Blader door transcripties » Stadsarchief Mechelen

archieftoegang 2, inventarisnummer 534, pagina 43

Wie stucken maken wille te Mechelen hi moetse maken indeser manie-
ren van breiden elke varwe bi hem na dien core van den lakene elc
na sine varwe beide in sterne ende in breidden op die ramen waer
ment te neder vonde op ghetouwe verborde elc twist x. s. Ende
en hadt sine breidde niet op die ramen niet gheliic dien dlakene,
dats te wetene van elken stile ii. s. sonder die hoeft stile ten beiden ende.
Vort, soe wie langhe te Mechelen ghewoent heeft, dat hi wolle-
werc maken mochte, hadde hi goets ghenouch hi mach maken
stucken wit of blaeu ochte ghemingt van ii. wollen wat stucken
dat hi anders maecte die de mach niet en heeft wollewerc te makene,
hi verbort die stucken.
Vort, en sal ghene beghine die int beghinenhoef woent laken
moghen maken noch stucken sonder allene een graeu stucke te clederen
ende dat salsi tiersten moeten sueken ane die deekene van den wolle
werke waer dat ment vonde dat ware verbort.
Vort, dat gheen wolleslaghere lakene noch stucken maken en
mach die wolle scudt om loen ende al ware hi sambachts ane ghestaen
ende hi wollewerc maken woude hine mochte hem selven niet
scudden, waer ment vonde ter waerheit al dwollewerc dat hi handen
hadde ochte yeman van sinen weghen. Dat ware verbort waert
in wolle waert in gaerne waert in lakene waert in stucken.
Ierst warven dat men een cort laken ghemingt mach setten opt
ghetouwe xiii. vierendeel breet metter liisten ende niet breder ende
corte blaeuwe ende witte xiiii. vierendeel metten liisten. Ende niet bredere
wat lakene dat men brede vonde opt ghetouwe soude verboren van
elken twiiste xxx. s. ende van den halven twiiste xv. s. Ende waer dat men
corte ghemingde breeder vonde gheset opt ghetouwe dan xiii. vierendeel
breedt metter liisten. Daer soude die deeken vorvoets gaen met ii. gheswor-
nen ende souden dat dat si te breedt vonden opt ghetrouwe af sniden
van den lakene dore gaens in ieghewordicheiden der ghesworne
ende nemen oet die boete van te breed te settene ende dat laken en soude
nemmermeer moghen vergadert worden, wiet vergaderde ofte dade doen,
dat laken ware verbort ochte xx. s. grote vore dlaken.
Vort, soe mach men lakene scouden met sonen borne sonder iet anders
daer toe te doene ende die lakene die men meedt sal men wale toe
meeden in den draet. Ende waer mense niet wale toe ghemeedt en
vonde in den draet, die soude men bringhen vore die deekene ende
ghesworne ende die sal men verbetren ende en mochte mense niet
verbetren soe soude men dat lake ochte die lakene sniden in iii.
stucken. Ende elc stucke soude verboren xx. s. ende die stucken sal
men nemmermeer vergadren. Ende wiese vergaderde dlaken ochte
die lakene ochte xx. s. grote vore elc laken ende wie ten stondene
anders dade dan stove water, hi verborde dat dlaken ochte die
lakene ende die varwer siin ambacht teuweliken daghen.
Vort, selen die deekene ene warven fsiaers omme gaen telx meesters
huus vanden volders ende selen telken meestre ende telker meesterssen
van den vollerssen doen sveren dat si en gheen laken selen laten gaen
wt haren huuse hen siin wale ghevolt tslakens profite.
Vort, sal men alle lakene wale wollen te haren profite ende waer die
ende waerderes vinden enich laken op die ramen niet wale ghevolt
te sinen profite, dat en selen die waerderes niet slaen maer selent
doen verbetren. Ende waert dat den ghenen dies dlaken ware dochte
dat dlaken wale ware ghevolt soe sal ment bringhen vore die deekene
ende vore de ghesworne ende wordet dan beproeft qualiic ghevolt
bi den ghesworne soe sal dat laken verboren x. s. nochtan en sal men
dat dlaken niet slaen. Ende si weder verbetert behoudelike dien
poente die ghemaect siin opt wollewerc gheliic dat si in bouc staen
Ende wat waerderen enich laken sloughen dat seghelens niiet
weert en ware na dien poente vore screven soude verboren sinen
dienst ende nemmer meer in dienste te comene.
Vort, wat vremder coemanne die borght op die halle en sal niet
langhere moghen borghen dan ene maent maer min op dat hi wille
ende wat vercoepere men niet en betaelde ochte ghenouch en dade
in den wissel die daer toe gheordineert es, des naest daghes na die
maent ochte min op dat die borch corter ware ende dat niet en claghede
of en toende den deeken soude verboren. Beide die vercoepere ende
die weerdt, die selve boete ghelic dat men betalen moet van
lakenen die men vercoept om ghereet ghelt alsoe dicke alst boven
bescreven es.