Blader door transcripties » Stadsarchief Mechelen

archieftoegang 2, inventarisnummer 534, pagina 51

Dassise van der wollen sal men nemen in dese maniere, wie tonser commoengen
behoert sal gheven van enen zacke wollen van tween waghen ende daer
boven dassisen xv. lb. d. waer hine vercoept ochte brenght in desside zeens
van ere poken die ene waghe houdt ende daer boven viii. s. houdtse daer
van den stene iii. d. Sonder wollebrekeren selen gheven van den
zacke xx. s. van wollen die si breken op de marct te vercoepene ende
daer mede sal yeghelike quite siin diese ieghen hem coept metten stene
ende wie van onsen portren ieghen vremde liede wolle coept metten
stene die sal gheven van den stene wollen xxx. s. gheliic die xx. s. ghilt
ende daer beneden tote vii. s. iii. d. ende onder vii. s. den steen i. d. ende
van den stene wollen die ghilt boven xx. s. tote xxx. s. iiii. d. ende al dat
boven xxx. s es sal gheven van den stene vi. d. alrehande vremde liede
selen hebben horen iersten toendach ende bliift die wolle daer na binne
der commoengien ende sise vercoepen si selen gheven assise gheliic onsen
portren metten roeve ende alrehande ierlansche wollen die onsen
portren metten roeve vercoepen selen si gheven van elken roeve
i. d. ende van den vachte i. d. toete ii.s. ende daer beneden niet ende
van iii. stucken lam wollen i. d. ende van den stene ierlandscher
wollen die onse commoengien bruders vercoepen, wie coept sal gheven
gheliic dat hier boven gescreven es van der inghelscher wollen.
Dats te verstane van xx. s. tote vii. s. iii. d. ende boven xxx. s. vi. d.
ende een portre die niet ghemeinelike wolle ende brenct te vercoepene
dande wolle metten stene vercoept beneden xxx. s. den steen en sal niet
gheven ede boven xxx. s. den steen van dien dat hi vercoept sal hi
gheven assise na ghelande van den zacke v. s. meer dan ghemeine
assise
Dassise van den roe ghewande opt ghetouwe
Dassise van den roe ghewande opt ghetouwe sal men nemen
in dese maniere, elc laken eest pleyn eest striipt, dat ghemaect es
met greynen sal gheven v. s. opt ghetouwe ende sadblaeu v. s. ende
alrehande ander lakene, siin si scriipt iiii. s. opt ghetouwe. Vort, ghe-
mingde lakene die staerlakene lingde hebben die selen gheven vii. s.
Ende witte ende blaeu ende grawe lakene die staerlakene lingde hebben
selen gheven v. s. opt ghetouwe.
Dassise van den ghereeden ghewande.
Dassise van van den ghereeden ghewande sal men nemen in dese
maniere, wat portre ochte deghene die tonser commoengen behoren die
lakene coept int nuwe laken huus ochte in oude ochte waer hise coept,
sal gheven van elken lakene iiii. s. ende voerse daer hise voeren wille.
Ende wat lakene dat men met greynen verwet, sal gheven xii. d. te
ketele ende alle lakene die staerlakene lingde hebben selen gheven
ii. s. ten ketele ende die ghene dien dese assise bliift, moet de lakene
halle bewaren ende verborghen.
Dassise vanden haringhe.
Dassise vanden haringhe sal men nemen in dese maniere wat portren
die coept harinc droghe ochte nat binnen der vriheit ochte der com-
moengen ochte daer buten dien men hanct ochte stapelt ochte ghestapelt
es sal gheven van den last v. s. ende van itort haringhen ende van alder
hande handeren haringhen v. s. van der last. Item wat portren vremd
lieden harinch hanct ochte herberght droghe ochte nat om te vercoepene.
Die portre sal gheven van sinen hanghe daer i die harinc in es ochte vand
hanct vander last v. s. soud coit sfrems mans van deser assisen maer
een vremt man mach wel siin goet neder setten die veirure wacht
sonder coepliken maer coeplike hi soe sal siin werd assisen gheven
voert van alrehanden vischen ute ghenoemen harinc sal men gheven
van den xv. lb. xxv. lb. ghelds vi. s. iii. d. eest meer eest min altoes
ghelande, wie vercoept die tonser commoengen behoert.
Dassise van den goede van ghewichte.
Dassise van den goede van den ghewichte sal men nemen in dese
maniere van den c. lb. werc ghelds xxv. s. wiet vercoept die porte es
ende waer hiit vercoept ghildet min ochte meer altoes na ghelande
te deser assisen sal behoren greyne briselihout ghemaelne meede aluun
peper ghinghebere caneele alrehande suker eest hert eest weec
soffraen naghele cubeeben massiis notemusscaten greine van paradiis.
zeduwale galigaen commiin riis amandelen ricolissie quicsilver cottoen
wolle ten was loet yser stael lattyser uteghenoemen yser dat sinede
vercoepen vorgaensch garen cavenas alrehande kempzide guldene
cleedere zidene cleedere iasper purper alrehande sindael roet corduwaen
gheverwet roet bosaen gheverwet alrehande penneweerde goede ven
ghewichte die hier niet ghenoemt en siin ute ghenomen confectien
die apothecarise maken alrehande ghemengde merce alrehande
lormerie die de ghene vercoepen die te desen ambachte behoren vighen
rosinen ende daden altoes selen de vremde liede hebben horen toendach
iersten. Ende alrehande hoeft cleedere behoren hiertoe ende omme
doeke die messe vercoepen in cramen ende die selve niet en snieden
behoren hier toe altoes alse men dit vorghenoemde goet vercoept es
men assise sculdich daer daer af. Ende ware dat zake dat iemen die
tonser commoengen behoet goet brachte dat te derre assisen toe.
behoert ute vrankerike ochte wannen dat hiit brachte van buten
weert weder hiit vercochte ochte vervremdde ochte anders verborde
sonder assise af gheven gheliic dat hier boven ghescreven steet 
ende testwerc behort hier toe. Ende welken tiit dat men aldic
vorghenoemt goet ghecocht heeft es dassise verscenen.