Blader door transcripties » Lokale Kronieken uit de Nederlanden 1500-1850

archieftoegang 1507_Beek_Trec, pagina 15

Item inden selve jaer van LXVII due waes der Paltsgreve te Tricht, inde lach daer op synte Servaes closter myt groeten stoette.
Item in den selve jaer vors. due toeghen die hoeffluyden inde die Rydderscap uytten lande van Valkenborch in Brabant, inde hulden den jongen Hertoch Karle tot einen Here, inde dat gelt, dat sy verterden onder weghen op die reyse, dat betalden die IIII heut benck van den lande van Valkenborch dry deyl, inde dat andere IIIIde Deyl, dat betalde die rydderschap van den lande vurs.
Item in den jaer van LXVI opten ersten dach van den Mey so waes dat schoene spel van Abraham, te Beick gespelt opten Kerkhoff, daer soe mynich menschen oem vergadert waes. Inde men sacht due, dat men tot Beick in den dorpe nye op eynen dach, also mynige mynschen en sach tot eynen tyt by eyn vergadert .
1467.
- In den jaer LXVII begonnen erstwerf die grontenten off cluppelslegers. Item werd Ludick gewonnen vanhertoch Karle van Brabant. Inde in diessen worden hyr noe beschreyffen is der datum te veynden:
Ecce nunc Leodium ceditur
Ecce quomodo sedet sola civitas plena populo.
Ouch noch anders also:
CLoVer, grontenter, CLVppeLsLeger
GY Moet sVeken eenen anDeren Leger
Item men sacht op die tyt, dat der hertoch Karl. vurs. hadde in den lande van Luytgen omtrent twe hondert dusent maen gewapent, inde noch mer die ongetelt bleven.