Blader door transcripties » Stadsarchief Mechelen

archieftoegang 2, inventarisnummer 534, pagina 42

Vort, soe hebben die ghesworne macht te wisene te berne metten
wolle ysere yeghewelken op sine kinnebacke daer men mesdaet
van dienste in vint die niet soe groet en es dat si liif of leet verbort
hebben ende dan moet die ghene die gheverret es die vrieheit
van mechelen riimen bi dagts lichte tenweliken daghen die
manne op die galghe die wine op ten putte ende dit salmen
scriven int panpier die de scepenen hebben.
Vort, wanneer dat men onder wollewerc of iet dat ten wolle-
werke toe behoert soe grote mesdaet vint dat ten ghenen sal gaen
ane siin liif of let ende daer ment vint soe siin die ghesworne
sculdich van hen te doene yeghelike met sinen fayte ende dan sal
de deeken met wiisdoeme der ghesworne in hare ieghen wordichede
dien leveren vore scepenen den scoutheten recht te doene over
al sulke mesdaet alse men onder yegheliken vonden heeft met haren feyte.
Vort, soe wie dat ghedaget es vore den deeken moet comen
tsinen iersten daghe rechts te pleghene ende en dade hiis niet hi
bleve vervolght hi ende toende noetsake die hem met rechte sculdich
ware stade te doene.
Vort, wie achter bliift siere claghen vore den deeken verbort iii. s.
Vort, wie die ghesworne weder seide hare vonnesse verbort van
elken ghesworne iii. s. ende den deeken alsoe vele alse alden gheswornen.
Vort, soe selen de deekene rechters siin ende die ghesworne wisers
van alrande comenscap die den wollewerke toe behoert dats te verstane
comenscap van wollen ende van lakenen ende van alrande goede
dat den wollewerke toe behoeren mach op dat ment den deeken
claght dat die dach ghevalt dat gheborght was.
Vort, van alrehande ghebreke die ghevallen moghen aent wolle
werc ende niet claer hier in ghescreven en siin soe sal men volghen den
gheliicsten poenten die hier vore bescreven staen. Ende en connen
siit niet hier mede verclaren soe moeten siit wisen op hare veest na
swollwercs orbere.
Vort, moghen die ghesworne hare hoet versoeken alsi willen ende
siis te doene hebben ane die scepenen van Mechelen die hare hoet
siin ende daer moetse die deekene leiden.
Vort, soe waer den deeken macht ghebrake van dat hem de ghesworne
ghewiist hebben dat moet die scouthete doen ghescien vand heren weghen.
Vort, soe hebben die dekene macht te verlatene te gheven boeten
daer si willen onghecalengiert van iemanne eer si ghereekent hebben
ende alse si gherekent hebben soe heffen die scouthete ende tie voghet
half die voeten van der heren weghen ende die deekene selen heffen
dander helft.
Vort, sal die deeken versien alle die ellen ende die reepe daer men
mede met alsoe dicke alse si willen ende si wanen dats te doene
es ende waer dat mense ongherecht vonde, verborde elc daer
mense ondervonde iii. lb. alsoe dicke alse ment vonde ende elc
reep moet siin ix. ellen lanc no min no meer ende gheseghelt op beiden
ende metter deeken zeghele. Daer men die stucken mede beseghelt wie
met enen ongheseghelden reepe laken streke verborde van elken lakene xx. s.
Vort, soe heeft de deeken mach te die ghesworne te leidene over
al daers te doene es swollewercs recht te behoudene ende mach vernemen
ende doen sweren die hi wille om recht van den wollewerke te doene.
Vort, soe sal die commoengie meester metten scepenen ende die deekene
metten gheswornen van den wollewerke ende mettien siere toe
nemen ter waghen tghewichte te besiene.
Vort, soe moeten die ghesworne alse die deeken dingt comen op
der scepenen huus te grote clottide te prochiaen messen of ter
eer wies niet en dade verborde xx. s. ende welc van den deekenen
niet en quame te dien tide ofte eer soe verborde hi vi. s. hi en toende
of dade toenen noetsake ende elc ghesworne sal hebben xii. s.
telken dinghe daghe alse hiit ten tide comt.
Vort, soe hebben die deekene mach alse man een man van buten
comt ende lakene brinct die gheweven siin ende te Mechelen wonen
wille. Dat hi mach orlof gheven die lakene te volne ende te ghe-
reidene alse vremde lakene ende in die vremde vonde te legghene
alse mense legghen soude daer si gheweven waren ende ongheselt,
te vercoepene alse vremde lakene ende hi moet doen met ghetughe
van den gheswornen. Ende wiet anders dade verborde van elken
lakene c. s. al en seghelt de hiit niet noch en vonde na die 
Mechelsche vonde. Ende es te verstane van al selken lakene alse men
te Mechelen maken mach.
Vort, wie vremt es ende te Mechelen comt te woenene hi en mach
op dierste iaer ghene lakene maken ende mach. Dan wit ende blaeu
ende alse hi hier iaer ende dacht ghewoent heeft wille hi andre lakene
maken soe moet hi portre worden ende dan mach hi maken gheliic
portren wt genomen den ghenen die van over berc siin want die
en moghen ghene lakene maken wie anders sins dade, verborde die
lakene die hi maecte.