Blader door transcripties » Lokale Kronieken uit de Nederlanden 1500-1850

archieftoegang 1507_Beek_Trec, pagina 41

Item in diesen selven joer vurs. soe worden ser voele mynrebroders closteren, dye langhen tyden ser wyldelicken geleyft hadden (gereformert), die eyne aen die Observanten, die andere aen die Collecten, also dat due tertyt geheytten; mer sy woeren die rechtte mynrebroder die sych selver bekert hadden, inde die reformacie aen ghenoemen sonder bedwanck, inde leyffden noe den regulen. Inde sunderlynghen, so quam op dit selve joer totten rechtten mynrebroder off reformacieder Coletten dat mynrebroder closter tot Dyst, inde terstont doernoe dat closter te Bruesselt inde tot Aken, door de Observanten brueder ser drovych oem woeren, dat sy die closteren vurs. nyet en konden krighen, want sy se ser gherne hadden in gehaet, hedden sy se konnen kryghen. Mer nomols hobben sy se noch tot hoen in kreghen.
Item in diessen selven joer vurs. so naem dat muyren te Hasselt eyn eynde, inde so waes die stat al omme inde omme, al ront ommuyrt inde volmackt van muyren inde ser stercke thornen.
Item in dit selve joer dede der duvel inde dat onweder ser groetten schade tot Bylssen aen der kyrke inde sunderlynghe aen den kyrckthorne dee ser gebroecken waes, bennen aent bontwerck inde buytten aen dat daeck.
1503.
- Anno Domini XVe inde dry, te wetten des donredachs noe den heylighen XIIJ dach, te weten den XIJden dach in januarie, omtrent der vyrder uyren noe snoenen, so waest eyn alte ser groet, byster inde ongestuyr weder van donre, blyxye inde reghen, inde te moel ser grotten stercken weyndt, inde dede ser groetten schaeden aen daecken, aen huyssen overal, op voelen eynden off plaetzsschen, inde ouch aen boumen, die uyter erden weyden. Inde heet waes eyn ser weyck off warm vuerwyntter, mer noemols als der Mert quam, due vyelle eyn groette sne, inde het snyde decke inde ouch ser voele, inde twaes doerby ser kalt inde vroer sterck, also dat die beysten begonden gebreck te lyden op voele plaetsschen, doer qualicke houwe off stroe waes.
Item in dissen selven joer vurs. so quam der Roempssche conynck wederoem van boven hyr in dit lant, sunderlyngge in Brabant, inde besocht syne jonghe kynderkyn, syns sons Hertoch Phylippus kynder, die due ter tyt noch in Spanghen waes myt synre huysvrouwe Johanna, eyn dochter des konyncs van Spanghen. Inde alsus so bleyff der roempsse conynck Maxmilianus vurs. in Brabant liggen, inde verbeide die wedercompst syns sons Phylippus vurs.
Item in diessen selven tyde in de vaste, inden Mert, so bereyde sych die edel Here inde buscop van Luydick, Johan van Hoerne, inde toch ser sottelicke in Brabant, totten Roempsschen conynck, inde hyetten ser wyllekoeme myt grotter ere inde stode. Inde hee waert ouch ser vrundelicke ontfanghen in Brabant inde erlicke getractert, doeraff alle syn ondersetten off inwonre syns lans, geystelicke inde ouch werltlicke ser off verblyt woeren inde wael te vreden.
Inde due mytten selven terstont als hy wederoem in syn lant quam, so bereyde hy hoem ser kostelicken met aller schyraet, inde toeghen due mytten selven in Vranckryck totten Conynck van Vranckryck, inde teghen die affkompst des jonghen prynsschen Hertoch Phylippus van Brabant, dee due weder oem aff quam uyt Spanghen, als vurs. steyt.
Item in diessen tyde waest ser guet vrede over alle diessen landen, Vranckryck, Brabant, Vlanderen, Hollant, Gulick, Collen, Uytrecht etc. Mer dat arme lant van Gelre hadde grotten anxt inde sorghen vuer den Roempsschen Conynck vurs. inde mytten Hertoghe inde lande van Cleyffve.
Item in diessen selven joer van XVe inde dry so waest Hyldoemskyrmysse. Inde men sacht due overal, dat men in menyghen Heldoemskyrmysse nye al so ser voele vrempdes volcks uyt ghesien en hadde tot Aken, als dyesse reysse.