Blader door transcripties » Lokale Kronieken uit de Nederlanden 1500-1850

archieftoegang 1507_Beek_Trec, pagina 43

Inde alsus stonde dit eyn luttel tytz inde mallick waes op syn hoede, inde die ghene die bedroeghen woeren vanden ghenen die gericht woeren, die stoecken sych heymelicke uytten lande ewech, inde so blode sych disse opsaet inde ser quade verrederye al eynsselicke ten leystte doet, dat doer egheyn seggen mer aff en waes.
Item in diessen selven joer vurs. inden herffst, so starff die ersamyghe Abbatiss jouffvrouwe Maria van Her Honsbroeck , eyn Abatisse tot Monster-Bylssen, inde ser baldedoernoe so koere dat Capittel tot Monster eyne vrouwe uyt honnen Capittel eyn jouffvrouwe van Thoeren, dat hoen allen eyn schande waes, dat sy also nydich onder mallick anderen due tertyt woeren, dat sy onder sych nyet Vrouwe en konden gekeyssen. Inde diesse jouffvrouwe inde Vrouwe waes geheytten Margarieta van Hoefels . Inde sy waest Vrouwe ghekoeren inde Vrouwe ghemackt op Synte Odendach, op eynen donresdach myt grotter eren, in present off teghenwerdigheyt myns Heren van Luydick Johan van Horn, die doeroem ouch ser gearbeyt inde bede gedoen had aen dat capittel van Monster, dat sy vrouwe gekoeren waest.
Item in dyessen selven joer vurs. so waest redelicke groette erdbevynghe overal in dyessen lande, op Synte Bartholomeus avent, omtrent der Xder uyre in de nacht.
Op Syntte Bartholomeus snachts voerscreven,
Sach ich dat ertryck voerwoer beven.
In dyessen twe versken sal men veynden die joeren onss Heren als diesse groette ertbeyvynghe geschach, te wetten den dattum off joer ons Heren anno XVe inde IIIJ
Item al in dyessen tyde inde joer vurs. so waest allet eyn ser bedruckte tyt inden lande van Gelre, myt ser swaren inde jamerlicken orloeghe, aen die eyn syde mytten Cleyffschen dat ser langhe geduyrt hadde, also des ouch hyr voer in dyessen buecke verklaert off gescreyffven steyt myt kortten worden; mer leyder! so vyelt hoen nu noch swarder inde harder, want omtrent inden herffst, teghen den kalden weyntter so waert die jonghe prynssche Hertoch Phylippus van Ostenryck inde van Brabant hoen vyant myt allen synen hulpperen.
Also hadden die van Ruremonde anxt inde sorghe, dat die Brabanders inde die Valgenborcheyrsse die veystynge off datstercke dorp van Echt in kryghen mochtten, inde doeruyt behelppen myt rouffven inde schade hoen te doen tot vuer hoen portten te Ruremonde; inde toghen selver tot Echt inde brandent kael aff inden gront; dat jamer waes voer die arme huysluyden die doerin saetten off woenden, inde liever vreden gehaet daen onvreden, inde nu teghen den kalden wyntter verstrouwet inde ser bysterlicke verjaecht inde so jemerlicke verdreffven moesten syn, inde dat van hons selffs vrunden. Also waert dat guede lant van Gelre in allen syden, sunderlynghe inden lantman merlick verdruckt inde verdorffven, dat schade inde jamer waes.
Mer leyder! die landen die Hertoch Phylips tue behorden, die arme lantluyden, als die Meyerye van den Bussche, dat lant van Valkenborch, inde andere landen die gelegen loegen aen die kantten vanden lande van Gelre die waerender ouch ser qualicke aen, inde in grotten lyden, drucke inde schade, so vanden vyanden aen die eyne syde, inde ter anderre syde vanden vrunden, als vanden volcke van wappen, dat hertoch Phylips doerin gestalt inde gelacht hadde, oem die landen inde volcke te bewaeren teghen die Gelresse. Alsus waest allet eyn ser bedrucktde tyt, mytten armen huyssluyden off lantmaen aen beyden syden. Got ontfermps.
Item allet in diessen selven joer onss lyeffs Heren van XVe inde IIIJ, sa waest eyn ser ellendige tyt mytten armen huysmaen off lantmaen, inden lande van Gelre, inde in den landen aloem liggende den lande van Gelre, tuebehoerende den hertoch van Brabant, in Hollant, in die Meyerye vanden Bossche, inden Pele, inde ouch inden lande van Valkenborch. Want der Hertoch van Brabant waes noch jonck, inde hoem gebrack wysheyt, dat schade waes; inde hy hadde jongen raet, Got herbarmps. Also dat vuer alst mocht myt synen armen onderseytten inde lantluyden. Want hee waert vyant der Gelressen duer quaden jongen raet, inde doer myt waest gedoen. Hee toch in syn steden liggen, inde waes guetgeselle myt schoenen vrouwen inde dede nyet myt allen totten Gelressen, inde lyet sy gewerden sonder eynyghen wederstoet. Inde doermyt so sloeghen alle die ruytter, voetknechtten inde alle andere boesse wychtten inde quade boeffven uyt allen landen by die Gelressen, inde ruytden inde rouffden, branden, vynghen die arme luyden so jamerlicke in allen syden die den hertoch van Brabant tue behorden, sonder eynich ontsycht. Inde sy worden so hoemodich inde so ryck van vanghen, spannen der armen dorpluyden, die sy halden in allen des Hertochs landen; also dat des grotte Here, ser edel van gebuertte ser veracht waert inde bespoet van allen vuylen boeffven.