Blader door transcripties » Stadsarchief Amsterdam

archieftoegang 195, inventarisnummer 53, pagina 2

alle goede vorderinge te doen Ende de voirs Bicker
aen den voirs raedt in aller manieren daerop dringen ende staen
dat die pontcamere soe haest als eenichsins moegelyck
sal syn geopent ende die schepen van desen landen die met
coren ende anderen waeren versien en gelaeden sullen syn,
aldaer niet opgehouden noch verhondert en wordden ende
dit alle by de beste voege middelen ende maniere ghelijck
de selve bicker achtervolgen onsen voirs brief daeraff
hem copie gegeven sal wordden, en nae vuytheysschen
der noetdruft ende gelegenheyt deser landen wel sal
weten by hem selven te bedencken voir te dragen, ende
te bevorderen.
En indyen het geboerde dat die vanden Raede der voirs
stadt dantzich den voirs Bicker oycierden voirworpen
ende voirzielen, diewyle die schippers deser landen zekeren
tyt herwaerts gheen herinck, soudt wyn ende andere
dergelycke noittrufftige victuaillen den nyet toegevuert
en hebben, gelyck wel eertyts geschiet is, dat sy oick
daer tegen het vuyveren der graeven nyet en sollen
konnen gestaden. Daerop sal de voirs Bicker hem
gevuechlick te kennen geven, dat sullick gebreck ende
dat alle ende yegelycke waeren en koopmanschappen
doer de soude nyet sekerlyck en moegen passeren en
gevuert wordden, nyet by ons oft desen landen onser
Regieringhe en staet, maer dat tzelve toekompt by
den Coninck van Denemarcken nyettegenstaende allen
vliet van onsentwegen by hem gedaen, ende onangesien de
erffverdraegen disponeren ter contrarie, ghelyck oick syn
Co. W. ons onlancx toegeschreven heeft, dat hy gheene
victuaillen cryghsmunitie, noch andere suspecte oft
verdachtelycke waeren gemeynt was doer die soude
te laeten vueren maer daer men de selve betreden ende
bekomen konde, te doen aenhalden ende arresteren. Waer
doer wy gedrongen waeren geweest den steden ende
tzelve
oirden alhier daer sullicx behoerde te verstendigen
niet dat wy des Conincx van Denemarcken onbevueght
voirnemen redelyck oft voir goedt hielen maer tot dyen
eynde alleenlyck dat die ondersaeten deser landen des
een weten hebben ende hen voir schade ende verlies wachten
ende verhueden mochten, Soe dat die van dantzich
aensiende dese gelegenheyt niet en komen met redene yet
anders suspiceren oft verdencken, ende veel weyniger
eenige redelicke oirsaecke desenthalven hebben off nemen
gelick wy oick verhopen sy nyet en sullen doen ) hen van
desen landen met oude gewoonlycke guede naebuerschap
ende hanteringe te scheyden,
Soe verre oick die voirgenoempde van Bantzie boven
tghene voirseyt is, voirder voirbrochten, hoe dat hoere
medeburgers ende handelsluyden, met de graeven die sy
hierbevoren in desen landen gebrocht hadden niet en