Blader door transcripties » Lokale Kronieken uit de Nederlanden 1500-1850

archieftoegang 1507_Beek_Trec, pagina 30

In dat selve joer van LXXXIIJ so waes der groette moert inde ellendich jamer tot Peer in de Kemppen, van den armen huysluyden, die doer so jamerlicke doet geslaghen inde vermort werden van den Brabanderen.
1485.
- In den joere van LXXXV due starff die princesse, vrouw Maria, Hertoch Karles dochter, des roemschen conincks Maxmilianus erste huyssfrouw, Hertoch Philippus moder, dat groet jamer waes.
Doernoe als diesse ve inde orloch alsus scarpe inde swoer waes tusschen diesse partyen vurs. te weten den buscop van Luydick, inde Her Wyllem van Arenberch inde die Luydicker die honnen gerechtichen Here buscop van Luydicke Here Johan van Horne nyet lyeff en hadden, so waert byder gracie Gotz inde der gueder Heren eyne soene inde eyn vrede gevonden inde gemackt by grotten luyden raet inde hulppe, als hertoch Wyllem van Guylich, Greyffve Vincentius van Morsse, dee eyn rechtte oem waes des edelen Heren, Here Johans van Horne, inde noch voele andere groetten inde edelen Heren inde steden tusschen diessen partyen. Also dat die lantschappen ser blyde woeren inde woenden inde meynden ommer guede vrede te hoebben inde hoen broet myt Got inde myt vrede te wennen, inde in rusten te leven. Och lassy! nyet langhen tyt hyrnoe so begoen eyn quaet werck inde eyn ongeluckich spel wederoem op eyn nuwe, doer alle diesse landen vurs. te gronde oem verdorffven woerden.
In den joer ons lieffs Heren gebuert due men schreyff MCCCC LXXXV des XVIIJden dachs in Julio te wetten op synte Gervasius inde Protasius avent, so hadde die edele buscop Johan van Horne eyne broder, den men hiet Fredericus von Montegys , inde dee quam noe in diessen tyden der soene vurs. te Synte Truyden bennen gereden, inde waes Her Wyllem van Arenberch vurs. vruntlich van buyten sonder meynen, inde van bynnen vals, inde spelde myt hoem in genuchtde, also dat scheyne. Inde Her Wyllem en hoede hoem nyrgens vuer, inde sy reden te samen al spelende uytter staet van Synte Truyden, int velt vlieghend inde vrolyck synde. Inde due hoem Montegys verre ghenoch uytter staet hadde inde hoem te starck waes van knechtten, so styt hy ten van synen perde, doer hy op saet, al bars , sonder sadel off sonder lerssen, in syn bloet wambaess, in synen mantel sonder wappen; inde nam hoem also gevanghen sonder eynich opwerppen van kyffve, inde voerden also mytter haest te Trycht bennen, inde des nachts die heren of scheppen van Trycht vergadert, inde des smorgens aen den Vrythoeff by den Pyroen synen hals affgeslagen, inde syn lychaante Pretgeren begraven. Inde dit geschach due op eynen vridach anno LXXXV; dat den Hornschen eyne ewyghe schande waes.
Van wyllighen doede inde ontruw due der alder quaetste orloch wederoem opstonde, dee noch jee geweyst hadde. Want Her Everart van Arenberch Her Wyllems broder, Her Robrecht inde alle die geslechtten van Arenborch woeren ser verstort inde verboest oem diesser groetter ontruwe inde ongelouffven wylle, den due geschiet waes aen Her Wyllem vurs., inde kreghen Luydick wederoem in, en orlochtden due op allen landen inde en ontsaghen Hertoch van Brabant noch buscop van Luydick. Inde by hoen sloeghen inde quamen uyt allen landen, die allerquaetste inde snoetste boeven die men veynden mochtte. Dyeffven inde morder inde verbannen boeven die nyrgent en dochtten, die woeren by hoen ser wyllekoemen, inde onthalden inde verderffden due te gronde alle dys landen hyr omtrent, dat lant van Luytgen, van Loen, van Lutscheborch, van Dalheym, van Valkenborch, van Borne etc. Also dat eyn ser bedruckte tyt waes overal mytten armen huysluyden en den lantman. Inde nyemant en waes, noch groet noch cleyne, dee dyt kerde of wederstonde. Inde sy dreffven alle honnen wylle over al, myt vanghen, myt bornnen, kyrcken, cluyssen, gotshuyssen sonder barmechticheyt. Inde alsus stonde dyt regiment eyn langen tyt, dat die landen al verdorffven woerden.
1486.
- Inden joer van LXXXVJ due quam te Syttart in onsser Vrouwe kyrcke die toffel mytten Mariabielde. Int joer van LXXXVIJ due sande Gort Beren te Syttart, dat Mariabylde die kroen int myddel der kyrcke, mytten Ingelen inde synte Katheryne toffel. Int joer van XCIIIJ due quam synte Peters bylde te Syttart int myddel van der kyrcke.
Item in den joere van LXXXVJ due begann erstwerff dat Jouffrouwe closter bennen der Nuwerstadt van den orden des heyligen graeffs, uytten closter van Kynrode.
Inden joere van LXXXVI due laeghen die Arenbergsche op Stockheym inde deden ser voel quaets alomme inde omme inde sunderlynghe inden lande van Valkenborch, van ruyteren, van rouffven, vanghen inde doet sloen. Inde due bleyff Gielix Kops doet in de Graetheyde, dee noe gelouppen waes. Got trost syn zeele.