Blader door transcripties » Lokale Kronieken uit de Nederlanden 1500-1850

archieftoegang 1507_Beek_Trec, pagina 46

Och lassy! Och arme! due waes dat gelt qualicke te krigen, off op te brenghen, dat hoen toegesacht inde geloeft waes te geven van den Here van Gelre. Inde die eyn staet en wolde nyet uitleggen off gelt opbrenghen vuer die ander, oem des volks quyt te werden. Inde die van Ruremunde hadden den meysten last myt diessen volck vurs. Also dranck sy die noet doer tue, dat sy inde Her Robrecht vurstelicke sproecken myt honnen jonghen Here, den nuwen Hertoch, oem eynen raet te suecken, inde eyne manyer te veynden myt hoem, dat sy hoem te vreden mochtten stellen, inde hee dat volck ouch te vreden stelde, inde sy honre met eren quyt worden. Alsus en waes doer egheyn ghereyt gelt te veynden noch te krighen. Inde Her Robrecht naem dat volck van wappen al tot sych, inde men rekende die somme inde daghen der soutdyen inde due synen dreynckpenninck, die hoem tue gesacht inde geloeft waes, al by eyn te samen; inde (dyt) lieppe due op ein ser grotte somme gelts van voel dusent gulden.
Inde due liet hee sych onderwyssen due hee sach dat doeregheyn gelt te krighen en waes. Inde der jonghe Hertoch van Gelre, myt rade derre van Ruremonde, satten hoem pans in synen handen dat ampt inde sloet van Montfort myt allen synen dorppen, reyntten, gueden inde vervallen, in naetten, in drughen, so daen dat geleghen mocht syn, dat te gebruycken inde reyntten opte boeren, gelicke off syn patrimonium guet waes, al totter tyt tue, dat hoem eyn Hertoch van Gelre, off staet van Ruremunde syn gelt off pennynghen guttelicken betaelden inde weder oem geven, die doer gesompt inde gherekent waeren inde hee brieff inde syegel van hoen daeraff ontfanghen hadde. Inde alsus besaet hee dat stercke sloet, inde buerde die reyntten gelick synen properen erffguede, al tot men schreyff XVe inde V in januario.
Nu noch sal men hoeren, so wy dat Her Robrecht van Arenburch dis schoenen inde ser stercken sloet van Montfort quyt geworden is, inde die Brabanders myt behendicheyt doer aen gekoemen syn, inde dat nu in honnen handen gekreghen hobben, sonder slach off stoet.
Inden joer ons lieven Heren geburt, als men screyff XVe inde V, terstont nae dertyendach, in den aenbegynne van Loemont, so heet Here Robrecht van Arenberch vuers. gedechtich geweyst der hoverdyen inde schaden die die van Ruremonde off die inliggers, die bynnen Ruremunde laeghen, aengedoen hobben in den joere vurs. van XVe inde IIIJ, alsdat sy in synen bedryffve off ampt van Montfort, dat in syne handen stonde inde aen hoen versaet inde verpant stonde, syn beystte dorppe inde stercke vesten van Echt, al kael te gronde aff verbranden, due hee nochtant stylle saet, inde sych der orloge aen egheyne syden en kronde, inde gerne aen beyden syden vrede gehalden, inde hoem doer boeven diesse grotte hoverdie inde schade geschach inde aengedaen wart den armen luyden in syn ampt; doer hy ser thornych inde boesse oem waes, also ouch vurcreven steyt.
Dyt synde inde aenmerckende die Here inde Brabanders, die due tertyt vyant woeren der Gelressen, inde heymelicke van besyden vruntschappe ghemackt myt Here Robrecht van Arenberch inde myt hoem gekalt off gesproken also: dat here Hertoch Phylips dyener inde vrunt syn solde van Brabant, inde syne pennynghen off gelt, dat here op dat ampt inde slot van Montfort hadde, van hoenluyden wolde weder nyemen, inde doertoe eynen gueden dreynckpennynck ouch doer tue nyemen wolde, inde honnen Here Hertoch Phylips van Brabant doerop laetten wolde inde tot synen handen breynghen inde hoem off die synen, doerop loetten koemen inde tot honnen handen stellen. Dat wyllich Her Robrecht due gedoen heet, inde syne pennynghen genoemen, inde dat hoem mer werden mocht van Hertoch Phylips syn vruntschappe; inde hee inde ouch die syne, die van synen weghen op Montfort saetten, inde dat in hadden, hoebben dat hoene noe hoen ghenomen inde aff gevoert, inde syn uyt geganghen, inde die Brabanders daerop in gelaetten, op datum inde joer vurscreven. Inde nu hobt ghyr hy gehort, so wy Here Robrecht op Montfort erstwerff koemen is, inde onch wy hee nu doer van koemen is, inde die Brabanders doer aen. Inde als dyt der Here van Gelre vernaem, inde die Gelresse alle te samen, inde sunderlynghen die staet van Ruremunde, woeren hyr van ser ververt inde jamerlicke bedroft inde verslaghen.
Item alsus bleyff diesse orloeghe stoen, gelick als hee langhe gestanden hadde. Daen alleyn die boeffven, ruytteren inde knechtten die aloeme loeghen in steden off op sloeten, die reyden inde lyeppen alomme inde hylden die stratten reyne. Also dat in diesser tyt ser quaet wandelen waes. Inde der arme lantmaen waert jemerlicke verdorffven aen beyden syden. Inde die Brabanders hadden die schande inde spot ser groet, want doer en waert egheyn wederstant gedoenvan den Brabanderen, doer die jonghe Here inde prynssche groette schande aff hadde.
Ten laetsten alst quam inden soemer, uytgans Mey, so quam der Roempsche Konynck af, van boven myt synen soene den jonghen Prynssche, al tot Collen, inde toeghen due vuer Ercklant, inde terstont mytten selven ewech van dannen, sonder yet te doen of te bedryffven, doer sych menych mynssche ser aff te verwonderen hadde van diessen grotten Here, dy alsus slappelicke hyr myt ome gynghen, inde nyet mer daertue en deden. Inde quamen due over die Maesse inden lande van Horne inde due tot Eyndhoeffven, inde alsus alomme van den eynen tot den anderen, gelick die Heyden off Tatteren ploegen te trecken al sonder iet te bestoen.
Inde in diessen selven tyde, in Junio, als die van Ruremunde vernoemen dat der jonghe greyffve Jacob, des alden greyff Jacobs soen, dee eyn broder waes des Heren buscop Johans van Hornne, dat diesse jonge greyffve vurs. sich gelacht hadde by Ruremunde in syn lant, in eyn dorppe geheytten Neer; so syn sy heymelicken uytgetoeghen inden nacht, inde hobben dat dorppe Neer vurs. bevallen, daer diesse jonghe greffve van Horne in lach myt mer anderen luyden van des Prynsschen volcke, die due tertyt die nachtewaecke qualicke hylden, daer selden gelucke in is gelegen; inde hobben den jonghen greyff vurs gevanghen, inde mer anderen, inde myt hoen, myt grotter blytschappe tot Ruremunde in gevangen gevoert; want here Hertoch Phylippus, den prynssche van Brabant, te lyeffve, inde die Gelressen vyant woerden waes, inde syn sloetten Hoerne inde Wertoppen gedoen hadde oem doeruyt die Gelressen te drucken. Inde alhyroem, so is hee die guede jonge maen in dyt verdryet inde grotten last gekoemen, oemdat hee gerne groet hedde geweyst inde gesyen by Hertoch Phylips vurs. Dat hoem nu leyder qualicke loenen mach. Got bettert!
Item alsus stonde diesse onsalighe orlach den armer lanluyden aen beyde syden, die daer vast jemerlicke by verdorffven woerden, inde cleyne off luttel feytter van worden. Inde geschyede nyet van den Brabanders. Sy toeghen voer Nuymeghen liggen, doer sy luttel bedreyffven. Als dit saghen die van Ruremunde inde die ruytters, die doer bynnen loeghen dat die Brabanders myt honnen hulppers, also oem Ruremunde ewech toeghen, inde aldoer by hoen sych nyet nyeder en dorsten sloen, noch Ruremunde beleggen, al hadden sy Monfort in, inde Dalenbrock, Horne etc. so kreghen sy grotten moet van bynnen, inde macktden sych sterck ghenoch, so te voet als te perde, inde en achtden opten drosset van Valkenborch nyet myt allen, Joncker Johan van Palant, dee due tertyt op Monfort lach, oem die van Ruremunde te hoeden, dat sy nyet uyt trekken en solden int lant van Valckenborch, doe here eyn drosset off amptmaen over Waes, noe doet syns vaders, Her Dederick van Palant.