Blader door transcripties » Lokale Kronieken uit de Nederlanden 1500-1850

archieftoegang 1507_Beek_Trec, pagina 21

1473.
- Anno Dni MCCCCLXXIIJ omtrent vastavent, op synte Mathysavent in dat uytgaen van Sporkyllen due starff Hertoch Arnolt van Gelre, hertoch Adolffs vader, inde dishertoch vurss. waes derselve Hertoch, dee langhe gevanghen waes geweyst van synen soen hertoch Adolff so als vurschreven steyt in dissen boecke. Inde due diss hertoch Arnolt starff due lach noch syn soen Hertoch Adolff in Brabant gevanghen van den Hertoch Karle vurs. Inde hee wart begraven te Graffve.
Anno Dni MCCCLXXIII doe waest eyn al te vruch jaer van vruchtten, want men sach op dat selfde jaer vurss. tot Maestrycht rype kyrssen veyl opte stroette, op Synte Quyryns avent des Heyligen mertelers, de kompt des lesten dachs van den Aprylle. Item op die selve tyt, inde omtrent vanden uytgange des Prils sach men dat koeren, den rog bloeden. Op dat selfde jaer so waest eyn alte druegh jaer, sonder regen inde ser wenich boumvruchten inde grass off houwe ; wat heet stondt hedde verbrant geweyst.
Inden selve jaer LXXIIJ op ons Heren opvartsavent, so quam fel en ovelmoedigh der Hertoch van Borgonië inde van Brabant vurs. hertoch Karle tot Maestrycht liggen, inde hee lach al doe, omtrent XIIIJ daghen lanck, inde syn leger waes te Synte Anthonis inde te Bijssen . Inde due bracht hee eyn groet volck van wappen myt hoem, inde voel herwagen inde voel bussen inde steyn inde kruyt inde andere instrumenten van gewer. Inde dee staet van Syttart inde dat lant van Bornne hadden grotte vreysse inde anxt voer dit volck, oem dat heen joncker der alde greyff Vincentius van Morsse waes momber worden des lants van Gelre. Inde oem dat sy geyn hulpe, noch troest, noch bystant en kreygen van honnen joncker den greyf van Morsse, als hee hoen tue gesacht hadde, so gyngen sy den Hertoch in die hant, nochtaen dat hee inde al syn volck tot Trycht lach, inde dedenhoen portten oppe, inde baden om barmhertigheyt van den Hertoch vurss.
Daer nae des gonsdachs in die peynxtheylige daghen, te weten, des IXden dachs in junio in die Primi et Feliciani, so toch syn volck eyns deyls op van Trycht, inde toghen inde quamen due te liggen in den kerspell van Goelle opter Maessen, boven opten berch, achter eyn dorpken, geheyten Hussenberch: inde daer sloghen sy nyeder, inde sloghen daerop meynighe teynt off pauweloen, inde daer makten sy eyn groet, wyt perck vanden herwagen inde vanden bussen als eyne groete staet. Inde daernae als opten donresdachs avent, des anderen dachs als op Synte Barnabas avent des heyligen apostels due quam der vurs. hertoch Karle ouch daer in syn perck inde in syn pauweloen off teynt, inde dat waes omtrent IIIJ uyren nae de noene, inde due quam menych ewych maen inde pert myt hoen. Inde due bleyff hee al doe lyggen, van des donresdachs te IIIJ uyren als tot des satersdach daer nae inden quattertempel des smorgens vroech omtrent VI uyren; so toch hee van Husseberch op ewech achter Katscop nyeder die Heyde in al tot Montfort by Ruremonde, inde daer lacht hee sych due nyeder achter Synt Joest dat closter van den Begarden .
Item ghyr sult weten dat in dessen dorppe vurs. Gole inde Hussenberch inde voert in syn andere cleyn gehuchten inde ouch tot Elsloe inde Katscop groet overmoet inde schade gescheydde van dissen volck, want sy waeren eyns deyls quaet inde boese inde sonder bermherticheyt inde deden den luyden groet meysprys inde smaet. Inde sy schaden alte groet guet in dissen dorppen vurss. aen die edel vruchten, korn, terwe, gerst, ertten, haver, grasse inde voert aen alledeynck; so deden sy den luyden groet verdryet inde schade myt hoennen perden inde myt voerynghe inde des gelicxs inde voert aen menighen anderen puntten, doer sy den luyden groete schade myt deden.
Item daer nae als opten saturdachs smorgens inde quatertempel vurs. nae peynxten due toch der felle Hertoch vurs. op myt allen synen here inde volck, inde due toghen sy terst voer Montfort, inde dat waert hoen eyn luttel tytz voer gehalden van des Voechs soene van Ruremonde , inde terstont bennen dry daghe so gaven sy dat sloet op, beheltenysse hons lyffs inde guetz inde gelts, dat sy daerop beleynt hadden.
Van dissen vurs. sloet Montfort toch due disse hertoch Karle vurs. tot Ruremonde in die staet myt synen edelen volck, rydderschaep inde andere hoefluyden, also dat die staet van Ruremonde al voel luyden waes in allen eynden. Inde die andere ruytteren, volck van wappen inde voetgeynger die bleyffven al oem in dat lant lyggen op die dorppen inde verherden inde vernylden, inde vervorden inde verdoerffven die arme huysluyden opten lande inde dorppen also jemerlicke, soe dat Got ontfarmen mocht.
Item terstont daernae bennen dry of IIIJ daghen due toghen sy voer eyn sloet geheyten Brugge daer der Joncker van Morsse vurs. greff Vincentius, due ouch eynen here inde overste aff waes, als dat syn vader beleynt hadde in voerleyden tyden aen eynen Hertoch van Gelre inde Guylicke, inde dat waen hee ouch. Mer dat waert hoem ouch voergehalden eyn luttel tytz omtrent VIJ daghen. Mer ten leyste so goeffent die ghene ouch op die daer op waeren, beheltenysse lyffs inde gutz; mer sy hadden hoen doch rydderlycke inde herlicke gewert, inde jonckerlycke eyne wylle tytz gehalden,mer als sy saegen dat sy gheyn ontseyt noch hulp en konden krygen van honnen joncker Vyncentius vurs., due moesten syt op geven van gebrecke.
Item die der staet van Ruremunde, dat waeren die erste den gruwelden voer dyssen Hertoch vurs. inde die terst in hant gyngen mit den Hertoch vurs., want sy quamen te Trycht inde sochtten daer genade inde gyngen hoem doe in hant, er hee ye in den lande van Gelre quaem. Inde dat geschyedde opten peynxten avent, dat sy in hant gyngen inde des Hertochs peys kregen, tot onsser Vrouwen kyrcke te Trycht. Inde daer waert gedeynckt, dat sy hoem in die hant gyngen inde hoen poertten inde muyrren aen hoem golden, dat sy die ouch nyet nyeder en dorffen leggen, noch brecken, gelick als andere steden doen moesten, die hee gewonnen hadde.