Blader door transcripties » Stadsarchief Amsterdam

archieftoegang 195, inventarisnummer 53, pagina 3

hadden moegen handelen, ende de selve vuytvueren nae hoere
geliefte, aengesien de mandaeten dien aengaende
gepubliceert, Daerop sal de voirs Bicker
verclaeren, zoe dat die meyninge over al nyet en is
by sullicke mandaeten, hen hoeren met burgeren, oft
yemanden anders eenigen schaeden oft naedeel toe
te vueren, Maer dat sullicke ordinancien principaelyck
daeromme geschien om innienten hangers noot, ende
perickel daerby te verhueden, ghelyck sullicx oick
by anderen naebuerfursten ende stenden wel gebruycklyck
is derhalven die van dartich billich weyniger
hebben te bezweren onser mandaeten,
Als nu de voirs Bicker van den raede van Dansich
opt ghene voirs is een behaechlycke antwoerde sal
hebben, gelyck wy ons vertroesten dat hy wel sal
gecrygen, Soe sal hy hem voirts by des voirs Conincx
van Polen Stadthouder ende bevel hebberen aldaer te
Santzich verordent, vervuegen ende nae aensegghinge
onser gunstige gruetenisse ende geneighen willens
den behauden onsen brief hem oick mede gegeven, ende
met allen moegelycken vliet aen hen gelyckerwyse
versoecken, dat sy die ondegewoontlicke navigatie ende
hanteringe, de wellicke des voirs Conincx van Polen
ende deser landen ondersaeten ende handelluyden van olts
herwaerts allewege te saemen gebruyckt hebben van
hoeren twegen onderhouden ende insunderheyt die bevorderinge
doen ende gestaden willen, dat onse ondersaeten in den
orden aldaer hen en weder coren, ende anders innekoopen
laeden ende herwaerts ouerschepen ende brengen moegen, Ende
hen in alle tghene voirs is tegens desen landen soe
naebuerlick ende guedtwillich bewysen ende verthoonen
willen, als die noittruft vanden ondersaeten ten beyden
zijden, ervordert ende vuytheyscht ende ghelyck wy tot hen
des een sunderlick genedich ende guedt vertrouwen draegen
Met verclaeringe, dat wy daertegen vroedich syn, der
Co. W. van Polen onderdaenen en onder anderen oick den
burgeren ende handelsluyden van dantzich die hoeren
handel ende coopmansschap in desen landen dryven ende
gebruycken, daerinne gheen verhinderinge noch belet
maer veel eer alle vorderinge ende avancement te doen
ghelyck de voirs Bicker sullicx broeder sal vinden in
den voirs onsen brief geroert tot wellicken zynde hem
daeraff copie mede gegeven wy om der cortheyt wille
ons refereren, om te doen, als zy nae gesteltenisse ende
gelegenheyt des tegenwoerdigen tyts wel sal weeten
ende koven verstaen bequaemlick te syne, ende vuyt
te richten.
voirts schryven wy tegenwoerdelyck aen den hertoghen
van Poneren ende Mechelenburgh, begheren dat hoere
lieffden den ondersaeten deser landen sollen willen