Blader door transcripties » Stadsarchief Mechelen

archieftoegang 2, inventarisnummer 534, pagina 50

wiin coept in groten ochte drinct met horen meysemeden sonder
weder vercoepen sal quite siin van assisen item een portre die siins selfs
wiin drinct sal assise gheven gheliic ochte hine tapte ende van den wiine
dat die stad prosent sal men gheven iii. s. van der amen ende nemmeer
ende altoes van der settinghen van den wiine in des raeds vermoghen.
Dassise van den biere.
Dassise van den biere sal men nemen in dese maniere elc hier
eest wit eest zwart sal gheven xii. d. s. Die bruwen wille binnen
der vriheit van Mechelne wt ghenomen hevere, musene, hoembeke,
leest ende heffene in de weke men halve assise gheven sal van den
biere ende en mach en gheen biere bruwen noch vercoepen hoegh dan
wiet dierre vercochte, verborde xl. s. alsoe dicke alse hiis beproeft
worden. Ende men sal tbier om den core gheven ende des briders
ketel daer dat bier in ghebruwen ware. Dat ment hoegher
vercochte dan om tfoer. Dien sal de scouthete ende de voeght doresteken
ochte doen doresteken met enen boeme in den bodem weder datter
bier in es ochte en es ende en woudens de scouthete ochte de voeght
niet doen, soe selen die commoenge meesters met den rade van
der stad ghemeinlike gaen tote dien ketele ende daer in een
gat steken in den bodem gheliic dat daer vore gheseght es
van den scouthete ende van den voghet.
Item wat manne die bruwen willen sal hebben ene mese
cupe die wit sal siin vii. voete in den bodem ende iiii. voet hoeghe
wies cupe meerre ware, hi verborde iii. lb. Ende men soude
die cupe verbernen op de marct. Item wie bruwen wille die
en gheen briedere en es sal vate hebben vast ende vloere
in siins selfs huus ende mach enen cnape hueren die hem bruut.
Item wat manne dat briedere es van arde ende enghene
vate en heeft, die mach bruwen ware hiit ghecrighen mach
ende dat moet hi selve bruwen metter hant ende vercoepen in
siins selfs huus te enen tappe, item engheen man en
mach halve vate ochte tfierendeel van vaten ieghen briedere
coepen omme sach daer in te hebbene. Item engheen briedere
en mach hebben rennekerel bier  in te renne, wie dat dade ende
beproeft worde ter wareheit verborde iii. lb. alsoe dicke alse
hiit dade. Item elc briedere die niet wel ter venten en woent
mach hueren en een huus daer hi wille ende daer siin bier ver-
coepen tenen tappe ende niewer int el.
Dassise van den mede.
Dassise van den mede sal men nemen in dese maniere wat
mede dat men van buten brinct ende hier binnen vercoept 
te tappe, daer af sal men nemen xii. s. van der amen, wie zeem
blant binnen der vriheit van Mechelne ochte orlort hi sal
gheven van der amen zeems iii. lb. hovech, diet blandt die sal
gheven van der amen xlv. s. wat portre die zeem ochte hovech vercoept
binnen der briheit sal gheven vander amen iii. s. ix. d. wat vremder
manne die zeem ochte hovech hier binnen brenght ende diet afleeght
ende coepliic sal gheven gheliic enen portre ende vercoept hiit op sine
sine kerre ochte int scep in groet soe en gheeft hi en ghene assise wie
mede met gheheelen vaten vercoept sal gheven van der amen iii. s.
Die tonser conmmoengien toe behoert ende en mach mede waer dat
si gheblandt es niet dierre vercoepen dan ome
wie beproeft mochte worden dat hine dierre vercochte, verborde
iii. lb. alsoe dicke alse hiis mochte beproeft worden ende men soude
den mede op de merct trecken ende omme tfoer gheven.
Dassise van den ale ende van den witten biere.
Dassise van den ale ende vanden witten biere sal men nemen in dese manieren,
Wie ael vercoepen wille binnen der vriheit van Mechelne sal gheve van elker
ghelten te tappe ii. s. Ende van ommelandschen biere zuutvenschen biere
hoemborcschen biere breemschen biere ende van biere dat van dien ieghenoden
comt van elker ghelten te tappe ii. d. ende vander amen in groet ii. s.
ende men en mach en gheenen ael waer hi ghebruwen es noch ommelandsche
bier zuutvensch bier hoemborchs bier breems bier noch bier dat van
dien ieghenoden comt vercoepen boven.
Noch gheen ander witbier waer dat ghebruwen es boven
ende van alrehande vremden wittenbiere dat te ghelte ghilt sal men
gheven te tappe
ende van der amen in groet. s. 
Wie ael vercoept ochte wit bier dierre vercochte l verborde xl. s. assoe
in enech werven alse hiis beproeft mochte worden ende men soude den
ael ende dwitte bier dat men boven tfoer vercochte op de merct trecken
ende omme den core gheven.
Dassise van den ale ende van den witten biere
Dassise van den ale ende van den witten biere sal men nemen in dese
maniere, wie ael vercoepen wille binnen der vriheit van Mechelne sal
gheven van elker ghelten te tappe ii. d. ende van der amen in groet ii. s.
Item van alrehanden vremden witten biere ii. d. van elker ghelten te
tappe ende van der amen in groet ii. s. ende men mach alrehande vremden
ael ende alrehande vremde witbier dit iaer vercoepen maer ael die binnen
der vriheit van Mechelne ghebruwen es sal men gheven omme
de ghelte, wie ael die binnen der vriheit ghebruwen es ware dierre
vercochte, verborde xl. s. alsoe menech werven alse hiis beproeft mochte
worden ende men soude dien ael op de marct trecken ende omme tfoer gheven.
Dassise vander wollen.