Blader door transcripties » Stadsarchief Mechelen

archieftoegang 2, inventarisnummer 534, pagina 4

Wat portere op enen vremden man commoengie roept sonder noet
hi verbort x. lb. Ofte portere op portere hi verbort oech x.
lb. Of vremt man op enen portere, of vremt man op enen vremden
man hi verbort xv. lb.
Wie aldus commoengie roept, wort iemen overmids siin roepen
verminct meer of min soe verbort hi die commoengie roept
die boete die op die mincke gheordineert ende beschreven es. Ende
den ghenen te beteren sine mincke die de mincke ontfeet. Wort
daer iemen omme doot gheslaghen soe verbort die ghene die aldus
commoengie roept tonrechte dliif.
Vort, siin die commoengie meestre schuldech die porten te versiene
bi nachte ende bi daghe dat die verhuet siin alsoe alse geordineert
es biden rade vander stad.
Vort, siin die commoengie meestere sculdich iegheliken die tonser
commoengien behort ende daer siis af versocht werden te helpene
tsinen rechte binnen onser vriheit daer hem rechts ghebrake of
daer menne verontrechten woude.
Vort, siin die commoengie meestere sculdech te versiene ende doen te
houdene de coren alse dat niemen uter stad en vare noch en ga sonder
der commoengie meestere orlof. Ende van hoerdoemen ende van quaden eeden,
ende van dobbelinghen ende van alrande drancke. Ende hier mede selen si
heffen van alrande boeten die daer af verscinen der stad terdendeel
wt ghenomen den boeten vanden quaden eeden want dat heeffen selen
die ghene diet vort bringhen.
Vort, waer die rechtre helpe versouct ane die commoengie meestre recht
doen te ghesciene ane iemen van boeten van mincken oc van lieve soe siin
hem sculdich die commoengie meestere te helpene met hare macht dat recht
te volbringhene.
Vort, wat vremder manne porter worden wille te Mechelen moet
iaer ende dach binnen Mechelen woenen onghecalengiert eer menne ontsaen
mach, ende comt hi daer na met sinen gheburen ende sine over goet kennen,
ende hi dan portrechts beghert soe es menne sculdiich tontfane, ende vort over
portre te houdene op dat hi c. s. wert lovensche erfs heeft binnen der
vriheit van der stad van Mechelen of borghe setten willen, ende mach alsoe
vele erfs binnen der vorghenoemder vriheit binnen den iare te copene.
Ende wat portre wt Mechelen vaert wonen met sinen huusrade ende mettien
datter toe behort soe verbort hi vorvoets siin portrecht ende wort vremt
man. Ende comt hi weder binnen der stad woenen soe moet hi een
iaer daer naer antwerden van allen stucken dies men hem ane
sprect alse een vremt man, ende alse een vremt man sijn portrecht
ghecrighen sal hi portre worden.