Blader door transcripties » Stadsarchief Mechelen

archieftoegang 2, inventarisnummer 534, pagina 52

Dassise van de houte ende van den weet aschen
Dassise vanden houte ende van den weet asschen ende van pennewerden
die daer toe behoren sal men nemen in dese manieren. Een vat weet
asschen dat vii. lb. ghilt dat sal gheven xxi. d. ghildet min ghildet meer
altoes na ghelande. Item een molensteen van xx. lb. v. b. ghildet hi
meer ochte min altoes na ghelande, item alrehande houtwerc ende
hout dat x. lb. iii. ghilt sal gheven iii. s. alsoe dicke alse ment vercoept die
tonser commoengien behort waer hiit vecochte buten ochte binnen ghildet
min ghildet meer altoes na ghelande ende vremde liede selen hebben
horen iersten marct dacht. Ende legghen siit binnen onser commoengen
si selen gheven gheliic portren. Rademeekers,  scepmekers van elken
x. lb. ghelds iii. s. alsoe dicke alse ment vercoept ende scepe behoren hier
toe. Ende hier toe behoert alrehande hout dat men te blaendren werd
Voert die tonser commoengen toe behort ochte behoren ende es te verstane
soe welken tiit dat men enech goet van desen goede vercoept dan eest
assise sculdech ende zarke behoren hier toe ende sliipstene.
Dassise van den levenden quicke.
Aldus sal men nemen dassise van den levenden quicke van alrehanden
levenden quicke dat x. lb. ghilt sal men gheven iii. s. Eest min eest
meer na ghelande uteghenomen den vleeschouweren van quicke dat
hors selfs es weder siit levende vercoepen soe slaen ende van al dat te horen
ambachte behort. Ende dat vremde liede vercoepen teetene ende dat sele
ghilden alle de ghene die tonser commoengen behoren elc calconen
x. s. alsoe dicke alse hi beriit, ene viertele steen colen i. d. Een cust voed
scorsschen dat men ute voert iii. d. Die tonser commoengen behort
cochte enech man scorsse die hi voort vercochte, daer af sal hi gheven
van den cust voedere iii. d. Dat es te verstane altoes alse ment goet
vercoept dan eest assise vaer ende welken tiit dat men enech goet
ute voert, soe sal men daer af assise gheven ende ene veertele hoppen i. d.
Dassise van den mele.
Dassise van den mele sal men nemen in dese maniere, dats te
verstane ene viertele mels vi. d. wie ene viertele meels bacht binnen onser
commoengen eest porte eest bachtre die sal gheven eest min eest meer
na ghelande ende den bechkeren sal men hore vi d. in weghen in hore
bachken. Ende vremd broet sal gheven na dien dat onse portren gheven
Dats van broede dat van ere viertele meels comt sal men gheven vi. d.
al vremt mele dat hier binnen te coepe comt sal hebben sinen iersten
marct dach ende blivet overstaende binnen der commoengen, soe saelt
daer na gheven assise gheliic portren. Ende dat men ten cranken beghinen
bact van binnen shoefs sal van derre assisen quite siin ende daer toe
hevere musene hoembeke heffene ende leest van dien dat si backen
te haers etene ende dese die dese assise verpact hebben moghense
wachte te horen stoensten stoensten ware dat si willen.
De samecop van den weede.
Den samecoep van den weede sal men nemen gheliic dat menne tote
hare ghenomen heeft ende die salne verdienen ocht doon verdienen maer enne
verdiende hiis niet hi en soude maer de helft hebben van den samecoepe
ochte daden verdienen.
Dassise van den erffenissen
Dassise van den erffenisse sal men nemen in dese maniere, wie dat
erve heeft ochte thiis coept binnen der vriheit van mechelne sal gheven
van elken c. lb. xxv. s. ende wie buten coept die tonser commoengen behort
sal oec gheven van elken c. lb. xxv. s. ghildet meer ghildet min na ghe-
lande. Ende vercoepet onse portre enen vremden man buten ochte
yemene die men niet bedwinghen en can assise te gheve soe sal onse
portre die assise gheven.
Dassise van den smeden.
Dassise vanden smeden sal men nemen indese maniere van ysere ghe-
wracht ochte onghewracht, dat smede vercoepen sal men gheven van den
c. s. ghelds xv. d. fortssermekers ende die smesse smeden behoren hier
toe van elken c. s. ghelds xv. d. alsoe dicke alse vercoepen.
Dassise van den liinwade.
Ter assisen van den liinwade behort alrehande liinwaet siit grof
siit cleine hoeghedaen dat si utghenomen alrehande hoeft cleedren
omme doeke canevas ende hier sal toe behoren vlas linen garen tapite
ende custiken ende utghenomen borghoenschen gaene, wie dat vercoept
van desen goede die tonser commoengen behort tote x. lb. daer af sal hi 
gheven iii. s. ghildet meer ghildet min altoes na ghelande ende dese
assise mach men nemen ten ghetouwen ende waer dat si versciine.
Dassise van der batterien.
Dassise van der batterien sal men nemen in dese maniere te deser
assisen sal behoren coperine potte ende tennen potte tennen scotelen ende al
dat ter batterien toe behort die ghelasene ventren maken die scildren
siin beelde mekers ghereidemekers die quareele mechelen ende gheheidt
werc vercoepen selen hier toe behoren ende allde scoemekeren selen hier
toe behoren ende de blocscoemekers met al dat te horen blocsoen behort
wie dat c. s. wert werx vercoept sal gheven xv. d.