Blader door transcripties » Lokale Kronieken uit de Nederlanden 1500-1850

archieftoegang 1507_Beek_Trec, pagina 29

Terstont doernoe, in kortten tyden, so waes Her Wyllem van Arenberch ser thornych, dat myn Her van Ludick Synte Truyden in hadde, inde toch doer vuer, en woude sy krachtlicke wennen. Mer der edele Her Johan van Horne myt synen vrunden waes selve doer bennen inde beweyss sych als eyn stoutte leuwe, inde hylt sych herlicke als eyn vroem prynsse in allen den storme, dat sy soe crachttelicke schoetten; inde stormpde selver mytten lyffve by synen vrunden inde guede burger van Synte Truyden. Also dat sy allen hert inde stoutten moet kreghen, inde behyelden die staet; inde die Luydickers off Arenberchsche toeghen ewech myt schaden inde schande inden joer vurs.
Allet in diessen onsalighen tyde, als dit volck vurs. dat huyss te Stockheym in hadde, inde doeruyt ser groetten schade inde verdriet dede inden lande van Valkenborch, Beyck, Merssen, Geleen, inde dat dorp van Lout by Stockheym branden, so syn sy subtyl geweyst inde synt ser styllinge in der nacht al heymelick komen myt sommyghen verrederen van Eyck, inde stoelen inde wonnen Eyck inde kreghent in, inde deden due doeruyt groeten schaede inde verdriet in allen plaetschen, in den joere ons Heren vurs.
Inden joer ons Heren MCCCC inde LXXXIJ in die quater tempel weyck vuer Korsmyssen so hadden die burger van Trycht, die groette nyeder laege inde grotten schade vuer Sychem. Allet in diessen onsaligen tyden der orloeghen so hadden die Luydicker off Arenberchsche eyn cleyn sloetghen by Trycht in kreghen, inde loeghen doerop, inde deden denen van Trycht, ser groetten laest inde schaede tot Trycht vuer der portte, also dat sy nauwelicke buytten der staet duerfften goen vuer diesse boeffven inde quat volck te Sychem. Ten leystte so toeghen die van Trycht mytter macht inde burgeren van honre staet inde myt busschen inde geschuytte vuer Sychem, oem dat te wennen inde aff te werppen. Inde als sy doer vuer loeghen, so vernaem her Everart van Arenberch dat, inde vergaderde syn quaet volck bennen Ludicke, eyn groette houppe, inde toeghe uyt Ludick, oem syn vrunden op Sychem te ontzetten inde bestant te doen. Inde als die van Trycht dat vernoemen, soe woerden sy doeraff ser ververt, inde braken op inde vluwen ewech noe Trycht. Inde hoen vyanden kreghen moet, inde vervolgden sy herttelycke ser, al vluwende inde al louppende tot by Trycht aen der portte, inde vyngenter voele inde deden groeten schade onder die guede burger van Trycht. Men sacht dat doer voele doet bleyffven inde verslaeghen woerden, mer dan VJ off VIJe maen, die sy des anderen dachs doet mytten waghenen in haelden myt groetten drucke inde lyden. Indemallicke socht synen vrunden onder die doeden inde begroeffven sy myt groetten rouwe, drucke inde byttere lyden.
In den joere van LXXXIJ so waes der grote slach inde bloetstortynghe vuer Hoelen, inden lande van Luydicke tusschen die Brabanders inde die Luydickers; inde die Brabanders logen boven inde versloeghen menighen Luydicker, in den stryt inde inder vlucht al vliënde tot vuer Luydicke by der portte. Inde doer bleyff ouch doet inde verslaghen Her Gerrit van Somberff, due tertyt eyn lantcommendeur van den Byssen. Heet hee in syn cloester bleyffven, hee mocht noch leven.
1483.
- Inden joer van LXXXIIJ, LXXXIIIJ inde LXXXV so stonden op te Hasselt in dat susteren cloester van den derden Regulen eyn ellendich jamer inde ser swaer drucke inde groet lyden van twist off twedrachtigheyt, also dat sy verscheyden inde gedeylt woerden in twe partyen. Inde dat quam hoen tue duer die Observanten die noch tertyt hoen visiterders woren. Inde der gardiaen, due tertyt aenden Lichtenberch, myt noeme geheytten broder Henrick van Elteren, dee waes sweynde inde ser hoverdich, inde begonde den pater der susteren te verdrucken inde te verachtten, inde ouch mer andere dynghen; inde des en wolde der pater also nyet lyden van hoem, noch ouch die moder mytten anderen alsten susteren. Inde also worden sy in twe partyen, die eyne mytten pater inde die anderen mytten bruederen. Also dat eyn serquat werck doerin op stonde onder hoen, dat sy ten lesten sych scheydden inde van eyn toegen tot Luydick .
Inden joere van LXXXIIJ due begon erstwerff dat cloester bennen Eyck der Regularissen achter die groette kerke, dieerstwerff doer buytten hart aen den muyrren ploege te liggen er sy aff verbrant woerden .
In den joer van LXXXIIJ opten XVI dach van Sporkylle, te weten op Synte Julyanendach, der heyliger jonckfrouwe, die due tertyt quam opten groetten vastavent, off den ersten sondach van de vasten, so waes allet in dyesse tyde so groette orloghe inde yamer in diessen landen van Luydech inde van Loen, als voele vors. steyt, inde die Arenberchsche off die Luydicker hadden dat stetdge Bylssen in, inde deden doeruyt groette schade den Hornschen volcke inde der staet van Trycht. Doeroem die edele buscop Johan van Horne, hulpe kreygh in Brabant inde aen die staet van Trycht, inde toeghe vuer dat stedgen Bylssen myt menighen stoutten maen inde myt syn broder, greyffve Jacob van Horne , inde bestormpden dat stetgen herlich inde crachtelicke, inde doer werd der greffve Jacob vurs. rydder geslaeghen. Inde die van bynnen werden hoen herlicken inde wederstonden symelicke, mer ten leysten so woeren hoen die maen van buytten te stercke inde te mechtich myt luyden; inde woennen dyt arme stegge myt grotten macht aeff. Doer bleyff menich mynsche so jemerlick doet inde verslaeghen, inde die arme burger inde schaemele huyssluyden die doer in bleyffven woeren off in gevluwen woeren alle te saemen doet off gevanghen, inde allet geplondert inde genomen dat sy myt hoen koenden gesleyppen off gedraeghen, inde te Trycht in myt allen den rouffve inde gevanghenen. Inde myt den selven due dat vuer doerin gesteken inde te gronde kael affgebrant, also dat doer nyet in en bleyff staen dan alleyn die kercke. Doer waes jamer boeven moete groet. Ich hoerde diegheyneseggen die doerin woeren inde die dat saeghen, dat doer doet laeghen opter straette inde in allen hoecken mer dan XIIJ hondert mynsschen te begraeven. Och Got herbarme der zeelen!
Alsus waest noch allet eyn ser swoer orloghe tusschen Her Johan van Horne, buscop tot Luydicke, inde Her Wyllem van Arenberch vurs. Ten leste doernoe nyet lange so wart gesont tusschen hoen beyden. Mer leyder die soene wart qualicke gehalden; doer voel jamers, schade inde ongelucks aff quam den armen lande van Luydick inde van Loen inde ouch anderen landen doeromtrent by geleghen van synen vrunden inde moeghen die dat swerlick wroecken.