Blader door transcripties » Stadsarchief Mechelen

archieftoegang 2, inventarisnummer 534, pagina 53

Cauchiede ghelt sal men nemen in dese maniere, men sal nemen van enen
besleghenen waghene met iiii. raden ii. d. item van enen v waghene die
besleghen es met ii. raden ii. d. Item van enen ombesleghenen waghene
i. d. Item van ere besleghenre kerren i. d. Item van ere ombesleghenre
kerren o. Item van enen zoemere o. Item van enen perde dat enen zac
met corne breenct o. Item van enen verkene dat men allene driift o.
Ende van enen cudde verkene dat boven viii. verkene dat eens mans
es iiii. d. Ende van ii. verkene i. d. Ende alsoe tote acht verkenen te gadre
van elken o. Ende scapen ende gheiten gheliic de verkenen. Ende van elken
perde dat coeman breenct o. Ende van coeyen ende van rundren gheliic
den perden ende ochte iemen enech goet haelde daer hi af cauciede ane
ghegheven hadde alse hi in quame, van dien goede en soude hi gheen
cauciede ghelt gheven alse hiit heven voerde. Dit sal men nemen van
vremden lieden ende van niemen monser commoengen noch van ghe-
huerden noch van gheleenden waghenen noch van kerren noch van
waghenen noch van kerren die mele brenghen.
Dassise van den ouden cleedren.
Der assisen van den ouden cleedren selen behoren alrehande oude
cleedere die wollen siin oude vedren ende pelse ende daer toe behort
cultte ende coffertoere alrehande silver nappe silveren coppe nappe ende
scale alrehande silveren facelment vercoept alrehande gulden facelment
alrehande facelment van pledenen nappen van ouden gordelen van
ouden aelmenieren van alrehande ghesteinte waer ment vercoept,
binnen onser commoengen ochte buten ende wat oude cleedre ochte oude
vedren ochte dies ghelike. Dat min ghilt dan x. s. en sal niet ghilden
van assisen hier af selense gheven van den ouden cleedren die tonser
commoengen behoren van den xv. lb. xv. s. d. Ende eest goudsmet ochte
silversmet waer hiit vercoept sal ghilden van den xv. lb. xv. d. Ende
altoes na ghelande eest meer eest min ende tenten ende pawelioene
behoren hier toe te derre assisen van elken x. lb. iii. s. alsoe dicke alse
men vercoept. Ende wat vremder manne die coept binnen der vriheit
van Mechelne ende voert vercoept sal assise gheven gheliic portren.
Dassise van den witten ledere.
Der assisen van den witten ledre behort alre hande witleder hanscoene
kersriemmekers borsemekers broecriemekers. Ende blote vel van
x. lb. ghelds iii. s. ghildet meer ochte min na ghelande, dit selen ghilden
na ghelande alle die tonser commoengen behoren diet vercopen.
De zamecoep van den huden.
Den samecoep van den huden sal verdienen deghenen deine ghenouven
heeft ochte siin cnapen ende daer niet en verdiende ochte siin cnape daer
en soude hi maer de helft af hebben ende van vremden lieden van buten
die maer ene huut en hebben ochte ii. daer af en selen si niet hebben
ende ware datse de vremde liede daer toe riepen dat si hen holpen.
Dassise van den appelen.
Dassise van den appelen sal men nemen in dese manieren ter assisen
van den appelen behort alrehande fruut verjuus appele ende peren
noten mispelen. Ende wiinberen ayun loec ende alrehande eest sonder
vighen rosinen ende daden. Daer af sal men nemen van v. lb. ghels xv. d.
wie dat ter commoengen behort diet vercoept ghildet meer ochte min
altoes na ghelande. Ende verjuus sal gheven o. de ghelte ende
gruene hawen behoren hier toe.
Dassise van den vetten ware.
Dassise van der vetter waren sal man nemen in dese maniere,
dats te verstane van ruete van sineere van botren van kese ende van
zeepen van smoute van asyne uteghenomen van der vetter waren
die den vleeschouwers valt van haren quicke ute ghenomen vremden
lieden horen iersten toendach. Ende vercoepen si daer na dat si selen
gheven gheliic portren ende portren coepen te vremden lieden
behoef si selen daer af assise gheven van desen vorghenoemden
ghelde van elken v. lb. xv. d. uteghenomen edec die sal gheven
ii. d. de ghelte die ment tapt ende dame in groet ii. s. Ende te
deser tiit assisen sal behoren alrehande smout met amen ende
met ghelten alsoe dicke alse men dit vorghenoemde goet.
vercoept. Eest assise sculdech viil scout behort hier toe.
Dassise van den weede.
Dassise van de weede sal men nemen in dese maniere, wie
weet vercoept sal gheven van der cupen ii. s. Ende de porte diet coept
sal oec gheven ii. s. Ende elc vremd man sal hebben sinen iersten
toendach. Ende daerna vercoepen ochte vercoept hiit ende tapt hi
sal gheven assise gheliic portren. Ende elc vremd man mach gheven
ene proef cupe van enen hoepe weeds ende portren diet gheheel
ute voeren ghilden ii. s. vander cupen. Een groet pont wouden
ii. d. Een vat meeden ii. d. alsoe dicke alse ment vercoept na
den core brief vanden wollewerke.