Blader door transcripties » Stadsarchief Mechelen

archieftoegang 2, inventarisnummer 937, pagina 63

gheven ende betalen selen van dan voirtaen, alle
Janne, tot alsulken terminen, als de voirscreven lyfpensien
staen te betalen, de voirgenoemde Twintich scellinghe
ouder groote Turnoyse vander voirscreven maten, lyfpensien
oft alsoe vele van dier lyfpensien, alle dairaf tot
elken male, byder doot van eenenyegeliken vander
voirscreven vier kynderen Herregode, versterven ende verschinen
sal, sonder eenich wederseggen, Om welke gelooften
alsoe tonderhouden ende om der meerder verzekertheyt
den voirscreven Janne Bogaert ende synen wive dairaf te doene
Soe hebben de voirgenoemde Jan Herregod ende Lysbeth syn
stalen
wyf, den selven Janne Bogaert, ende synen wive daer
voir verbonden ende te pande geset, alle haer lyff, Ende
daer toe, alle haere haeffelike goeden waer die
bevonden zelen worden, Ende oic haere erffelike goeden
metten gronde etcetera bynnen zy gelegen, die sy nu ter
tyt hebben ende namaels hebben ende vercrigen zelen
de tocht die de voirscreven Jan Heregod heeft in een
Ende sunderlinge, haerlieder huyse, metten gronde etcetera
by Sinte Rommonde kerchof, achter thuys, den Beyaert
geheeten, gelegen, tusschen tselve huyse aen deen zyde
ende de strate vanden Eynde, aen dander zyde. A Domino Mechliniensi,
XVI septembry
Elenbeth vanden
tallen
Baerdeghem Duffle, dat opten dach van heden voir
ons geweest heeft Janne Coolmans diemen heet int
Parys, Seggende ende ons te kennen gevende, hoe dat
hy tanderen tyden met synen pren penningen, gecocht heeft
opte stede van Gheens, tot sinen live ende toe oic ten liven
van Loes Coolmans syns brueder kynderen, hier na
bescreven, Te wetene ierst ten live van Kathelinen
Coolmans, twee pond groten Item ten live van Beatres
Coolmans, Twee pond groote, Item ten live van wive
Coolmans, twee pond groote, Item ten live van Amelberge
Coelmans, Twee pond groote, Ende ten live van Margrieten
Coolmans twee pond groote Vlaems gelts jaerliker lyfpensten
daer inne hy hem selven oic gereserveert ende behouden heeft
syn heffen ende volcomen dispositie, gelyc dat clairliker
byden brieven vander voirscreven stede van Ghend dair op
gemaect blyct, Ende dat hy by crachte van dien disposicien
om zekere gedenen wille, hem daer toe porrende ende sunderlinge
om de menichvuldige ende getrouwe diensten, die Lysbeth
vander Galen syn maerte, hem over langen tyt gedaen
heeft ende oic dagelicx doet metten voirgenoemde lyfpensien van
thien pond groten disponeren ende anders ordineren
woude, Ende heeft daerom de voirgenoemde Janne Coolmans
voir synen vutersten wille ende in recompensatien ende
ve vergeldingen vanden voirscreven diensten
Opgedragen ende getransporteert, tot behoef vander
voirscreven Lysbetten vander Galen, de voirgenoemde thien pond groten
Vlaems gelts jaerliker lyfpensien, die de voirgenoemde Janne
ende kynderen Coolmans, hebben inden voirscreven manieren
tot haeren liven, opte voirscreven stede van Ghende, Ende oic
de twaelff gouden Rynsgulden erffeliker renten, die
de voirscreven Janne Coolmans heeft, opte stad van Mechelen
Ende die jaerlicx, tot totten termynen inden brieve, daer op
gemaect begrepen vallen transferende ende overgeven
de voirscreven Janne Coolmans de voirgenoemde lyfpensien ende erffelike
rente, met alle den alle rechte ende actien die hy daer
inne in eeniger manieren hadde, oft hebben mochte ende dat
inden persoon vander voirscreven Lysbetten vander Galen, Ende
willende ende consenterende daer toe, de selve Jannes Coolmans
dat de voirscreven Lysbeth vander Galen, die lyfpensien van Thien
pond grooten ende oic die erffelike rente van Twaelff gouden
Rynsgulden van nu voertaen, alle jaere, alsoe lange, als
sy leven sal ende niet langer, hebben ende heffen sal, tot alsulke
termyne, als die vallen ende verschynen zelen ende metten
penningen daer af comende, naer haer gelieften ende gelyc
met haer selfs eygen ende pren goeden disponeren ende
ordineren, Op alsulken condicie, dat de voirscreven Janne Coolmans
wilt ende vuterlic begheert, dat na de doot vander voirscreven
Lysbetten vander Calen, Adriaen ende Magdaleene Coolmans
Coolmans oic des voirscreven Loys kynderen Coolmans kynderen
de voirgenoemde lyfpensien van thien pond groten, alsdan alle
Janne, soe lange hebben ende heffen zelen, ten voirscreven termynen
tot dier tyt toe dat sy metten heffene van dien, soe
vele penningen vergadert zelen hebben, daer mede, eenegelic
Berken
van hen sal moegen coepen, tot sinen live, Op eenige goeden
stad oft plaetse, twee gelycke ponden grooten Vlaems gelts
jairliker lyfpensien, Ende dat gedaen synde ende niet eer, zelen
de voirscreven thien pond grooten, den voirscreven Kathelinen Beatrie
wive, Amelberch ende Margrieten Coolmans, sonder stoot volgen
om die na vutwysen van haeren voirscreven brieven, te hebben ende
te gebruyken, Ende dat oic, na der voirscreven Lysbetten vander
galen doot, Een geheeten Jan Martens, wettich soon van
Anthonis Martens, de voirgenoemde twaelff Rynsgulden erffelick
renten, hebben ende jaerlicx heffen sal, in leven langh
geduerende ende niet langer, ten voirscreven terminen, Behoudelic
dien, dat na desselfs Jan Martens doot, die twaelf
Rynsgulden toecomen ende weder versterven zelen, de
voirscreven Janne Coolmans gerechten erfgenamen, oft den ghenen
dien hy die met testamenten oft anderssins geven ende
maken sal, den wederseggen vanden voirscreven yersten
kynderen Coolman ende van desselfs Jans erfgenamen
niet tegenstaende, Ende oft gebuerde, dat de voirscreven erffelike rente