Blader door transcripties » Lokale Kronieken uit de Nederlanden 1500-1850

archieftoegang 1507_Beek_Trec, pagina 33

Anno XCIIJ due starff Fredericus der Roemsche Keysser, Maxmilians vader. Item in diessen selven joere van XCIIJ, so waes so grotte inde so jamerlicke ploeghe in Hollant, Gelrelant, Deventer etc. als van so ser voele inde ontellicke muyssen, overal in huyssen, in acker, in bemptden. Also dat sy dat grass, inde die weyde al kal aff aetten, dat die beystten groet gebreck van honger leden, inde die mynsschen op hoen bedde myt ruste nyet en konden geslouppen.
1495.
- Inden joer van XCV omtrent Synte Remeysmyssen, so gesach te Dyst in der staet, groet jamer inde drucke. Inde dat indiessen dat die Hertoch van Guylick, den Dyst due tertyt tue behoerde, dat doer waes twedracht inde ongenuchtde inder staet onder die burgher, tusschen den Here inde die gemeyntten; inde dat due sommyghen die guet Hers woeren, die wolden der gemeyntten rechtten of privylegien waet affnemen inde hoen verkortten aen hoen alde costuymen off gewoentten, inde dat en hadden die sommyghe van den alden burgeren nyet gherne, inde wederstonden so sy beyst mochten myt hoessheyt inde ouch myt rechtten. Also dat die andere partye honnen wylle off begertte hoens vuernyemens nyet en mochtten tue koemen, noch duer dryeffven. So clachtden sy dat des Hertoghen marsschalck van Gulick, eyn rydder, Her Hoempes den sy te hulppe hadden. Ende die onderweyss Hertoch Wyllem van Guylick doer tue dat sy sych sterck macktden al heymelicke, inde quamen al bedeckt, des smorgens ser vruch in de staet, inde men halp hoen al heymelick in, als die guede luyde noch eynsdeyls op hoen bedden loeghen, inde mytten selven die trumputten opgestoten, inde die doeren myt gewalt opgeslaghen, inde die guede burger, die sy krighen konden, gevanghen inde opten merckt geleydt als dieff inde morders, sonder eynich toeffven off merren off vonenysse van recht. Den scharprychter bevoelen, inde also tot IIIJ erbariger, guede mannen woerden doe jemerlicke gedoet sonder scepen ordel, doeroem groet drueffenysse waes in de staet onder honne vrunden. Inde doeraff so is noch eyn quade gruytte, eyn heymelicke haet, eyne twepartydicheyt in de stat van Dyst; dat te besorghen is, dat noch nyet balde doeruyt koemen en sal, noch vergetten werden. Got bettert. Het en docht nyet metalle van den Hertoch van Gulick .
Inden joer van XCV, so syn naer Maeseyck vertrocken die Jouffvrouwen off mechtden, die tot Kynrode, in Keyssenick aller erstwerff, hoen erste begynsel aen genoemen hadden off begonnen tot derre plaetsschen, inden joer ons lyeffs Heren, due men screyff dusent CCCC inde LXXVIIJ, inde doer soetten, inde meynden Got den Here in rusten inde in vreden te dyenen, also guede erbarighe, relioese Jouffrouwen off geystelicke mechtden schuldich syn te doen. Inde die ongeluckighe tyde der orloeghen hoen also leystich inde ser verdrietlicke vyelen, inde also voele overloups inde versuecks hadden inde leden van den Ruytteren, Garde, Boeffven, die deur die landen lieppen inde den gueden luyden dat hoenne noemen, duer die noet, laest inde lyden, dat sy doer lyden moesten, want sy doer al bloet laeghen aen der heyden inde egheyn verantworde van nyement en hadden oem hoen te beschudden; so hobben sy Got inde die hulppe der gueder mynsschen te hulppe ghenoemen inde hobben bennen der staet van Eyck eyn plaetsche gegolden, inde hoen cloester off convent te Kynroede affgebroecken inde by hoen te Eyck in gevoert inde doer opgherycht inde begonnen anno XCV .Inde diesse Jouffrouwen syn vander Heyligher Orden vanden Heylighen graeffve ons lyeffs Heren te Jehrusalem, die dee swarte mantels draghen inde eyn roet dubbel cruytz doer bennen, inde eyn wyt lynen rocket sonder nouwen doer onder. Inde sy syn canonicken der Heyligen orde vurs.
Item in dyt selve joer van XCV so waes Maxmilianus der Roemssche Konynck te Trycht, inde doer quam tot hoem der jonghe ertshertoghe Phylips syn soen; inde dene ontfynck hy erlicke buytten Tricht, int velt bij den Doutzberg. Inde doer waes grotte feyst buytten der staet int velt, inde due toghen sy te samen in die staet myt menyghen edelen maen.
Inden joer ons Heren gebuert MCCCC inde XCV due kreghen die brueder of Heren van Synte Odylienberghe, by Ruremunde, (canonicken der Heyliger orden van den heylighen grave ons lyeffs Heren te Jehrusalem, die eyn dobbel roet cruytz draghen op swartten mantels,) die capelle opt Cruytz by Slenich van den pastor off pryester dess sy waes, inde orloff van den buscop van Luydick, Her Johan van Horne; inde begonden, inde mackeden aldaer eyn cloester off convent van honnen orden vurs. Inde der pastor heyt Her Ghielis, inde waes eyn werltlicke prister inde toch die cappe aen, inde waert eyn here off canonick van honren orden, inde bleyff op syne capelle inde halp dat closter begennen inde buwen .
Inden joere van XCIIIJ, omtrent Andree apostoli, due woerden die predickbrueder off dat predicker cloester bennen Trycht erstwerff gereformert inde wederoem bracht totterreformacie, die ser reuckeloesse van leven ploeghen te syn er sy totter reformacie quaemen. Terstont hyernoe anno XCV, als die reformacie te Trycht int predicker cloester koemen waes, so quaem sy ouch te Loeffven, in dat predicker cloester. Inde dit deden off bedreffven die predicker brodere van Aken.
Inden selven joer vurs van XCV, so waert dat cloester te Wyttenvrouwen, te Tricht ouch reformert, dat aen den Vrythoeff ligdt, inde ouch erstwerff wylde wytte nonnen ploeghen te syn.
1496.
- Inden joer van XCVJ, so lietten die Jouffrouwen off Susteren van der Nuwerstaet, bij Syttart, van den Heyligen orden des Heyligsgrafs ons lyeffs Heren van Jherusalem, die die swarte mantels draghen, gelyk die van Eyck als vurschreven steyt, ouch oem der ongenuchtden wylle der orloeghen inder groetten schaden inde laest den sy aldoer gehaet inde geleden hadden vanden bouffven off quaden volcken inde ruytteren, hoen cloester off convent ter Nuwerstaet, dat sy ouch in kortten jaeren aldoer erstwerff aengehaeffven off begonnen hadden inde van Kynrode aldoer koemen woeren; inde noemen myt hoen dat sy mochtden inde hadden, inde toeghen bennen der staet Luydicke, inde kreghen aldoer eyn plaetsche off alt cloester, doer die regulieren in ploeghen te woenen, er sy te Synte Lenartz opter Maessen toeghen; due vercochtten sy die plaetz inde die Cellebroders kregen sy. Inde van denen bruederen kreghen sy diesse Jouffrouwen vurs. inde syn doerin getoeghen.