Blader door transcripties » Lokale Kronieken uit de Nederlanden 1500-1850

archieftoegang 1580_Antw_Wese, pagina 5

en consuatie vander op Rechter Religie Justicie Ruste ende
Tranquilliteyt, van dese landen tegens zoe veel aenslagen ende
practicken alrede zijne Mat zoe veel gecost heeft, Ende
dat voor den toecomenden tyt van noode es te versiene, Dat
bij gebreke van tzelve te connen vervallen ende op bringen men
wederomme niet en vallen in eenich meerder Inconvenient
soe wel door Die boose aenslagen ende voornemen vande
voirseyde Rebelle verloopen, fugitive ende bannen vuijt zaken
vander beruerte voirseit, als oick Deur heur aenhangeren ende
andere quaetwillige, Is Daeromme gansselick van noode goet
tyts bequame middelen te soeken, ende vinden om tselve voor
te comen ende beletten die welcke principalyck procederen.
ende Dependeren vuyt Die hulpe van sijner Mats goede ende
getrouwe N vassalen ende ondersaten
Nu dan mijn heeren zij u kennelyck de groote
ende
vuytnemende costen
die wijlen hooch loflycker gedachten Die keijser kaerle die vyfste
des Naems, wiens siele God genadich es, mitsgaders sijne Co: Mat
ten tyde vanden voirleden oirlogen hebben moeten Dragen tot be¬
schermenisse vanden voirseiden landen van herwaertsovere te¬
gens die gene Die de zelve wilden hen vervoerderen te overvallen
Innemene Innenemen ende onder huere heerschappie ende gewelt
bringen, twelcke Die oirsake es geweest Dat die Demeynen soe
na verpandt, beleent, verset ende belast zijn Datter weijnich resteert
daer mede men zoude mogen behulpen, Wesende oick alle beeden ende
subvencien geexpireert, daermede Die benden van ordinan. ende
garnisoenen zouden mogen betaelt, ende die perden, geschut munitien
ende andere nootlycken den versien, onderhouden ende gefurniert
worden, Bevindende Daer en boven Die achter stellen zoe groot,
dat de zelve tot vuytnemende somme beloopende zijn, Sonder daer
Inne te begrijpen tgene dat syne Mat duer die sunderlinge affectie
die hy dragende es tot hulp ende bystandt van syne goede ondersaten,
Zeder zijn leste vertreck na Spaengnien liberalycken vuyt gereijct
heeft om die lasten van herwaertsover te helpen Dragen, mits¬
gaders zoe veele legioenen Die zyne Exce alrede gecosticht heeft In
syn reijse ende voiaige ende int onderhouden van het Oirlochs volck,
om die aenslagen vande Rebelle ende Sectarisen voir te comen ende beletten,
Die zouden het gantsche lant bedorven, geruyneert, ende tzelfde in confusie
gestelt hebben oft anderssins zouden alle goede ende Catholicque per¬
soonen, Willende hen wreede ende Tijrannissche handen ontcomen gedrongen
zijn geweest hen in sulcke afgrijselicke Heresien, Dwalingen ende
Ketteryen metten zelven te verworpen oft hen landt te verlaten
en hen in exile ende bande te houden, Mits welcken, mijn heeren gemerct
dat zije
fol II
dat syne Mat de macht nyet en heeft omme u voorden by te staene
ende assisteren met syn Demeynen, ende dat De affairen van zijne
andere landen, nyet langer en connen vervallen, ende op bringhen
vuyt die Tresorijen ende Innecomen van Dien tgene datmen behoeft
totten nootlycheden van herwaersover, zoe oick geen redene en es,
dat Deen Lant altyt de lasten Dragen zoude voir Dandere Soe yst
gansschelyck van verde eenige middelen te vinden om die schulden
ende achter stellen boven geruert te zuijveren ende De voirseyde
Demeijnen t ontlasten ende te redresseren, Ten eijnde datmen Daer
mede in toecomenden tyt die ordinarise lasten vanden staten van
desen landen zoude mogen sustineren ende onderhouden, Wesende meer
dur doirbillick Dat dese voirseide Landen Daer toe assisteren,
en hem selven helpen,
Ende heeft eenige wel gedocht datmen
voir zoe veel alst aengaet die vooirseide sculden ende achterstellen raet
ende middel zal mogen vinden, der gemeijne welvaert nyet hinderlick
wesende, om een goet deel vande zelve achterstellen af te leggen, zoe
verdemen eenige merchelicke somme van gereede penningen hadde
te vinden by maniere van een bede, om de voirseide middelen ter
executien te stellen, ende De sculden alnoch op faut ende Interest loopende
tot voldoen, mitsgaders oic De Crychslieden eenige betalinge te
Doene, ende met eenen wegen te bezien hoe datman enich Jaerlijcx
Incomen zoude mogen vinden ende opstellen in plaetse van demeijnen
ter tyt toe Dat op de groote nootlycheyt van zynen Mt versien ende
geadviseert sal wezen, om Inde voirseide lasten nyet eeuelyck te blyven
Soude Insgelijcx wel van noode wesen Jaerlycx enige penningen In
depost ende espargne te stellen ende te leggen tot enich Tresor, ofter
eenige nootlycke affairen overquamen t Welc God verhoeden moet
ende sonder oick voir een provisie Diemen tegens een onversichtighe
persuasie oproer oft commotie van doen hebben mochte.
Ende hebbende sijn Exce Doen examineren alle middelen daermede De
Landen hen hier voirmaels beholpen hebben, om een merckelycke somme te
vinden, ende opbringen en heeft geen beter ende gevuechelicker connen
gevinden dan tgene Dat zijne Mat tot zyne afcompste heeft doen
voirhouden ende proponeren, twelc waere den hondertsten penning
voir een reijse, van allen Roerende ende Onroerende goeden, Wesende
het rechtveerdichste ende gelycxste betalen, daerinne eenen yegelyck
na zijn macht ende faculteyt sal moeten contribueren weerende
alle voirdeel van Deen Landt tegens dander, besnydende ende ver¬
worpende oic alzoe alle Disputatien die tanderen tyden gedaen ende
gemoveert zijn geweest, Dat deen meer dan Dander bezwaert was,
Twelc Dicwils groote veranderinge ende belet causerende es, Int accorderen
vanden varen, beden ende hadde zijne Mt alsdoen eenige middelen doen
beworpen