselve jonghe Her Robrecht van Arenberch, dee dat stercke sloet van Monffort, by Ruremonde, so bedrychlicken den Gelressen uytten handen stelde inde in der Brabander handen, also ouch vurschreven steyt.
Item in diessen selven joer van XVe inde VJ, inden begynne van januario, due dat also ser kalt waes inde hart gevroeren, so toeghen der jonghe Prynssche off Here van Ostenryck, van Borgonyen, van Brabant, Hollant, Vlanderen etc. inde ouch nu myt Cconynck van Castyliën, Garnaten etc. hertoch Phylippus vurs. anderwerff in Spanghen myt synen wyffve, vrouwe Johanna, oem aldoer honnen jonghen soen, den tuecoemenden Conynck van Spanghen te besuecken, inde te visiteren die conynckyrcken, aldoer in die landen geleghen, doer syn soen in tuecoemenden tyden, woldet Got der Here gehenghen inde hoem des levens geven, eyn Here of Conynck aff moest syn. Wyllighen jongen soen vurs. Hertoch Phylips huysfrouwe in Spanghenlant gebart off geleghen hadde, die erste reysse, due sy beyde erstwerff ouch te saemen in Spanghen getoeghen waeren, inde dat keynt aldoer gelaetten hadden, doer alle dat Spangerlant inde ouch die andere Conynckrycken, doeraff ser verblyt woeren, dat sy nu wederomme eynen geboeren Here inde Conynck solden hobben.
Van diessen toeghe off van diesser reyssen, die hoen Here vurs. Hertoch Phylips vurs. voer hoem naem, inde myt synre vrouwe Johanna in Spanghen reysde, inde also ewech van hynnen uyt allen synen landen toeghe; alle synen lantschappen hyr in diessen landen, cleyn inde groet, steden inde dorppen overal, dit alte ser noede saeghen inde ouch hadden, hedden sy dat moeghen keren off hynderen off beneymen; want syn landen, steden inde vrunden besorchtden voele perikulen, inde ser groetten hynder, schade, laest inde verderffenysse, hoem inde synen jongen kynderen, die hee ouch noch hyr lyet, inde den landen myt doeraff koemen mochtte inde (wat) doerin gelegen syn mocht.
Mer dit en halppe allet nyet. Hy dede also die luyde me doen inde gedoen hobben; hy gelocht den wyffve, inde dede inde volgede hoeren rade, want sy mer machte hadde, daen alle syne landen, inde raet, inde Heren synre landen, inde is den wyffve gevolget inde hoeren raet gedaen, inde hene ter zee off te waetter getoeghen tot Spanghen waert. Got geleydem, inde laetter synen landen lyeff aff syn! Amen. Mer heet gynge hoem ouch also als dat plecht te koemen den mannen die der wyffven raet volgen. Hee kreych groet lyden ter zee, inde verderffvelicken schade op dat waetter, inde waert hoem ser suyr off swoer uyt Ingelant van den conynck van Ingelant te koemen.
Inde alsus is hee in Spanghen koemen myt synen wyffve, doer hee ser erlicke due ontfangen waert inde gehuldt in voel landen inde Conynckrycken, als momber syns jongen soens, dee doer int lant geboeren waes, hyr voertyde due sy erstwerff noch eyns te saemen doer woeren getoeghen, also ouch vurschreven steyt in dit Regyster.
Als nu die edel Here Johan van Horne, buscop tot Luydicke nue die doet gestorffven waes, te Trycht, also ouch vurschreven steyt, inde die edel inde ser wysse Heren vanden Capittel der kercken van Synte Lambrechts tot Luydicke also wysselicke inde ser eyndrechttenlicke onder hoen by der Gracie Gotz eynen anderen off nuwen Here inde buscop gekoesen hadden, den edelen Here Erhart van der Mercke, also ouch vurschreven steyt, op Synte Sylvesters avent Anno XVe inde VJ, so waes groette vroude inde blytscappe tot Luydicke, overal onder gheystelicke inde onder werltlicken, dat dyt alsus salichlicke tue gynck myt so grotten paysse en vreden, doer alle mynsschen ser aff verwonderden inde Got ser dancktden inde loeffden, want dyt alsus nye me gesyen off geschiet en waes, also dat nu tue gynghe.
Also diesse edel Here dit horde inde sach of vernaem, dat dat loet off koere op hoem gevallen waes, (hy) myt sergrotter oetmodigheyt Got danckende waes, inde allen synen edelen inde wyssen Heren inde mytbroederen doeraff ser danckende waes, inde sych daerin nyet en verhoeff, mer ser oetmodelicke van synen lyeven Heren inde mytbruederen ingeleyt waert in synte Lambrechs choere inde gesaet opten hoeghen altoer, inde die clocken geluydet inde myt grotten blytscappen Te Deum Laudamus gesonghen. Inde also bleyff hee due al stylle inde in rusten sytten, sonder sych yet te doen off te onderweynden, daen van stonden aen op te Roemen geschyckt, oem die confirmacie van onssen Heylighen Vader den paus van Roemen, die wyllighe hoem nyet geweygert en waert, noch van nyemant hynder noch wederstoet en hadde; inde die quam hoem due balde aff noe poschen. Inde due terstont doernoe, sonder eynych lange beyden, so quam hee tot Luydicke, nyet bynnen der staet mer buytten der staet muyrren, te Synte Lauerens in die abdye off closter van moncken van synte Benedictus order, inde doer waert hee due al op prister gewyt, also sych dat daen tue behorde; inde allet sonder eynyghe hoverdye, mer allet sympel sonder groetten pomposycheyt.
Terstont hyrnoe, sonder eynych lange merren, te wetten den tweden sondach vuer peynxsten, soe quam hee due bynnen Tongeren, in eyn closter van Regulieren, geheytten tot ons Heren Ter noet Goetz, inde doer hadde hee dry buscoppen myt hoem bracht, te wetten syne twee syffraganen off wyde-buscoppen, broder Lybrecht eyn mynrebroder inde meyster Peter de Monte, eyn doktoer inde werltlicke prister , inde den derden waes eyn buscop uyt Vranckrycke .Inde die dry buscoppen wyden hoem due aldoer buscoppe, dat ser oetmodich inde sympel tue gynge.
Item terstont ser kortz hyr noe, als op den saterdach van peynxtavent, so waes hy wederoem te Tongheren myt ser voele guede mannen van synen neysten vrunden inde maeghen, inde voert voele andere guede mannen uytten lande van Ludicke inde van Loene. Inde van doer so reden sy noe der staet van Luydicke, inde doe waert hee due ingevoert opten peynxt avont, als eyn Here inde ontvanghen van der staet van Luydicke, van geystelicke inde werltlicke, ser oetmoedelicken, teghen koemende myt processyen, so dat daen behoerlicke is, eynen nuwen Here teghen te koemen, in te haelen inde te ontfanghen. Inde brachtten hem also inder staet inde voert in Synte Lambrechs kyrcke, inde doer dede hy hulde inde eyde, geystelicke inde werltlick, also dat daen van alder tyt gewonlycke plach te syn inde doer tue behorde, inde allet myt grotter ere inde oetmodicheyt.
Item dies anderen dachs hyr noe, opten heylighen peynxstdach, te wetten op Synte Patronyllendach der heyligher jouffvrouwen, so sanck hee syn erste mysse op Synte Lambrechs altoer myt ser grotter oetmodigheyt, doer menych guet mynssche ser aff verblyt waes.