Blader door transcripties » Lokale Kronieken uit de Nederlanden 1500-1850

archieftoegang 1580_Antw_Wese, pagina 6

beworpen daer mede genoechsaem scheen versien te syne tegens tgene dat
men aldermeest vreesende was, dat Den Rycdom ende armoede
respectivelyck behem zoude syn, Ende bemerckende zyne Exce dat t voir¬
zeyde middel doen ter tyt geenen voirtganc en hadde, mits dat het nijet
genoech verstaen en was, heeft al tzelve van nijeus doen examineren,
ende
zoe
claer stellen datmen geen wettige oirsake en behoirt te vinden, om
eenen aftreck Deshalven te hebben maer bekennen Dat die zelve het recht¬
veerdichste ende redelycxte middel, gelyck het selfde claerder sal mogen
blijcken by de scriften Daerop gemaect die u metter propositie ge¬
geven sullen worden.
Ende belangende de Jaerlycxe onderhoudenisse vanden ordinarisen
lasten vanden Staten van Dese landen, daer toe die Demeijnen plagen
te Dienen met een gracieuse beede, diemen hielt dordinarise, gemerct
die zelve Demeynen nu failleren ende dat alle beeden zoe voirseyt es,
geexpireert, ende die lasten Jaerlycx gemeerdert zijn, zoe en zoude
men de affairen nijet connen onderhouden ende sustineren hoewel datmen
tzelve alsoe scherp aenlede ende
alst mogelyck waere
sonder eenige garde ende geduerige bede ende Inbuere, Op twelc
syn Exce lange gelet ende gedelibereert hebbende, Heeft eyntelyck
geen ander gelycke, ende Der gemeijnte minst scadelyck connen ghe¬
dincken oft connen excogiteren, Dan Datmen zekere Impositien stellen
soude op alle vercopinge, Daer van Zoe wel van Roerende als on¬
roerende goeden, tot laste vanden vercopere, Daervan sal het ap¬
parentelyck schynt comen ende procederen zoude een somme van penningen,
Die totter voirseide nootlycheijt van desen Landen behoevende es, ende
soude men oic sulcx verhoeden ende voircomen de Disputatien ende alte¬
ratien die Deen landt oft staet meer belast es Dan Dandere Ende
zouden daer Duere Die steden ontlast mogen werden vande contri¬
butien, Die zij onvedrachelick vinden, ende om De welcke De zelve
bedwonden worden, die gewonlicke gratie te versoeken, Mitsgaders
t plat Lant twelc men siet verarmen overmits Die sware lasten Die
Daerop gestelt worden, gelyck ghy naeder zult mogen verstaen bij
seker ghescrifte, twelc men u oick overgeven zal, Doende de zelve
Impositie qualick heffen, ende lichten, Ende al waert oick alsoe dat
enige quaetwillige hem Daertoe nijet en zouden willen verstaen
oft daerna hoiren, maer liever daer tegenseggen, ende tzelve calumnieren,
soe en can nochtans zijne Mat nyet onder laten, om die affectie Die
de zelve tot synen landen ende ondersaten dragende es als van zoe langen
tyt aen zijn ende syn voorvaderen huys geweest hebbende, alle gevuech¬
elycke wegen te zoeken omme de selve te assisteren, persevereren ende
wederomme in huere Ierste prosperiteyt ende voirspoet te stellen
daer Inne die waren voir desen Trouble ende beroerte. Ende tegens
die onverstan
fol III
die onverstandige ende hertnechige, die nyet en passen oft achten op
tgene dat tot huere welvaert Dient ende behoirt te gebruken d outo¬
riteijt die onse heere God zijne Mat gegeven heeft, om De selve opten
rechten wech te bringen, Ten eynde Dat duer huere obstinaetheyt ende
hertnechicheyt de goede ende getrouwe ondersaten nyet te lyden en hebben
daer toe zyne Exce versoect dat ghij mijne heeren wilt behulpich
wesen, ende tzelve Den anderen, zonderlinge Den genen Die tot u deser
dachvaert ende vergaderinge gedeputeert ende geschict hebbende, Sulcx
aengegeven Induceren ende onderwijsen, dat zij hen by gouden accorde
daer naer vuegen ende tot fornieren wille, nyet twijfelende na
Dijen ghij weet hoe nootzakelick Dattet es, sonder datment in eeniger
manieren mach excuseren, ende verstaet dat zynder Mat meijninge ende
Intencie sulc es, den mont stoppen zult allen Den genen die Daer
Inne enich letsel souden willen voirtskeeren ende sult middel
vinden om tselve effectueren, met zulcker vliet ende neertstichede,
dat syne Exce nyet veroirsaect en worde Daerinne te versiene,
Maer Dat De zelve met goede redene synen Mt getuychnisse
mach geven, Dat ghy deselve affectie alnoch houdende zijt die
ghij hier voormaels tot hemwaerts ende totten Lande altyt ghe¬
dragen hebt. Ten eynde Dat Daer duer syne Mt te meer genegen zij
te vergeten tgene Datter gepasseert es, aengaende de ghene die hon
misdragen ende hon In huer Devoir luttel gequeten hebben, ende volgende
zyne gewoonlycke genade ende goedertienheijt syne goede ende getrouwe
Vassalen ende Ondersaten altyts hoirde in zijne gunstighe pro¬
tectie ende behoedenisse.
Aenden Coninck
Remonstreren ende verthooren In alder oetmoet d Riddersscap,
Edelen ende Steden van Hollant ende Zeelant sijne uwer M t
ende uwe Mts voorvaderen hoochloflicker memorien, altyts hebben
gehoirsaempt, gerevereert ende gedient als goede getrouwe ondersaten
in allen saken, daer tot conservatie van uwe Mts hoogheyt, heerlicheyt
ende Dommeynen huere gehoirsaemheyt ende onderdanigen dienst gere¬
quireert es geweest, Sulcx sij lieden nyet en twijfelen uwe Mts
goede affectie thuerwaerts te meer Daer duer gewassen te zijn,
om henen ander goede Justicie ende Policie In huere gerechticheden ende
vrijheden, met alder Rust ende vrede te behoeden ende te beschermen,
conform den welcken, hoe wel den Hertoge van Alva, es voor
uwe Mt Gouverneur, hem behoirt hadde gevoecht te hebben,
heeft hij nochtans onder Den Tytele van syn Gouvernement
met alle Iniusticie ende fortte over De zelve uwe Mts Landen
ende ondersaten Geestelyck ende Weerlyck Edel en Onedel, sulcke
regeringe