Blader door transcripties » Stadsarchief Mechelen

archieftoegang 2, inventarisnummer 534, pagina 54

Dassisen van den ghevetten leederen.
Dassise vanden ghevetten ledere sal men nemen in dese maniere al
ghevet leder ende ghecout leder daer af sal men nemen ende gheven van den
xxv. lb. ghelds vi. s. iiii. d. alsoe dicke alse ment vercoept ende ghildet meer
ochte min na ghelande ghevette calfsvel. Ende perkementers behoren
hier toe van v. lb. xv. d. alsoe dicke alse si vercoepen.
Dassise van den scoenmeekers.
Dassise van den scoemekers sal men nemen in dese maniere ten
assisers vanden scoemekers behort cordewaen ende coyen in hosen micinalen
in scoen in andren dinghen. Ende van allen ghevetten ledere bihen selven
ghewracht wie dat vercoept die tonser commoengen behort sal gheven
van den v. lb. ghelds xv. d. ghildet meer ochte min na die ghelike ende
die cordewaniers selen ghilden na de ghelike.
Dassise van den boutwerkers.
Dassise van den boutwerkers behort graen werc coninen werc vosschen
werc lamrenwerc ende alrehande werc peltrie wat portren die vercoept
waer hi vercoept die tonser commoengen behoert sal gheven van den goede
dat hi vercoept van elken x. lb. iii. s. dat nuwe es ghildet meer ochte
min na ghelande ende een vremd man coept hiit ende vercoept voert
hiit voert hi sal gheven assise die vremde liede selen hebben horen
saterdach sonder assise van dien dat si brenghen eest ghewracht eest
onghewracht.
De zamecoep van den zoute.
Den samecoep van den zoute sal men nemen in dese manieren, de
samecoep van den zoute iii. d. wie dat vercoept van den midde ende de
ghene die desen samecoept nemt salne moeten verdienen ochte doen
verdienen. Ende in manieren waer men mach maect heimelike comenscap
ende die zamecopere daer bi es ochte siin bode ende menne niet toe
daer en roept daer sal die samecopere sinen samecoep af hebben ende
daer bi niet en es noch siin bode daer af sal hi hebben die helft.
Dassise van den ledden.
Dassise van den ledden behoren bedden ende beddetiken ende plumen wie dat
vercoept, die tonser commoengen behoert sal gheven van elken v. lb. ghelds xv. d.
Dassise van den huden.
Dassise vanden huden behoren alrehande ruwe hude, siin si droghe siin
si nat ende hier toe behort tcordewaen metten hare box vel ghlets vel
ende calfs wie van desen vorghenoemden goede vercoept sal gheven van
dien dat v. lb. ghuldt xv. d. Eest meer eest min altoes na ghelande.
Dit es dordenansche van den crane.
Dit es de loen dien de crane hebben sal ter stad behoef te siere cost
te helpen.
Iersts van elker amen wiins wt ochte in te doene welc dat es i. tor.
Item van ale dies ghelike van edeke dies ghelike van damen smouts iii. o. tor.
Item van ere amen zeems iii. o.
Item van ere amen meeds i. tor.
Item van den groten vate asschen iii. s. tors ende altoes ii. cleine vate vore een groet.
Item van enen molenstene xii. d. tor.
Item van enen standaerde ter molen ii. d. tor.
Item van ere assen xii. d. tor.
Item van enen klere soemere xii. d. tor.
Item van enen groten balke dies crane ghelt xii. d. tor.
Item van enen zarke die meer hout dan vii. voete lanc xii. d. tor.
Item van enen packele van elkertieren van lakene ii. d. tor.
Item van enen zarke van vii. voeten ende daer beneden vi. d. tor.
Item van enen packele met vellen xii. d. tor.
Item van enen sliipstene vi. d. tor.
Item van enen vate weeds vander amen i. d. tor.
Item van enen vate smeers vander amen i.d. tor.
Item van den steene daer men ketele op sleet ii. d. tor.
Item van der meelen copers ii. d. tor.
Ende van alrehanden goede dat boven niet ghenoemt en es
sal men ghilden na siin ghewichte ofte gheliicste datter boven ghescreven es.
Dan alrehanden goede dat men verlegghen wille metten crane vanden enen
scepe int ander sal men gheven half ghelt na dat boven ghescreven es ende
dit es te verstane van allen dien dat men metten crane werken duet.
Ende engheen scroedere en mach wiindaes noch ander engien negheen
stellen omme goet ute te doene. Wat si twe allene metten handen ute doen
moghen en selen niet gheven.
Ende men sal den crane leveren elx iaers ii. goede hoeft tabele 
eest dat sake dat hiis behoeft ende ii. wipen maer engheen smoutghelt
en sal men gheven. Ende es te wetene wie den crane verpacht hi sal scroeden