Blader door transcripties » Lokale Kronieken uit de Nederlanden 1500-1850

archieftoegang 1507_Beek_Trec, pagina 37

Item in dyessen tyde off joere vurs. so waert der arme huyssmaen off lantmaen ser swarlicke geschaet overal, in allen landen. Mer heet waes ser guede tyt in allen dynghen des men leven moest, aen wyn, aen broede inde desgelicken.
Item men galt wael in derre tyt, te wylle, eyn trichtter mudde roggen, XXIIIJ vaet, vuer twe bescheyden eynckel goltgulden, off IIIJ hoernssche gulden. Inde due galt eyn eynckel gulden XL stuyver, off twe currentgulden inde eyns horns gulden, inden landen van Ludick, Tricht, Ruremonde etc.
Item men galt ouch ghemeynelick te Tricht, inde hyr omtrent, XVJ quartten guetz wyns vuer eynen eynckelen gulden inde XV , inde also van den beystten rynsschen wyn. Also dat in disser tyt off jaeren vurs. redelicke wael stonden diesse landen, inde egheyn gebrecke mer en waes onder geystelicke inde werltlicke, groet inde cleyn, daen die vreysse Gotz inde gottelicke wysheyt onder alle regerres (Got ontfarmps!) inde erbarheyt van leven onder die pristerscappe.
1500.
- Inden joer ons lieffs Heren gebuert, als men screyff die joeren, te weten dusent vyfhondert, so waes dat gulden joer te Roemen. Inde dat volck lieppe te Roemen ser starck inde menychfoldich, jonck inde out, oem die gracie Gotz inde affloet te verdyenen.
Item inden selven joer so waest eyn alte ser guede tyt in den broetkorne. Also dat men galt XIJ Trichtter vaet rogge, oem eynen eynckelen bescheyden golden gulden. Dat waes J vaet rogge vuer IJ stuver off IJ rader wysspennynck inde noch mynder.
Item in diessen tyde inde joere vurs. so waes grotte ongenuchtte in Braband mytten gelde, off mytten montten.Also dat die coupluyden inde andere mynsschen voele ongenuchtte hadden onder mallick anderen, oem der dyeffveryen wylle inde quades gelts, dat die Heren inde regeres lyetten sloen off maken, oem honre grotten ghyricheyt wylle.
Item in dessen joer so dede buscop Johan van Horne, die nuwe off steynen gallighe maken buytten Hasselt, by Curinghen optter stroetten.
Item op dit selve joer vurs. so starff die Hertoch van Sassen in Vrieslant, die doer voele orloeghe hylt mytten Vriessen, inde ouch voele orloeghen hadde gemackt mytten roempsschen Conynck in Brabant, inde in Vlanderen, inde in anderen landen hyr omtrent. Got herbarmps!
Item in dissen joer vurs. so quam uyt Vranckryck, der jonge greffve van Morsse, greffve Bernart, die by VIIJ joer in Vranckryck gesetten hadde, pans vuer den jonghen Hertoch Karle van Gelre. Mer due hee hyr int lant quam, so mocht hy, noch en konde hy, nyrghent op egheyne van synen sloetten off in steden koemen, die synen alden vader tue ploeghen te gehoeren, greffve Vyncentius van Morsse. Inde dat kerde die Hertoch Wyllem van Gulick, dee die sloten inde steden syns alden vaders in gelouffve inde in guede betruwen in genoemen hadde te bewaren, in behoeff des jonghen greffve Bernarts vurs. als: Morsse, Krackouwe, Bruggen, Wassenberch, Borne, Syttart, Susteren. Inde hee en mocht nyrgent in, noch nyrgent op, inde onthylt hoem by den Hertoch van Gelre.