Blader door transcripties » Stadsarchief Mechelen

archieftoegang 2, inventarisnummer 937, pagina 132

gelegen oic aldaer opten selven Couter, tusschen de voerscreven
Henricx van Merchteren erve aen deen zyde ende Lysbetten
van Mercken erve aen dander zyde, den in tvierendeel
van anderhalven chysgulden erffelicx chys op een huysen
toebehoeren den kynderen van wylen Peter van Waerloes
gelegen byde Aedegheemstrate achter thuys den Hertshoren
geheeten in een cleyn straetken gaende ter Delen waert
Item in tvierendeel vander helft van eenen stuck bempts gelegen
tot Blaersvelt int Cleyn enderbroeck tusschen Gielis vander Berct
erve aen deen zyde ende de voerscreven Henricx van Mecheeren erve
aen dander zyde. Item in tvierendeel vander helft van eenen
stuck bempts gelegen aldaer int grootheenderbroeck. Item in
tvierendeel vander helft van eenen stuck bosch, houdende int geheel
omtrent een buender, gelegen tot Puersse inde Vele tusschen
Janne de Becker erve aen deen zyde ende Vrancx van Halen erve
aen dander zyde. Item in tvierendeel vander helft van eenen stuck
bosch, houdende int geheel omtrent anderhalff buender, gelegen
aldaer aende Morheyde, tusschen des voerscreven Henricx van
Merchteren erve aen deen zyde ende Gielis vander Roven erve aen
dander zyde, Ende in een stuck bosch gelegen onder Puersse oic
Wachtere, geheeten den gemeynen bosch, A Domino Mechliniensi, Waranderende. Op Seven
moeken rogs ende de weerde van drie scellinge groten Brabants
vuter helft vanden voerscreven goede gaende, de voerscreven Jan
van Dueren, ende Lysbeth van Dueren, syn zuster, met haer
voerscreven man hebben oic gelooft ende elc van hen besunde
dat sy ten vermanen vanden voerscreven momboiren, oft vanden
voerscreven Janne van Dueren den jongen comen selen voer
heer ende hof daer onder de voerscreven goeden tot Blaersvelt
ende tot sesse gelegen syn ende verthien dien, tot des
selfs Jans van Dueren, der jonge ende synder nacomelingen
behoef ende goeden ende eene den selve daerinne ende
doen hem voert, alle de vasticheyt ende verzekertheyt
daeraf, die hem tot synder beseghenisse sal moegen beset
dienen, sonder eenich wederseggen, om welke gelooften
alsoe tonderhouden ende om der meerder zekerheyt
daeraf den voerscreven Janne van Duere den jongen daeraf te
doene, hebben de voerscreven Jan van Dueren doude ende
Lysbeth syn zuster met haeren voerscreven man, de voerscreven
momboiren tot des selfs Janne van Duere de jongen
behoef, daervoir verbonden alle haere haeffelike
goeden waer die bevonden zelen worden, die sy nu hebben
ende hier namaelle oic hebben ende vercrigen zelen
XXVI february tempore simile
Meye
et uxor
Verdege, Zoeten. Cristiaen Mols, Henric vanden Broeke, Laureys de
Drivere ende Gielis vander Hulst als gesworene vanden ambachte
vanden scoemakers bynnen Mechelen inde name vanden selven
hebben vander om der meeste orboirs ende profyts wille vanden
voerscreven Ambachte vercocht Henricken de Meyere tot sinen ende Margriete
Tymermans syns wyfs behoef, Sesse scellinge ouder groten Turnoyse
vander munten etcetera erffeliker renten, die tvoergenoemde ambacht hadde
opte stad van Mechelen daeraf deen helft opten veerthienden
dach van junio ende dander helft opten veerthienden dach van
decembry vallen ende verschinen, Ac Renunciavit te provisit, Waranderen
ut in forma, Ende tot desen heeft Lodewyck van Heyst als rentmeester
vander voerscreven stad behoudelic der selver stad daerinne haeren
rechte syn consent gegeven
Ultima february tempore simile