Blader door transcripties » Stadsarchief Mechelen

archieftoegang 2, inventarisnummer 534, pagina 49

Alse men coept ene wiertele rogs om xii. s. dan sal weghen i. rugghen
d. broet ii. iii. marc ende iii. o. inghelsche.
Dit es de ordinantie van den assisen hoe mense verpachten zal.
Wie assise heeft ghenomen binnen Mechelen daer toe es verborden sine have
sine erve ende al siin goet die assise mede te ghildene ende dat goeten mach hi niet
vercoepen, vervremden noch verhandelen in eneghere manieren dat der stad in omstaden
comen mach de stad en sal hore assise vergouden hebben daer omme verhoede
hem yeghelike mensche van goede te coepene dat hi niet ghescaedten si.
Wie assisen nemt, moetse houden op alrehande avonture anx ende vrese
eest van rampeeste, van plaghen ochte van orlogho in wat manieren dat roerende
 comt. Eest van der stad weghen ochte van eneghen heren weghen sonder der
stad eneghen last ane te draghene ende ghulden te vier paymente
dierste vierendeel xiiii. nachte vore kerst, dandre xiiii. nachte vore
paesschen terde xiiii. nachte vore slausmisse, tfierendel xiiii. nachte
vore sbaeffmisse. Ende dassiseren zelen nemen ende ghelden elc payment
in paymente den grote vore cor te xxi. daghe ochte de werde in andren
goeden paymente wt ghenomen van pont ghelde, daer af selen die
assiseren nemen iii. s. van den ponde alsecs payments alse daer men
tgoet omme vercoept. Maer si selen ghilden der stad alsoe alse vore
gheseeght es. Den groten tvist te xxi. daghe op dat ghulden te horen daghe
ende en gouden si te horen daghe niet ende ghinghe een svaer penhinc,
si soude moeten dien gheven penhinc vore penhinc van alle dien dat
hem ghebrake. Ende en volgonden dassisers niet binnen den xiiii. nachten.
Daer na dat hore payment verstenen ware weder hem ghemaent ware
oche en ware, soe selen de rentmeesters alle dat den assisers ghebrect
te ghildene van elken paymente sonder eneghe verste opdat die assisers
die in ghebreke vonden siin van ghildene moghen wisen ende bestaden
dan ghenen dien de stad sculdich es eest van liiftochte ochte van ander
omisien der scout gheheelleke ende al te betaelne. Ende daer ghenouch te doene
sonder der stad eneghen last ane te draghene ochte de rentmeesters
selen alle dat den assisers ghebrect te gheldene van haren paymente
ontleenen te coste op hen. Ende op hare borghen waer dat si willen eest
buten der stad ochte daer binnen sonder der stad eneghen last ane te
draghene. Ende alle de cost ende alle die scade die der stad quame oidts
ghebrect van ghuldene van den assisers in wat manieren dat ware die
selen si der stad op rechten. Ende ghilden alsoe vrye alst den rentmeesters
kenelecht es metter principael stond sonder enech aneslaen ochte  mindren
van der principael stond. Vort, wie dat assise nemt moetse betalen
met ghereeden ghelde sonder pande ende moet hebben enen borghe
ochte twee die zeker ghenouch siin die en gheen ghesellen van der
assisen en siin. Ende moetse noemen op den iersten avont, dat hi
die assise nemt den rentmeesters eer hi van den huse mach gaen ende
des versie hem yegheliic dat hiis niet gheblameert en si.
Wie van brughe ende van den damme van der sluus ende van antwerpen
onse heerscap ende deghene die binnen der stad van Mechelne woenachtich
siin. Die tote hare en ghene assise ghegheven en hebben selen voortane
quite siin van alrande assisen het en ware dat si wiin ochte ander goet
vercochten te rappe met ghelten ochte mat hanscalen, soe souden si assisen
daer gheven af gheliic onsen portren.
Item alrehande vremde liede zelen hebben horen iersten toen dach
van alrehanden goede vercoepen siit. Daer na selen si assise gheven
gheliic onsen portren wt ghenomen diere voren ute ghesteeden
siin. Ende quite dat men ieghen vremde liede coept te tene.
Vort, sone mach niement die samecoepe nemt ochte nemen doet coe-
man siin van gheliken goede daer hi zamecoep ane nemt ochte nemen
doet.
Rechtere, commoengie meesters, scepenen, dekene ende rentmeesters
en moghen voortane enghene assise nemen noch gheselle ane siin assise
wie dat doet verbort dat hi nemmermeer in der stad dienst en mach comen.
Wie toenen woude dat hem onrecht ghescide van enegher assisen
sal toenen siin ghebrect den ghemeinen rade op der scepen huus ende wat
de ghemeine raed daer af over een dreght daer mede, sal hi hem moeten
laten ghenoeghen.
Item soe wen dat assisen bliift hi moetse verborghen den rentmeesters binnen
derden daghe daer na soe dat der stad ghenouch siir wie dat niet en
dade men saels gripen van der stad weghen ane siin goet ende hem
selven in hachten doen ende houden tote dies maels dat hi der stad
ghenouch heeft ghedaen.
Item alt verdieren sal men gheven ten halven iare.
Item alle assisen gaen in des naests daghes der xi. magheden daghe
ende die selve assisen selen weder wtgaen op der xi. magheden dach
naest volghende.
Item dassise te verpachtene en moghen nemmermeer dan vi. ghesellen siin
een meesten ende nemen assisen alsoe vele al si willen ende so verborghen moghen
waerre enech meer ende ment binnen den iare gheproefven mochte ter
wareheit elc van allen dien ghesellen verborde c. lb. ter stad behoef wt
ghenomen dat elc ambacht sine assise verpachten mach te siins ambachts
behoef.
Alssie van den wiine sal men nemen in dese manieren men sal wiin
vercoepen dit iaer durende nawerde wie wiin te tappe vercoept binnen
der vriheit van Mechelne sal gheven van elker ghelten vi. s. Item wie
tonser commoengien behoert die wiin vercoept in groten sal gheven van
der amen iii. s. Item wie vremder binnen der vriheit van mechelne
wiin brenght ochte brenghen doet sonder coepliken mach hine weder-
henen voeren sonder assisen maer coeplict hine hi sal assise gheven
gheliic onsen portren. Item wat lansheren ochte wat landsvrouwen