Blader door transcripties » Stadsarchief Mechelen

archieftoegang 2, inventarisnummer 534, pagina 6

hiere eer binnen hi verbort siin hoeft af te slane. Trocke hi enegerande
wapene op enegen van desen vorghenoemden, hi verborde xxx. lb. ende een
ene bedevaert tsente iacops in galissien. Ende alse hi weder comt ene be-
devaert tsente thomas te cantelberghe ochte die stad toe hi van dien
xxxi. ponden ende van dier bedevaert genouch ghedaen heeft quame
hiere eer binnen, hi verbort siin hoeft af te slane. Stiete hi of slonge
met voete of met handen enegen van desen vorgenoemden hi verborde
voet of hant daer hiit mede. Slonge hi met eneghen wapenen ene-
gen van desen vorgenoemden, stiete of stake of worpe om ocsunn
van der stad dienste, hi verbort dliif.
Wie sinen vader of siere moeder onwerdelec versprake of
versmadelec of draichlec toe sprake of mesdade in eneger
maniren die hier vore in poent gescreuen es hi verbort die boete
diere vore op steet geliic dat hi mesdade rechtren commoengie meestren
of scepenen.
Vort, wie den amman, rentmeestren of eneghen van den
sevenen gesworen van den wollewerke ofte eneghen metten
commoengien meestren snaches ommegaen de stad te verhoedene
die wile dat si siin in dien dienste versprake hise versmadelec, onwer-
delec of dreichlec toe sprake om ocsuun vander stad dienste hi verbort
xii. lb. ende ene bedevaert tsente merttens te toers ochte die stad
totien dat hi van dien xii. ponden ende van dier bedeuaert genouch gedaen
heeft. Quame hiere eer binnen, hi verbort sine oghe ute te stekene. Slon-
ghe hine met eneghen andren dinghen stite, stake of worpe sonder bloet-
raste, hi verbort xxi. lb. ende ene bedeuaert tsente iacops in galissien
ofte die stad toe dien dat hi van dien xxi. lb. ende van dier bedevaert
genouch gedaen heeft. Quame hiere eer binnen, hi verbort siin ene
hant af te slane. Bloetrast hine met eneghen wapene om ocsuun
van der stad dienste, hi verbort siin dliif.
Wie eneghen van desen vorghenoemt indesen poente stiete ochte
sloeghe met hande of met voete sonder bloetrasten, hi verbort
xv. lb. ende ene beuaert tonser vrouwen te ruchomadour ofte de
stad toe dat hi van den xv. lb. ende van den bedevaert (genouc)
genouch gedaen hadde. Quame hiere eer binnen, hi verborde sine
ene oghe ute te stekene. Bloetrastine daer mede, hi verbort xxi. l.b.
ende ene bedevaert te tsente iacops in galissien ochte de stad totedien
dat hi vanden xxi. lb. ende vanden ene bedevaert genoech gedaen heeft.
Quame hiere eer binnen, hi verborde siin ene hant af te slane.
Vort, wie dat eneghen geswornen van dan ambachten die ter
stad rade behort ofte eneghen die ter stad dienste geseet es alse
porten ofte die stad de behuedene bi nachte ofte bi daghe verspra-
ke ofte versmadelike ofte dreighelike toe sprake om ocsunn van
der stad dienste, hi verbort vi. lb. ende ene pelgrimage te vendoeme