Blader door transcripties » Lokale Kronieken uit de Nederlanden 1500-1850

archieftoegang 1507_Beek_Trec, pagina 14

1465.
- In den jaere MCCCC inde LXV omtrent synte Gyelis mysse, due quamen die Luytger voer Valkenborch inde belachten Valkenborch; mer sy loeghen nyet dan eine nacht inde twee daghen doe voer. Inde doe vloe hoen heer inde hoen momber vurs. hoen heymelick aff in den nacht, Marcus van Baden vors. Inde als die Luytger dat horden inde vernaemen dat hoen momber hoen also heymelick aff waes gejacht inde getoegen in den nacht, van hoen ewech te synen lande waert, due wenden sy inde dachten anders nyet daen dat sy al verraden solden syn. Inde myt dene stuyrenysse so woeren sy al bedruft inde ververt, inde broken ter stont op teghen den avent, inde toghen myt groeten vreyssen inder hasten ewech van Valkenborch te Luytgen wart. Inde sy lyetten IIII alte schonre doorbussen liggen buyten Valkenborch, inde die holden die van Valkenborch en vorden sy op die borch. Inde also worden die van Valkenborch verloest, omdat die Luytger also verraden wenden syn van honnen lyeven momber; inde doer myt so toeghen sy ewech inde en loeghen mer eyne nacht doer vuer, also dat Got versach.
Terstont doer noe op synte Cornelis avent off op der Heyligen Cruyts avent due scheyn die sonne also jemerlich inde also blodich, gelick doen hedde sy myt blode besmert off bestreken gewest. Inde dit waes al te jemerlick inde bedroft aen te syen. Inde dit duerde omtrent II dach .
Opten selven jaer LXV terstont daernae due die Luytger van Valkenborch waren getoghen, due toeghen sy ouch voer dat steytgen off sloet van Lymborch, mer sy en kondens nyet gewynnen inde toghen doer aff, inde lyeten Lymborch in synre eren. Inde due waes doer eyn borchgreve op, de geheyten waes Her Dederick van Bortscheyt.
Item op dit selve jaer bleyff eyn rydder doet onder die van Tricht voer Gellick hyet her Gyel de Hoe, inde waes van Luytgen, mer hee hylt teghen syn lant mytten buscop Borboen.
Item op dit selve jaer van LXV due laeghen voel Ruyter te Tricht, inde roufden op dat lant van Luydeck inde van Loen, inde deden grotte schade uyt Tricht langs die Mase op inde nyeder, tot Eyck tue inde tot Stockheym.
Item op dat zelfde jaer due werden die van Eyck herslagen by Eycke in den velde, doer sy trecken solden int heer van Hasselt, inde dat deden die van Tricht: inde die Ruytter die daer bynnen Tricht laeghen, inde die Ruytter van Valkenborch hadden op dy tyt den prys inden velde voer eynighen anderen ruytteren die due daer waeren.
1466.
- In den jaere ons heren dusent CCCC inde LXVI due starff hertoch Phylips van Borgonie, hertoch Karles vader, op synte Vyts dach, te Brugge, inde hy waert begangen inde verluydt myt allen clocken in den lande van Valkenborch, in alle kyrcken, omtrent onse Vrouwe dach Vysitacio, inde hee waert te Beick begangen des sondachs nae synte Mertens dach translacio, inde men verluyde hoem dry daghen lanck achter eyn, inde alle daghe dry poesen, inde eyne poese durde eyn geslagen uyr lanck. Die erste pose waes des smorgens te VI uyre al tot VII uyre tue, indedie andere poese te X uyre al tot XI uyre tue, inde die vyrde (sic) pose te iiii uyre nae noen al tot V uyre tue. Inde also verluyde men hoem alle dat lant van Valkenborch doer in allen kyrcken.
Inde men sanck hoem eyn schoen zelmysse inde eyn vigilie myt IX leyssen, inde der kyrcken kertschen die branden vuer syn zeel. Inde men en gaff nyemant yet, pape noch offerman, noch den luyden die voer syn zel luyden, men en hadde hoen nyet ein quart kanke te dryncken gegeven. Mer der bode inde der onderbode die moesten luyden. Inde hee werd begraven te Dyon in Borgonyen, inde due waert syn soen Karle hertoch van Brabant.