Blader door transcripties » Stadsarchief Mechelen

archieftoegang 2, inventarisnummer 534, pagina 7

Ofte de stad toete dat hi van dien vi. lb. ende van der pelgrimagie
genoecht gedaen heeft. Quame hiere eer binnen, hi verborde sinen
dume af te slane. Slonghe hine of stiete hine met voete of met
hande sonder bloetrast, hi verbort xii. lb. ende ene pelgrimagie
Te sente mertens te tours ofte de stad toete dat hi van dien xii.
lb. ende van der bedevart genouch heeft gedaen. Quame hiere eer
binnen, hi verborde sine ene oghe ute te stekene. Bloetraste hine
daer mede, hi verbort xv. lb. ende ene pelgrimagie tonser vrouwen
te rocsemadouwen ofte de stad toete dat hi van dien xv. lb.
ende van der pelgrimagie genouch heeft gedaen. Quame hiere eer
binnen, hi verborde sine ene oghe ute te stekene. Sloughe hine
Ofte met eneghen dinghen, stiete of stake of worpe of met ver-
seit wapen ende sonder bloetraste, hi verbort xv. lb. ende ene bede-
vaert te rocsemadouwen ofte die stad toete dat hi van dien
xv. ponden ende van der bedevaert genouch gedaen heeft. Quame
hiere eer binnen, hi verborde sine ene oghe ute te stekene. Bloet-
rast hine daer mede, hi verbort xxi. lb. ende ene bedevaert
tsente iacops in galissien ofte de stad toete dat hi van dien xxi.
lb. ende van der bedeuaert genouch heeft gedaen. Quame hiere
eer binnen, hi verborde sine ene hant af te slane. Sloughe hine,
stake of worpe of stiete met eneghen geslepen verseit wapen
sonder bloetrasten, hi verbort xxi. lb. ende ene bedevaert
tsente iacops in galissien ofte de stad toete dat hi van dien
xxi. ponden ende van dier bedevaert genouch gedaen heeft.
Quame hiere eer binnen, hi verborde sine ene hant af te slane
wont hine daer mede om ocsunn van der stad, hi verbort dliif.
Ende van allen desen voergenoemden boeten die men verbort
ane die inder stad dienste siin, sal terdendeel heffen die ghene
daer men ieghen mesdoet omme dat hem mesdaen es int ocsuun
vander stad dienste.
Ende wanneer dat dier vorgenoemder persone tiit wt gheet
alse van dien ambachte daer si in gheset waren inder stad-
dienste, wie eneghen daer hi na versprake of mesdade om ocsuun
van der stadsdienste daer in gheweest hadde, hi verbort die selne
boete die hi ane hem soude hebben verbort die wile dat hi inder
stad dienste was.
Vort, wat portren enen porte of portre enen vremdem
man ofte wiif enen man ofte een wiif versprake, vloecte
of loghen streepte, verbort iii. s. Wie van desen den andren
dreighede ane liif ane leet ane goet of ane ere te tranckene,
hi verbort iii. lb. ende den ghenen te versekerne dien hi ghe-
dreicht heeft na dat die waerheit vanden ghedreighe op hem 
tught.
Sloughe of stiete een portre enen portre ochte portre