Blader door transcripties » Lokale Kronieken uit de Nederlanden 1500-1850

archieftoegang 1507_Beek_Trec, pagina 40

In diessen tyt off joere vurs. so waert die schoene inde stercke staet Medona off Medyn gewonnen van den Turcken, overmytz gebrecke off versuymenysse Maxmiliani des rompsschen Konyncks inde die van Veneghen; dat sy hoen nyet by en stonden noch onseyt en deden. Inde doer bleven doet inde jemerlicken verslagen inde vermort mer daen XVJ dusent cristen.
Item in diessen selven joer vurs. XVe. inde eyn so waest eyn ser naette oust inde ser voel regens, due men dat koeren in doen solde inde ouch in dede.
Item in diessen selven joer XVe inde eyn so toeghe die jonghe prynssche van Brabant, myt synre huysfrouwe, vrouwe Johanna van Spanghen, tot den Conynckryck van Spanghen, tot hoeren vrunden myt ser groetter macht inde cracht vanvolcke, te perde inde ouch te voet, ser herlicke inde kostelicke uytgeruest, inde getuycht myt aller eren inde cyraetten als eynen edelen prynssche inde here tuebehoerde. Inde hee toege duer Vranckrycke, al te lande, inde der Konynck van Vranckryck dede hoem ser grotte ere, inde groet gescheyncke in allen steden, doer hee in quam te loegeren; want dat waes wael byllicke inde ouch wael behoerlicken dat hee hoem ere inde vruntschappe dede off bewyss in synen landen off steden, want der Konynck inde der hertoch hadden eyn huwelick gemackt off getracktert tusschen hoen twe jonghe kynderkyn, die noch ser jonghe woeren. Des prynssen jonghe soen Hertoch Karlle hadde des Conyncks jonghe dochtter; doer groette blytscappe over alle landen, aen beyde syden, aff waes, van allen mynsschen die verstant hadden.
Item in dit selve joer vurs. so vergaederden sych al heymelicke ser voele quaeder boeffven op dat sloet van Monfort, by Ruremunde, dat due tertyt Her Robrecht van Arenberch noch pans in hadde van Hertoch Karlle van Gelre, inde toeghen off reden duer die Maesse, die due tertyt ser cleyn waes, inde holden eynen ser groetten rouff inden landen van Horne inde oem Eycke opten buscop van Luydicke Her Johan van Horne.
Item in diessen selven joere, te wetten XVe inde eyn, terstont doer te Maestricht sunderlynghen inde doeromtrent, gekoemen, inde gevallen woeren die cruysser inde ser mysselicke teycken van ser menygherhande fyguyren off teyckenen als vurs. steyt in diessen boecke, so is opgestanden inde ghekoemen eyne ser wonderlicke seckte off manyere van volcke, schynende vuer der mynsschen oughen, te moel ser te syn eyn dat heylichste volke, van al so stranger inde harder penytenciën inde ellendige leven, als men ye gesyen off geleyft hadde. Inde diesse mynsschen van diessen scherppen inde ser harden leven, die quamen van boeffven heraff uyt Lombardiën, van Fynegyen , van Roemen, inde sy gyngen al naeckt inde bloet, bervoetz inde bloetz houtz, sonder yet op hoen houfft te hoebben wyntter off soemer, off yet in hoen voetten te hoebben, so wy naet off kalt dattet syn mocht. Sy hadden eyn groette bast, off seyl, over hoen naeckt, bloet lychaem, inde doer over eyn scharp hoeren cleyt, inde daen eynene groffven lynen kyedel myt muwen, inde vuer al tue als eyns bruwers kyedel, al totten knyen tue off doer omtrent, inde daen dat boven myt eyn seylken tue gebonden. Sy en droeghen metzser noch buydel, noch staeff, noch steck, noch nyet met allen, aen hoen lyff noch in hoen hant, daen alleyn eyn cleyn cruytzsse in hoen † hande, al vuer hoen aengesycht in beyden handen. Inde sy vasden alle dagen, inde dry daghen ter weycken in waetter inde in broede, inde nummermer en droncken sy anders daen waetter, gelick synte Johan-Baptist. Inde sy en aetten vleysch, noch andere spysse, die hoen hertte off cracht hadde moegen geven, daen alleyn ertten off muyss , inde dat ser selden. Inde sy en slyeppen anders nyet daen int stroe, als wy die vercken. Inde sy en begerden noch en baeden oem golt, noch oem sylver, noch oem gelt, aenders daen oem waetter inde oem broet. Inde doer sy aetten inde den kost kregen, als sy saet woeren van waetter inde broede, so dancktden sy Got inde den luyden. Inde overde hoen yet van brode, dat lyetten sy liggen. Inde alsus gyngen sy duer die landen off steden. Inde sy hadden ouch pristers onder sych die mysse laesen, inde die gyngen ouch al nackt gelicke den anderen. Inde sy gyngen myt kudden dry off IIIJ VJ te samen, inde sy sachtten dat sy eynen oversten hedden boeven hoen allen, den sy hylden heylich inde waerachtich etc. Inde so waet dyt syn mocht off beduyde datz Got bekant. Inde dit volck heylt ser grotte scilencie nacht inde dach, inde sy hylden alle hoen gebet op blotten knyen inde sonder rastten aen muyre off want, off banck off stoele. Inde sy kuysden die erden ser decke in honnen gebede als sy mysse horden .
1502.
- Anno Domini XV hondert en twe due waest eyn alte ser vuylen off weycken weynter, sonder eynych gevroere off grotte kalde, inde die sporckylle waes ser warm inde ouch redelick schoen weder. Mer der somer waes ser heyt inde druge.
Item in diessen selven joer vurs. so keymptde Joest Buyck van Syttart by Eyck opten Dries thegen eynen gesellen, waes des buscups Johans van Horne dyener. Mer Jost verloer den pryss, inde heet waert lelick op gehalden.
Item in diessen selven joer vurs. so waert eyn ser swoere orloch tusschen den Hertoch van Gelre, hertoch Karle, inde den Hertoch van Cleyffve, also dat die arme landluyden opten dorpperen off landen den quatzsten coup hadden inde jemerlicken verdorffven woerden aan beyde syden.
In diessen selven joer vurs. so waert groette sterft van pestilenciën boeven in den lande, inde sunderlynghen in der gueder staet van Collen.