Blader door transcripties » Lokale Kronieken uit de Nederlanden 1500-1850

archieftoegang 1507_Beek_Trec, pagina 20

- In den jaer ons Heren MCCCCLXXII inden loemont due sach men eyne alte wonderlicke sterre op gaen in de locht, in dee waes eyn luttel merre daen andere ghemeyn sterre, inde hee hadde eynen alte wonderlicke langhen stert , gelyck tenoe gestalt als eyn regenboeghe. Inde der sterre en scheyn nyet cloer, mer drueffechtich inde blonck dusterechtich, recht off hee benyevelt were gewest. Inde dee stert luchtte cloer, myt eynre strome lanck ewech in den Hemel. Inde hee gynck wonderlicke op, den eyne avent in oesten den anderen in westen ende in suyden, inde selden op eyne stat ghynck hee op als andere sterren doen. Sequuntur bella et epidemie in diversis locis.
Opdat selve jaer waert Her Dederych van Pallant der drosset van Valckenborch bestaet aen eyne dochter van Arenborgh, die geheyten waes Appolonya, inde men hylt die brulacht te Valckenborch des gonsdach voer synte Pauwelsdach conversio .
Item op dit selve jaer van LXXII, des dyngsdachs nae synte Pauwelsdach conversio, due starff Joncker Johan Roede van Spaubbeyck .
Inden jaere MCCCC inde LXXIJ due begaen erstwerff inde waert begonnen dat besloetten susteren cloester van der derden regelen beati Francisci, bennen der staet Bylssen,inden lande van Loen. Inde sy quamen erstwerff doer, uytten convent off besloeten cloester van Hasselt.
Item inden jaer MCCCC inde LXXIIIJ due waes dat onversyenlycke inde ser groette waetter tot Bylssen, des saturdachs snachts, nae ons lyeve Vrouwe opvartsdach, dat daer alte ser groet jamer inde schade dede. Inde daer verdroncken twe alde begynen vanden begynenhoeff, inde andere groette schaede; want die burger inde guede luyden van Bylssen en meynden anders nyet daen die werlt vergaen solde, inde dat sy alle verdryncken solden, also groet inde ongestuyr waes die vloet inde dat waetter bennen die staet Bylssen. Inde twaes eyn onversynlicke Hemelborst van water.
Item daernae int selve jaer LXXIIIJ, due waert dat sustercloester vurs. bennen Bylssen erstwerff besloeten. Inden jaer van LXXVIJ, des VIIJ dachs inden Oustmant, te weten des gonsdachs vuer synte Laurensdach, so lyetten die vurs. susteren hoen erste plaetsche, te weten dat beghynenhoeff, daer sy erstwerff hoen cloester op begonnen hadden, inde toeghen over die beicke op die plaetsche vurschreven hoen closter aldaer te tymmeren. Inden jaere LXXX soe waert der susteren kerkhoff bennen Bylssen, erstwerff gewyt, op synte Barnabasdach. Int jaer van LXXXVIIJ so waert hoen nuwe spinnekamer erst begonnen te tymmeren.
Inden jaer ons Heren MCCCC en LXXII op synte Blasii dach in februario, op eynen mondach, ten avent omtrent Complettentyt so hoeff sych eyn al te ongestuym, eysselyck ververlick weder, inde heet doynrede ser, inde het sloech groette sleghen van blyxie, inde heet was alte ongestuyr inde ongeslacht van groetten ongerackden weynde. Inde dyt weder dede grotten schade aen huysser, aen daecker inde aen beum uytter erde te jaeghen. Inde des morgens inder dageraet soe waert noch ongestuyrre van quade weder.
Inden jaer ons Heren Jeshu Christi MCCCCLXXII omtrent synte Johans Myssen inden somer, due toch Her Dederichvan Palant, due ter tyt drosset van Valkenborch, mynen genedighen Here van Bergonyë te hulpe teghen den Coninck van Vranckryck, inde hee lach in eyne staet geheyten Monteden . Inde daer worden sy bereden inde belouffen van den fransosen honnen vyanden. Inde daer verloer der drosset vurss. eyn deyl van syne vrunden inde dyeneren, inde daer leydde hy groeten noet inde vreysse van den vyanden; inde daer bleyff doet syn capellaen geheyten Her Wynant Kockeyl van Lymborch, inde Johannes Duyrtant syn scryffver inde syn reyntmeyster inde noch mer anderen bleyffven tot XIIII mannen tue; mer deren waes seer voel gequeytz inde geschotten, inde der drosset vurs. waes selver ouch duer eyn beyn geschoetten van den vyanden die van buyten die staet bestormpden inde woenen wennen myt macht; mer der drosset inde syn hulpper werden hoen rydderlyck inde vroemelick inde behylden die staet, inde der anderen bleyff ser voel doe buytten doet inden graven inde aenden muyrren. Inde dit geschyedde des dysdachs nae onsser Vrouwe cruytwyingendach te wetten op synte Agapitusdach des heyligen mertelers.
In den jaer ons Heren Jeshu Christi MCCCC inde LXXII due hoeff sych eyn nuwe delynghe inde errode inden lande van Gelre, want dat lant inde stede, inde oversten des lants hadden in voerdaghen den alden Hertoch Aret affgegangen, inde syn soen gehult tot eynen Here. Inde der soen Hertoch Adolf vynck den vader inde hylden gevangen omtrent vyff jaer lanck inde mer. Inde daer nae quam der alde heer weder oem uyt inde loess, duer hulp des Hertoche van Borgonge, hertoch Karl vurss. Also terstont daer nae so orlochde Hertoch Karl vurs. opten Coninck van Vranckryck, inde due quam hoem der jonge Hertoch van Gelre te hulppe. Mer als der jonge hertoch syn slach sach, inde dat hoem tyt dochtsyn, due ruymtde hee heymlick ewech van den Hertoch van Borgonië vurss. inde quam tot Namen inde daer waende hee wael to schep nyeder komen syn, mer die borger inde staet van Namen worden dess gewaer myt korten rede, also dat hee due gevanghen waert, inde waert due gevoert in bewaringe des Hertoghen van Borgondie. Inde der alde Heer van Gelre quant due weder oem int lant, mer syn lant inde steden en wildens due nyet hulden sonder alleyn dat quartier van Ruremonde, die leyffden als erbar luyden inde ontfynghen honne rechten Her inde leytten hem in hoen staet. In dyessen so gynghen die andere dry quartieren van Gelre tue inde hulden Vyncentius den greyff van Morsse, als voer eyn momber des jonghen hertoghen soens van Gelre, eyn ser jonck kynt van vyff jaeren, dat hee hadde van des busscops suster van Luytgen, Her Lodewyck van Borbon. Inde due hoeff sych eyn orloch tusschen den alden Hertoch van Gelre inde den Joncker van Morsse vurss. Mer der Joncker van Morsse hadde die dry quartyr te hulppe vanden lande van Gelre, inde der Hertoch hadde dat eyn quartyr Ruremonde myt syn tuebehoer, also dat sy begonden op eyn te orloghen inde te bernen.
Item op dat selfde jaer waert Guttekoven gebrant van des alden hertoghen hulpper, inde die loghen in die Nuwestaet bij Susteren. Inde terstont daernae omtrent den XIM mechtendach in Octobris, so toch der joncker van Morsse mytter staet van Syttart inde mytten lande van Born, inde myt noch voel andere hulpperen uytten lande van Gelre voer die Nuwestaet, inde sie loghen eyn luttel tyts daer voer omtrent IIIJ off vyff dagen; inde due waen hee die Nuwestaet inde quam daerin, mer heet waert van bennen verroden, also dat hee daerin (quam) clam sonder hynder off scade daeraff te lyden.