Blader door transcripties » Stadsarchief Mechelen

archieftoegang 2, inventarisnummer 937, pagina 73

Vrouwen staende bynnen Mechelen, Twaelff groten Brabants
gelts eenen. Item den onderprochiaen vander selver kerken
twaelff grote Brabants eens. Item den coster aldaer
Sesse grote Brabants gelts eens. Item in vermeerderingen
vanden Seven getyden, die men alle daghe inder voirscreven
kerken van Onser Vrouwen doot twaelff gelyke groten
eene, Ende Janne van Vorspoel synen neve, thien scellinge
grote Brabants gelts eens, de voirgenoemde Peter van Vorspoel
testateur, heeft oic in namen ende vormen van testamente
puerlic om goidswillen ende in rechter aelmoessenen
gegeven, gemaect ende beset, der fabriken vander voirgenoemde
Onser Vrouwen kerken van Mechelen voir deen helft
ende der taflen der Heyliche Gheests vander selver onsen
Vrouwen kerken voir dander helft, de helft van eenen
huyse, met allen synen toebehoirten, welck huyse hy in
tyden verleden, met Margrieten Bouts synen yersten
wive gecregen heeft gelegen in Onser Vrouwen strate
opten hoeck van eenen cleynen straetken gaende onser
Vrouwen kerken waert, willende ende begherende, de
voirscreven testateur vuterlic, dat de proviseur vander voirscreven
fabriken ende vander taflen der Heylich Gheeste vanden
voirscreven Onser Vrouwen kerken van Mechelen, die by tyden
wesen zelen, die helft vanden voirscreven huyse met synen voirscreven
toebehoirten, ter stont naer syn doot totter selver fabriken
ende taflen des Heylich Gheest behoef, aenveerden
hantplichten ende behouden zelen ende daer mede ten meester
orboir ende prouffyte vander voirscreven fabriken ende vanden
eenen huysarmen levende vander voirscreven taflen des Heyliche
Gheeste ordineren ende disponeren, de selve fabrike ende
tafle der Heylich Geest vander voirscreven Onser Vrouwen
kerken van Mechelen, in die helft vanden voirscreven huyse
met synen voirscreven toebehoirten, syne gerechte erfgenamen
inde voirscreven manieren, noemende ende instituerende, Op
alsulken condicie ende verbant, dat de voirscreven testateur voer
synen vutersten wille, oic begheert ende wilt, dat de voirgenoemde
proviseure jaerlicx daer vutgeven ende betalen zelen, Lysbetten
vander Heyden, nu ter tyt synen natie, alsoe lange als sy
naer hem leven sal ende niet langer, vyff scellinge ouden
groote Turnoyse, alsulke als de voirscreven stad van Mechelen
haren pensionaerssen van gelyken gulden ende betalen sal
sonder eenich wederseggen, Ende tselve oft dOverlyffsel
van des voirscreven Peters testateur, haeffeliken goeden waer
die bevonden zelen worden, sunderlinge de ghene, die
boven syne voirscreven sculden costen van vutvanden ende boven
syne voirscreven legaten ende makingen, overschieten ende bliven
zelen, heeft de voirscreven Peter testateur oic gemaect ende
gelaten den armen huysarmen bynnen Mechelen, den
meest behoevende, om goidswillen, om die by synen
Executeur hier na bescreven, ter stont na syn doot
aenveerdt ende soe voere, den selven Annen huysarmen
gegeven ende gedeylt te wordene, Ende op dat de voirscreven
Peters van Vorspoel tegewoirdich testament ende vutersten
wille volcomelic in alder manieren dat voireven staet
gehouden ende volbracht worde, Soe heeft hy des selfs
syn testamente ende vutersten wille executeurs gecoren
ende genoemt vut goeden volcomen behouwen, dat hy
heeft, tot synen lieven vrienden, hier na bescreven, Te
wesen de verbare ende wyse persoenen, Philips vander
Bossche, aldaer tegewoirdich wesende ende den last vander
execucien van desen testamente, ter beden des voirscreven
Peters testateur, aenomende ende den voirscreven Peteren
vander cammen, absent synde, den welken hy oemoedelic
vadt den last vanden selven synen testamente, aen te
willen nemen ende dat metten voirscreven Philips ter execucien
te stellen, Ende voir de sine ende arbeyt, die sy daerinne
hebben zelen, heeft hy elken van hen beyden gemaect ende
beset twee gouden Rynsgulden eens, in welker synder
Executeurs vanden de voirgenoemde Peter testateur, geset ende
verbonden heeft alle syne goeden, om die byden selven
executeur, na syn doot overgegeven betaelt ende
gedistribueert te wordene, den ghenen die sy na inhoudt
van deser voirscreven ordinancien, sculdich syn te volghen ende
bekeert te worden ende om by hen oft behoeft, dit tegewordich
testament ende vutersten wille, tot volcomende execucien
gestelt te worden in allen synen pointen, Ende oft van moeder
ware, teghen alle de ghene, die de execucie van desen testamente
in al oft in deele, souden willen beletten, te dinghen voer
alle gerichten gheestelic ende weerlyc opten cost vanden voirscreven
goeden, om dit testament te bescridden ende dat volcomelic
te volvueren, niet min de voirscreven testateur en woude met
dat syn voirscreven executeur vander belast worden, dan alsoe
verre de voirscreven syne goeden, tot haren handen quamen heeft
voert de voirscreven testateur, oic gewilt ende begheert, oft eenich
van synen erfgenamen oft yemant andere, dat syn testament
oft eenich goet daer inne begrepen beletten oft te nieuwte doen
woude oft daer tegen seyde, dat die wyle hy ware, verbinden soude
de pame van thien maeck silver, Te bekeeren deen helft dairaf
den geesteliken ende dander helft, den welcken heeren, daer onder
de ghene gesetten waren, die daer tegen seyden, oft daden, Ende
heeft de voirsreven Peter testateur, hem selven volcomen macht behouden
om die tegewoirdich syn testament ende vutersten wille, Te
wederroepen, te veranderen, te meerderen, te minderen ende te
nieuwe te doen, alsoe dicke, als hem dat gelieven sal, van allen
welken dinghen, gelycke boven gescreven staen, de voirscreven Peter
testateur heeft begheert, aen me openbair notair hem gemaect
te wordene, een oft meer openbaire instamente inder vesten
vormen, dit geschiede inde voirscreven Onser Vrouwen kerken, staende
tot Mechelen onder den Coppen aldaer int Jan inde inditie
inde maende, opten dach ende inden pansdomme boven gescreven
daer mede op ende over waren, de ervare ende voirs
mannen, Te weten Jan Goessen, die men heet inden Creeft