Blader door transcripties » Stadsarchief Mechelen

archieftoegang 2, inventarisnummer 534, pagina 9

mincke te beterne na scepenen ende na den raet van der stad, ende den here te
beterne. Daer mede sal menne uter achten doen ende vrede doen hebben.
Vort, wie huussuekinghe dade of dore of op veinstre te stekene of te
slane of op te brekene om iemene te evelene diere binnen ware, hi ende
elec die in siere holpen ware, (w) verborde xv. lb. ende quame hiere in, in derre
maniren na dat hi ane iemene diere binnen ware mesdade soude hi die
boete gelden metter boeten van der huussuekinghen. Ende verwerden die
ghene die binnen den huusse ware inder maniren ende binnnen sinen huse, al
sloughe hine doot, hine verborde niet (om) teghen den here om ocsuun van
noet weren.
Vort, wie kerhen of kercof in ban brachte met siere mesdaet moet
hi die weder in haren vriheit bringhen binnen xl. daghen daer na of
den cost te gheldene. Werdet eer af geleit daer binnen ofte hi verbort
de stad daer naer vondemenne daer naer, daer binnen hi hadde gnouch
ghedaen op sine hoeft af te slane. Ende wien men vonde ontcuusscheit
doende op kerckof elc van beiden verborde siin overste cleet. Ghesciet
in die kerhe, elc van hem beiden verbort de stad een iaer op elken
sine (even de) ene oghe wt te stekene.
Vort, wie den rechtre of den amman vrede ontseit of met gheeft
vorvoets na dat hine hem gheheyscht heeft ene warven, ander wernen
ende derde warven hi verbort iii. lb. Eischt hine drie warven diene daer
naer niet vornoets niet en gheeft. Verbort noch iii. lb. Eischt hine
viif warven diene hem daer naer vornoets niet en gheeft verbort
noch iii. lb. Ende daer naer sal de rechte of de amman dies seker siin
tote die dat hi vrede ghegeven heeft. Ende van den ix. lb. ghenouch
ghedaen heeft of seker gheset heeft.
Waer twist ghevalt of vornoets ghevallen es binnen der vriheit
van mechlen daer rechtre of amman niet in ieghenwarden en es daer
mach een portre vor scepenen of vore porters den iersten vrede
nemen ende ghestedeghen. Ende wie enen portre desen iersten vrede
ontseide alse hine ene warven ander waerven gheheyscht hadde
ofte vornoets niet en ghave, verborde iii. lb. Diene ontseide alsene
die portere vierde warf gheheyscht hadde. Of vornoets niet en
gave, verborde noch iii. lb. Alsen die portre viifte warf heyscht
wene hem daer ontseide of vornoets niet en gane, verborde noch
iii. lb. Ende dan sal die portre vornoets seinden, haestelike gaen of
ieman senden, ten rechtre of ten amman dies mans seker te sine tote
dat hi vrede ghegeven heeft ende van der boeten ghenouch ghedaen
heeft. Ende wie den portre versprake of mesdade om dat hi desen
vrede eyschte verborde die selne boete die vore den amman ver-
boren sonde. Ende alle ierste vreden sal men nemen xiiii. nacht bliven
dien tiit. Alle vreden die aldus ghestedecht siin ende ghenomen wor-
den selen, vaste ende gestade bliven dien tiit diere toe ghenomen ende
bestrenen ende besteden wert den ghene diene gheeft ende daer hi ane
ghestedecht wert ende allen haren maghen toten vierden lede al ute
ende niet vordre. Ende wie vrede brake verbort siin liif.