Blader door transcripties » Lokale Kronieken uit de Nederlanden 1500-1850

archieftoegang 1507_Beek_Trec, pagina 45

Doeroem Maxmiliaan inde alle die brabander ser oem verstuyrt inde thornych waeren, inde doermyt so hoeff sych due der orloch tusschen die Brabander inde Gelresschen inde stonde nu alsus eyn lange wyle tytz tot int joer dusent CCCC inde XCVIIJ, due quam der roempssche Konynck Maxmilian wederoem van boven uytten lande heraff inde verweyktde die vee, inde toch vur Straelen, eyn stetgen by Venloe inde waen dat, inde dede doer grotten schade also hyr vuer geschreffven steyt. Inde doermyt so bleyff die vee wederoem al stylle stoen mytten Brabanderen, sonder eynyghen grotten orloech. Mer der Hertoch van Cleve, dee bleyff al in grotten orloeghe mytten Gelressen, inde deden malkander grottenschaden aen beyden syden den armen huysluyden als ouch eynsdeyls vurschreven steyt.
Doernoe int joer ons Heren dusent XVe inde IIIJ, inden herffst, so quam der edel inde hoeggeboeren Hertoch Phylippus tot des Hertogenbussche lyggen inde noch voele grotten Heren inde prinssen, geystelicke inde wertlicke. Mer doer quam luttel off cleyn profyt den landen aff. Dan due sy scheyden inde opbroecken, inde al ewech woeren, due waert des jonge Hertoch Phylips doerin geraden inde tue bracht, dat hee vyant waert syns neyffven Hertoch Karle van Gelre inde des lants van Gelre inde hoen veebreff screyff inde ontsacht sy; docraff due die Gelressen ser verblyt waeren, sunderlynghen hoer ruytters, soldener inde al ander lycht volck, dat by hoen geslaghen waes, uyt allen landen, oem solt te wynnen inde stelen inde rouffven, inde hoen generen opten armen huysman off lantman, dee dat alle weghen betaelen moet. Inde lyettent due henen goen, inde rouffden inde stoelen inde branden, veynghen inde spenen die arme luyden, aen allen syden die den Hertoch van Brabant tue gehorden, in Hollant, in die Meyerye van den Bussche, int lant van Valkenborch, als ouch eynsdeyls vuer steyt.
Inde hyr waes luttel off cleyn wederstant tue vanden Brabenders. Hertoch Phylips toch wederoem in Brabant, inde die roem in dit spel off orloch geraden hadden, bewarden syn erre qualicke. Doer die edel prynssche grotten schande aff hadde, want dit waes syn erste reysse van orloge.
Als die ruytter inde soldeners off knechtten van orloch nu dit saghen, die due tertyt bynnen die gueder staet Ruremonde laegen inde der gueder burger overmeyster waeren, so sorchtden sy quanzhuysse dat die Brabanders koemen solden in den veystten off dorppen van Echt, dat eyn ser stercke vestte waes inde hoen doerin leggen inde in nyemen, inde hoen daen daeruyt schaden solden, inde benyemen hoen honnen toch off strecke noe dat lant van Valkenborch, te rouffven,te stelen. Inde toghen myt heytten houffde bynnen Echt, uyt Ruremonde, inde brandent al kael te gronde aff, also bescreven steyt hyr vuer anno XVe inde IIIJ.
Van wyllighen brande, dat Echt also kael aff verbrant waert, Her Robrecht van Arenberch, (Her Wyllems broders soen, dee te Mastricht gherycht off onthoufft waert) ser thornygh inde ouch gestuyrt waert op die Gelressen, inde sunderlynghen op die staet van Ruremunde, dat men hoem den schaden inde hoemoet dede in syn bedryff, off lant, off ampt van Montfort , dat due tertyt in synen handen stonde inde hee here off overste waes over Echt inde Montfort, inde van hoem off den synen geregert inde besetten waert.
Inde hee off die syne, die van synen wegen op Montfort saetten (inde) dat ampt regerden hoen ser voele te kort deden, dat sy hoem Echt also aff branden buytten synen rade off consent, want dat beyste dorp waes, dat hee in synen lande off ampt van Montfort hobbende waes; inde hee ouch tusschxen byden al stylle saet, inde der vee off orloeghe aen egheyne syde sych onderkerde, inde saet op inde dacht in hoem selven, so wy dat hee Montfort quyt werden mocht, inde dat buytten synen schaden.
Nu oem eyn luttel schryffvens te mer, so sal ich uch daen terst scryffven so waen dis Her Robrecht van Arenberch erstwerff aen dit schone sloet inde stercke burch off ampt van Montfort koemen is, inde (dit) in synen handen koemen is. So is daen ten ersten te wetten; als inder tyt due disse jonghe Hertoch Karl. van Gelre in Vranckryck gevangen lach, also nu hy al vurschreven steyt, inde dat lant inde steden des lans van Gelre, al heymelicken achtter den Roempsschen Konynck inde Brabanders ser groet bewerff deden inde raet sochtten, oem honnen jonghen Here, Hertoch Karle vurs. uyt te kryghen, inde hoem in syn lant van Gelre te brengen, inde also vanden Brabanderen te koemen, inde dit alsusverre koemen waess, inde hoen Here inde Hertoch loess inde uyt waes; so en doerst hy dat also nyet bestoen, noch aen goen myt luttel volcks te trecken uyt Vranckryck noe syn lant van Gelre, van anxte inde gruwel, dat hoem die Brabanders yrgent bevallen mochtten inde hoen verspyt off verraden werden in den weghe, inde daen van hoen gevangen werden, inde in Brabant gevort.
Also wardt due tertyt, Her Robrecht versocht inde vuergehalden inde gebeden van diessen jonghen Hertoch Karle vurs., dat hee aen nyemen wolde inde sych doernoe stellen, inde ruytter inde volck van wappen krighen inde nyemen, oem hoem syeckerlicken over te voeren inde paysselicke in syn lant te breynghen; hee solde alle die kosten betalen inde och die ruytter off volck van wappen, die hoem hyr tue hulppen, ser guetelicke loenen inde ouch wael betaelen, inde hoem doertue ouch eynen schoenen dreynckpennynghe geven voer synen arbeyt inde getrouwen dynst inde vruntscappe, so hie hoem also by stonde, inde hoem in syn lant van Gelre bracht sonder schade off hynder van synen vyanden.
Alsus heet diesse Her Robrecht van Arenbergh vurs. diesse reysse aen sych genoemen inde voele quade boeffven inde ruytters opgeboden inde gekregen in Vranckryck inde alomme; want hy waes eyn vader inde houfft aller boeffven inde dieffven die gerne gelt wonnen inde sout verdyenden. Inde hy heyfft diessen jonghen Hertoch Karle van Gelre myt grotter macht van volck inde ruytters over gevoert inde gebracht in syn lant van Gelre inde sunderlynghen in die staet van Ruremunde, sonder last, schade off hynder, also hy hoem tue gesacht inde geloeft hadde. Inde dit geschyede inden joer onss lyeffs Heren dusent CCCC inde XCIJ, so als hyr in diessen register gescreffven steyt, inder quatertempel nae asschelengonsdach.
Als diesse jonghe Hertoch Karle vurs. nu in syn lant inde stede quam so waes al doer over al grotte blytschap indevrouden, inde sy hulden honnen jonghen Heer vuer honnen erffhere. Inde leyder! sy vergatten der eyden inde hulde die sy geloeft inde geswoeren hadden hertoch Karle van Brabant vurs. inde noe syn doet Maxmilianen, doer nu spel inde orloeghe uyt koeme myt Hertoch Phylips inde den Brabanders. Inde alle dynghen nu voleyndt inde voldaen waeren myt diessen jonghen Hertoch Karle vurs, so lach diese Her Robrecht vurs. mytten Franssoesen inde volck van wappen, die den Hertoch over bracht hadden, in syn land inde steden, also vurschreven is, inde dede grotten schaden inde hynder den armen luyden opten dorppen aloem int lant, inde begerden hoen scholt off gelt betalt te hobben, dat men hoe tue gesacht inde geloeft hadde, inder erster reyssen off anneymynghe den Hertoch over te voeren inde in syn lant te brynghen.