Blader door transcripties » Lokale Kronieken uit de Nederlanden 1500-1850

archieftoegang 1668_Gent_Bill_06, pagina 49

Voorseijt, ende aen de vonte ghecommen sijnde, deer daer voechden haere
Exen neffens de selve als representeerdende haere catholijcke
Magen van spaignien etca om peter ende meter van het
kindt te sijn ende naer eenighe ceremonien van den
Officiandt gheseijt peter en meter nomde het kindt; ende
soo haere Exen hadden gheantwort Phillipus, soo wiert
de salvo van muscquecterije op het hof ghedaen, die
dadelick ghevolcht wiert van de caemers ende het
grof Canon ende daer mede begost de vieringhe van
de pectonnen, vierpijlen, ende Fuceijen.
ooc aen te gaen
De ceremonien
van tdoopsel voleijndt sijnde soo keerde het voorseijde
convoeij met de selve goede ordre ghelick het ghecomen
was volghende haere Exen, het carosken van den
Jonghen prince van Gavere voornompt, In een
schoone carosse met 6 curieuse peirden ende met
menichte andere vergheselschaep, nemende eenen langhen
keer over de groote morct, om van de ghemeente
ghesien te worden ende van de menichte van de selve
een diveirsie te maecken, ende soo te doen verschuijven,
Int huijs van Egmont waer ghekeert sijnde, voor
eerst soo wiert het nieuw ghedoopt prinsken Phillippus
(vergeselschaep met haere Exen, gedreghen bij de
graevinne sijne moeder die daer lach In een
besonder
21
Besonder apartement op een bedde van parade, soo
costelick toeghemaeckt al of het een Coninghinne hadde
gheweest, doch de teeckenen van de
goude
croone oock
verciert met veel fijne peirlen, ende dierbare ghesteenten
ende t fatsoen van haer cleedt, dat oock was van blouw
gouwen laecken, vol ghevoert met fijne hermijnen
en was maer van een hertoghinne, De complimenten
van para bien, de vraeghen, ende antworden die daer
gheschieden, soude moeten een boecxken particulier
hebben om die volcomelick te beschrijven, als mede
van de costelicke, ende rare ameublementen die daer In
t hosteil, ofte palleijs van camer tot camer was te
sien, ende Ick versekere Ulieden hadde Ick daer niet presendt
gheweest, ende alles met mijn eijghen ooghen ghesien, Ick
soude sulcx door hooren segghen niet ghelooft hebben,
want de costelicke, rare, ende constighe tapijten
ghevrocht van sijde, silver, ende goudt, ghecommen
van t aude gheslachte van de Graeven van Egmont
waeren wonderlick om te consideren, neffens de
schilderijen van de outste, ende beste meesters van
Italien, ende Nederlandt, de extroordinaire schoone,
ende rijcke schribaenen, de bufetten ghelaeden met
silvere, ende vergulden vaeselle, de groote silvere croonen
besedt