Blader door transcripties » Lokale Kronieken uit de Nederlanden 1500-1850

archieftoegang 1507_Beek_Trec, pagina 25

Item voert so lerden sy inde wesen ouch van den Xde der houren alsus, dat men due sal erlick inde redelicke schuldich syn te betalen nyet eyn kuyxken of eyn armot dat ecker uyt eyn vaet gesprengen konde, dat were eyn onrecht seggen, mer men solde geven inde betaelen den Xder eyn redelick hoen, dat men myt eren wael etten mocht off eynen gueden maen vuersetten mocht op syn taffel ter temlicker wys, sonder arglist. Inde oflt dat saecke ware dat die mynsschen alsus egheyn hoen en hedden te betaelen, so mach hee den Xder doe voer geven inde betaelen eynen halffven alden stuver guetz geltz, trichter paye, VIIJ velguten doe voer te geven.
Item ouch lerde sy due, eynigen hastaet die van alden tyt bevryt were myt eyne Xde hoen over L off LX off LXX joer, al were sy groet off cleyn, in redelicke wys, die solde ouch noch also in derre vryheyt blyffven inde verteyndt werden alleyn myt eyn Xde hoen, off VIIJ velguten doe voer.
Item wert dat saecke dat yemant eyn nuwe hastaet maeckte, doer gheyn gestanden hadde, inde ist eyn koetter , so en sal hee derre hostaet nyet me bevryen myt eyne Xde hoen, dan eynen halffven morgen neyst myt syn huys gelegen. Inde is die hastaet merre, doer van sal hee den Xder eyn Xdeschuldich syn te geven so wat doer in wyest. Item eyn ploger dee sal vry hobben myt eyn Xde hoen neyst syn huyss eynen ganssen morghen, inde voert is hy syn Xde schuldig van alle gueden.
Item off emant kemp macktde inden velde inde syn erff oem loecke off oem tyunde, inde wolde doeroem syn Xde vry syn doerin, dat is onrecht. Der Xder sal syn Xde doerin soecken haelen gelick op andere landen in dat velt.
Inden joere van LXXVI due waes eyn legaet, of eyn buscop van Rome te Maestrycht, inde gynck op synte Servoes dach selver myt oem inder processien, gecleyt als eyn buscop myt des buscops abyt van Luytge. Inde hee sanck selver die hoegmysse opten hoghen eltter te synte Servoes in die kyrcke, inde nae der myssen gaeff hee allen mynsschen die in stode van gracie woeren inde syn mysse gehoert hadden XL daghen affloetz. Inde hee gaeff in alle straetten, inde op allen hoecken off eynden die benediccie in manyere gelick der Paus plecht te doen, inde syn naem waes Alexander.
Item opten selve synte Servoes dach vurs. so sacht men due dat er so menych mynssche te Trycht woeren als men in VIJ joeren ye doe gesyen hadde.
Inden joer ons Heren geburt due men screyff MCCCC inde LXXVJ duc lach die fel wrede inde onsyende hertoch Karle vurs. inde orlochde op dat guede lant van Swytsschen, inde due toghen tot hoem uytten lande van Gelre VIIJe maen te voet inde die toghen duer t lant van Valkenborch te vastelavent, inde woeren gecleydt halff wyt halff blauwe.
Item doer noe ontrent in die weycke voer palme due quamen alte ser quade mynsschen inde quaet volck van natuyre halff lombarden halff walen, inde die toghen op inde nyeder int lant van Valkenborch, omtrent vuer poesschen inde VIIJ daghen noe posschen; inde doer sy quamen deden sygroette schade inde spyt den armen huysluyden. Inde sy teghen due liggen in dat guede lant van Gelre, oem dat quantsyss te hoeden, mer oem te schanden te macken inde arme luyden te verderffven. Inde men sacht dat sy waren omtrent VIIJe te perde. Alsus verderffde die ovelmodich fel inde bosse Karle voel lande inde mackde voel armer mynsschen. Inde also dwanck hee VIIJe maen uytten lande van Gelre myt groetten koeste, die te cleyden dat hoen voel kostte, die maen also uyt te lyeveren; inde due sande hee bosse inde quade mynsschen wederoem in hoen lant, inde die mosten sy due halden oem alsus te mer verderfft te werden. Inde in alle platschen doer dit volck quaem due waes groet drucke jamer inde lyden, overmytz den fellen homot den sy in allen eynde dreffven inde deden, daer sy die luyden inde dorppen mechtich woeren. Item te Ormont verdranck eyn inder Maese.
Item inden joer van LXXVJ due waes te Beyck eyn cleyn jonck mechtge koemen te woenen inde heet waes doer vremde inde onbekant, inde heet waes alt te syen, omtrent tusschen XIIJ off XIIIJ Joer, inde syn naem waes Styncken. Inde heet vermyede sych by eyn paer volcks, inde due heet aldoe hadde gewoent omtrent XIIIJ daghen due verbrant eynen gueden maen te Beyck, Hen Schepper, huyss inde schuyr aff, inde Johan Bosten schuyr. Inde heet staeck due mytten selven syns selffs meysters huyss ouch aen, inde allet op eynen dach, op synte Syxtus dach in Augusto. Inde doernoe stackt Johans Notemans schuyr aen, mer die waert geleyst. Inde des derden dachs doernoe stackt des cappellans huys ouch aen. Inde doerin woeren due selver wonaftich syn meyster inde vrouwe inde gevaren mytten woninghe, also dat syns selffs huyss te twe tyden aen staeck. Inde doerno terstont, so verheynkdet Got, dat men des gewaer waert, inde dat melde uyt brack, so wy dat dit jonck vyskeninde meytsken dit jamer al due dede. Inde due waert het gevangen inde tot Valkenborch gevoert, mer heet quam uyt, inde en docht sent doernoe nyet voele int wylde.
Inden joer ons Heren gebuert due men screyff MCCCC inde LXXVJ due waert erstwerff aengehoven inde begonnen inden somer, te herst, die cluysse te Goel opter Maese. Inde der broder die die cluysse erstwerff aenhoeff inde lyet maecken, dee waert erstwerf doerin gedoen myt groetten eren, des nesten sondachs noe des lyeffven synte Mertens dach, in October. Inde hee quam van Trycht, van Synte Peter, erstwerff te Goel, opten Goelre kyrmyssedach, inde gesaen inde baet die plaetschen inde die stede opten kyrckhoeff, doer die cluse nu op steyt. Inde die guede nagebuyr van Goele woeren doer ser lyeff inde guetwyllich tue dat meystedeyl, inde consentyrdent guetelick, inde tymmerden hoem terstont van stonden aen dat huysseken off cluysken dat doer opten kyrckhoff stoende is. Item op dit joer waes synte Mertens dach op eynen mondach, inde des sondachs doernoe, so waert der broder vurs. (syn naem waes broder Boldewynus, in Duytschen broder Bauwen) ingedaen in der cluyssen, oem syn proeffjaer te hobben van den capellaen te Goel due tertyt geheytten Her Peter Trecpoel van Beyck. Inde by hoem waeren noch twe prysters, der eyne waes der prior van Synte Odylienberghe, bij Ruremonde, inde der andere waes eyn mynrebroder, geheyten, broder Tylmaen. Int jaer van LXXXIJ liep hee uyt, halff myt orloff des buscoppen, myt cleynre eren. Inde terstont daernae quam broder Mathys daer bynnen liggen, eyn ser guet erbaer maen .