Blader door transcripties » Stadsarchief Mechelen

archieftoegang 2, inventarisnummer 534, pagina 5

Wie die stormclocke luude sonder der commoenge meestre heten het
en ware brant hi verbort siin hoeft, ende dan moet hise luden in bei-
den siden. Ende wantneer dat men die stormclocke hort soe moeten
die ghene die tenporten gheordineert siin elc trecken ter porten
wert daer hi toe gheset es die te slutene ende te behuedene, ende
niet af te gheschene vore dat si ghewareghe boodscap hebben
van den commoengien meestren. Wies niet en dade ofte eer daer af
scide elc verbort xx. s. Ende terden deel van deser boeten dat ter
stad toe behort selen hebben die ghesellen die vore die porte siin
ende doen dat si sculdich siin te doene. Ende waer ment brant ver-
nemt daer selen die commoengie meestre trecken metten ghenen
die hem ghelevert siin wten ambachten alle ghewapent te
verhoedene alrande ghebreke. Wie daer van desen metten
commoenge meestre ghewapent niet en quame, moest betren na
den raet van der stad. Ende wiere anders ghewapent quame,
verbort de wapene ende xx. s. Maer wie een oelvat brinct ofte
enen ketel ofte een nat slapelaken in sine hant ofte ander
dinct brant met te werne mach elc een beckenneel op siin
hoeft draghen sonder ander wapene.
Vort, alsoe vollech alse men de storm clocke clipt ane dene side soe
selen hem alle die lieden wapene die indie stad siin die ter commoen-
gien behoren ende die selen trecken elc met sinen conestavele te sente
rommouts kerchove, wert ten commoengie meesters sonder die consta-
vele dien die porten bevolen siin ende daer die commoengie meestre vore
trecken met standerden daer selen si alle na volghen ende niemen ensal vore
lopen ende wie eneghe dinghen ane grepe of dade die quaet ghedaen
waren sonder der commoenge meesters heten of hare ghebot, he sal ver-
boren siin hoeft af te slane op de stad. Ende wie toebringhere ware
liede ghewapent wter stad te leidene sonder orlofs commoengie meesters
weder si hem bestonden of niet en bestonden ende weder si ghewapent
wt ghinghen soe buten haren wapene ane daden al keerden si weder
sonder daet te doene, de toebringhere verbort xx. lb. ende die met
hem wte trecken elc verbort c. s. Ende wie van desen die aldus ute trecken
daer daden van (romme) van rove, van brande, van manslachte of van
huuse op te brekene of van vrouwen te vercrachtene of vrede of
soene te brekene in de stad niet te keerne op siin hoeft af te slane.
Vort, wie beproeft mach werden metter waerheit dat hi partien ni
die stad maken wille of eendrachticheit, hi verbort metten rechte siin
hoeft af te slane sonder enich verdrach.
Vort, wie rechtrem commoengie meesters, scepenen of eneghen
van desen versprake onwerdelech, versmadelech of dreichelec
toe sprake om ontsiin vander stad dienste hi verbort  xxi. lb. ende een
bedevart tsente iacops in galissien of die stad totien dat hi van dien
xxi. ponden ende van der bedeuaert ghenouch ghedaen hadde quame