Blader door transcripties » Lokale Kronieken uit de Nederlanden 1500-1850

archieftoegang 1507_Beek_Trec, pagina 44

In dyessen tyden, inden herffst, branden sy inden lande van Valkenborch hyr inde doer, mer sunderlynghe te Goele, oem die kyrcke inde opter Maessen. Want sy reden in allen plaetsschen duer die Maesse, want die Maesse waes allet dat joer, tot korsmysse tue, also ser cleyn als men sy in mans gedeynck ye gesyen off geleyfft hadde.
Alsus dreyffven die Gelresse ruytter grotten woest inde grotten schaden over Hertoch Phylips landen inde arme ondersetten, in allen syden, alom inde omme. Inde des hertoch Phylippus waes eyn ser edel groet inde ryck Here, mer nu jemerlicke veracht van allen boeven. Hoem gebrack gottelicke wysheyt inde alden raet; hee waert geregert luttel tot synre eren. Got herbarmps!
Item in diessen selven joer vurs. so waert dee nuwe choer te Beyck, inden lande van Valkenborch ghemackt.
Inden selven joer vurs. inden herffst so staerff der rycke man tot Beyck vurs. myt naemen Johan Syën, doers voele aen stonde, inde in cortten jaeren ser overvlodich ryck waes worden van ertsschen gueden. Offt al myt Gode waes inde salich aen syn zeele, dat is Got inde hoem nu bekant. Got trost syn zeele. Amen.
Item in diessen selven tyde inde joere vurs. so waert dee nuwe kyrckthoren gemackt te Geleen by Syttart.
Item op dit selve joer vurs. so waest eyn ser drughe somer. Inde der vlas quam ser qualicken voert. Inde dat voert quam en waes nyet guet. Also waest eyn duyr tyt inden vlass; men galt IJ steyn off stucke omtrent J slepper.
Item al indiessen joer off tyde vurs. so waest eyn ser druge herst inde eyn ser warme vuerwentter, als men ye gesyen off geleyfft hadde. Inde heet en hadde nye gevroeren, noch kalt geweyst, noch gesnyt al tot int ander joer van XVe inde V, inden loemont, op Synte Sebastianus avent, due waest erstwerff ys gevroren. Inde Synte Agnetendach veyl der erste sne, inde due begont erstwerff aen kalt te werden inde te weynteren.
1505.
- Inden joer ons lieffs Heren gebuert als men screyff XV hondert inde V, due stonde off duyrde der orloch noch al op synen alden paess, also vurs. steyt, tusschen den edelen inde ser hoege geboeren ertzhertoghe van Ostenryck, here Phylippus, Hertoch van Brabant, Hollant etc. inde synen neyffve Hertoch Karle van Egmont, dee dat lant van Gelre in hadde, inde sych Here doervan screyff inde ouch syn wolde, want syn vader inde alder vader dat behert inde besetten hadden, noe dode Hertoch Reyners van Gelre inde Gulick, dee gestorffven waes sonder edel gebuertte.
Alsus waes doen diesse jonge Hertoch Karle vurs. int lant koemen uytten gevanckenysse in Vranckryck doer hee lange in gevangen hadde gelegen, in synen jongen keyntsdagen, als nu hyr vuer geschreven steyt in diessen buecke; inde die Brabander hadden dit lant van Gelre in, inde in honnen handen, want der stranghe, ovelmodich Hertoch Karle van Borgonyen inde Brabant dat mytten swerde inde mytten grotten Heercracht gewonnen hadde inde in creghen myt grotter macht inde koste, als ouch nu vorschreven steyt indyessen register, vur synen dode, er dat hee starff in Swytserlant, inde doernoe ouch in hadde inde paysselicke besaet myt synre huysvrouwe, Maria Hertoch Karels vurs. dochtter, Maxmilianus des Roempsschen Keysers Fredericus soen, al totter tyt tue dat diesse jonghe Hertoch Karle van Gelre uytten gevanckenysse quam by heymelicker hulppe inde bystande myt gelde der steden uytten lande van Gelre, die ser begerden honnen rechte geboeren Here wederoem te hobben in hoen lant van Gelre, inde van hoem geregert te werden. Inde als dese Here nu uyt waes, inde wederoem in syn lant van Gelre quam, so vergaetten die Heren inde steden off regeres vanden lande van Gelre der hulden inde eyden die (sy) gedoen inde geswoeren hadden den strangen Hertoch Karle van Borgonye inde Braband, als eynen erffhere, inde noe syn doet Maxmiliaan, die Hertoch Karolus vurs. dochtter hadde tot synen wyffve ouch als eynen erfhere; inde woeren ser blyde inde ontfyngen honnen jongen Here myt grotter blytscappen, inde hulden hoem due ouch vuer eynen Here sonder eynyghen orloeff off quytschelden honre eyden off geloeffde, die sy in vuerleden dagen gedoen off geloefft hadden den Hertoch van Brabant, Maxmilian vurs.