Browse transcripts » Amsterdam City Archives

archive access 5075, inventory number 173, page 9

Dit al niet tegenstaende eenige keuren oft
Ordonnantien vander weescamere ter
contrarie, die sy met rypheyt van raiden
mits desen derogueerden, want sij testateurs
wel verseeckert syn, ende vastel. vertrou¬
wen, dat die naegenomineerde testamentl.
momboirs, die kinderen niet vercorten, dan ter
Contrarie alle voirdel. ende proffyt tedoen,
soecken sullen, dies willen ende ordonneren die
testateurs expressel., dat die lancxt¬
levende van hen beyden, haere kinderen
eerlycken sallen opbrengen ende onderhouden,
in cost, clederen, schoelgaen, ende andere
Corporele nootdruften, die knechtgens
aende coopmanschap ende te setten, te laeten
studeren, oft tot eenige andere eerlycke
staet gebruycken, ende doen onderwysen, ende die
meysgens eenige properheyt te laeten leeren,
om haer naemaels door Godts segeninge te
moegen behelpen, ende dat all voorde vruchten
ende blaeden vande voorss. kinderen goeden, soo
verre d'selve moegen toelangen, ende soo niet,
sall t'geene daer aen te cort soude moegen
commen, vande hooft somme affgetrocken
werden, ende soo oock yets vande proffyten
quamen over te schieten, sullen die selve
neffens t'capitael mede werden wtgestelt
op goede ende vaste renten, gel. hier
nae breder volgen sall, ende tot proffyte
vande selve kinderen op loopen, ende accresse¬
ren, geduyrende soo lange ende ter tyt toe
die voorss. kinderen gecommen sullen wesen, totten
staet des houwelycx ende alsdan elcken
kindt totte voorss. staet gecommen synde, ende
doende naden raet ende het believen vanden
lancxlevende ende die testamentel.
momboirs, beneffens den selven lancxlevende
geordonneert, wt te keeren ende te laten
volgen, alsulcke ende Soodanige goederen,
als d'selve over syn vaderl. oft moederlycke
erve is competerende, daer mit die voorss.
9
haere kindt oft kinderen te vreden sullen moeten
wesen, sonder eenigen bewys voirder te moegen heysschen
Tot dien eynde hebben die testateurs ende elcx
van hen, geeligeert, gedeputeert, ende gecooren
eligeerden duputeerden ende kiesen mits desen,
eerst den lancxlevende van hen beijden, ende
daer toe namentlyck die testateur van syn syde
Cornelis schouten brouwer tot weesp syn vader,
of by versterven van hem, Lourens cornelissz
syn broeder, In desselffs syn vaders plaetse,
ende die testatersse van haerder syde,
michiel Janssz haeren broeder, ende by afflivicheyt
vanden selven, Jan Janssz bruyn oock haeren
broeder, Aen henlieden uterl. versouckende, die
testamentelijcke last te willen aenvaerden,
ende die voorss. kinderen goeden regeeren, administre¬
ren, ende aenleggen, soo sy ten meesten nut,
ende oirbaer ende proffyte vande selve, te raide
sullen vinden, waeromme die lancxlevende aende
selve syn oft haer mit testamenteurs, gehouden
sall wesen, drie maenden naert overlyden vanden
eerst afflivigen, te geven staet oft Inven¬
taris vande gemeene goeden, by syn oft haer
simpele woorden van Jae ende neen, sonder eedt te
derven doen, daer mit die selve sall moegen
bestaen, Omme alsdan tot proffyte vande
kinderen wtgeset te werden, op goede renten, naer
dat die lancxlevende metten voorss. gecooren
momboirs t'samentlyck te raide sullen vinden,
Gevende derhalven henlieden alsulcken
generalen ende specialen macht, Cracht, ende
auctoriteijt, als executeurs van testamente
nae rechte Competeert, wilden mede dat die
voornomden testateurs, by aldien die lancxt¬
levende Oock overleede voor ende all
eer haere kinderen totten staet des houwe¬
lycx oft haer behoorlycken Ouderdom
gecommen sullen wesen, dat alsdan haerlieder
goederen, byde testamenteurs van beyden
syden boven genomineert, sullen werden geregeert
als voiren, sonder dat d'selve goederen die