Blader door transcripties » Stadsarchief Mechelen

archieftoegang 2, inventarisnummer 534, pagina 41

Vort, alle die warpte die men sceert ghesmoute ende onghesmoute te gadre
daer sal men dlaken afsniden in drien stucken ende dmiddelste, stucke es verbort
ende xx. s. Ende van wevele dies ghelike ende die warpte sal oec ver-
bort siin alce male daer si aldus ghesceert es ende niet gheweven.
Vort, waer dat men vint ene warpte beter op den enen egghe dan op
den andren daer af sal men dlaken sniden in drien ende dmiddelste,
stucke es verbort ende xx. s. Ende die warpte es alte male verbort daer
mense ongheweven vint.
Vort, wat lakene meer ghestriipt es op den enen egghe dan op den
andren dat coechelec es dat sal men sniden in drien stucken ende
dmiddelste stucke es verbort ende xx. s.
Vort, wie dat een laken van desen voregenoemden striipten corte of
corten daden alst van den ramen quame, verborde den selven core die hi
verboren soude ane ene pleyn laken.
Vort, soe wat men pleyn maect ende hoe verre dat pleyn es in enen
pipheleren gheweven dat sal men in drien sniden ende dmiddelste stucke
es verbort ende xx. s. wt ghenomen voederlakene.
Vort, wie dat een laken wt sette met smoute ochte met loghen
alst ghereet es verborde v. s. ende een iaer siin ambach es hi aen
slaghere of ghereidere dat es te verstane dat hi hem niet onder
winden sal noch aenslaens noch ghereidens ende es hi portre of
eneghertieren laken makere soe verbort hi die selve boete ende
siin toenen op dlaken huus dat hi met toenen en mach binnen
diere maent noch nieman van sinen weghen ende dan moet die
deeken doen ghebieden opt dlaken huus waer omme dat hen
hare ambach of toenen verboden es. Ende ware dat sake dat
hem die aenslaghere ofte ghereidere binnen der maent aenslaens
ochte ghereidens onderwonden, verborden si v. s. alsoe dicke
alse siit daden ende hiis beproeft worde.
Vort, waert dat die portre of te de laken makere toende of
toenen dade binnen diere maent, verborde x. s. alsoe dicke alse hiit dade.
Vort, en mach men in dese striipte eneghe side ende cottoen te
gadere weven wie dat dade, verborde dlaken in drien te snidene
En dmiddelste ware verbort ende xx. s.
Vort, eist te verstane wie dat stucken maect striipt binnen mechelen
machse maken in al diere manieren dat men ghele striipte lakene
maken mach binnen mechelen ende waer men ghebrec in den stucken
vonde. Dan int laken biet siin en mach dat stucke soude verboren 
den selven core die ghele striipte verboren souden na die ghelande
van haren lingden ende groete.
Vort, sone en mach niemen roet striipelsaren van wits gevarwet
met houte noch roet striipelsaren van wits ghevarwet met greynen
in een laken te gader ghelegt waer dat men vonde dat soude men
in drien sniden ende dmiddelste stucke ware verbort ende xx. s.
Ende waert een stucke dat men vonde in dier manieren dat soude
men sniden in drien ende dmiddelste ware verbort ende van elker ellen vi. s.
Vort, wie dat den deeken overhoerich ware van dinghen die de
deekene gheboden vore die ghesworne, hi verborde xx. s. alsoe dicke alse
hiit dade.
Vort, sone mach men te mechelen gheen laken ter suede vercoepen
dan alselc alse men te mechelen maken mach ende soe waer dat ment
vonde te vercoepene soe verborde elke elle iii. s.
Vort, wat ghevarweder lakene dat int laken ghevarwet es
ende dat men vercoepen sal ter suede moet ghemaect ende ghevarwet
siin binnen mechelen ende waer ment vonde anders te coepene
ter suede binnen mechelen elke elle verbort iii. s. wt genoemen
ghistelsay ende yersche.
Vort en mach niemen cousen vercoepen te mechelen dan alselc alse
men te mechelen binnen mach maken. Ende wie hier ieghen dade hi
waren verbort.
Vort, soe wie hem bestaet te dienen alsoe verre alit ten wolle
werke toe hoert dien dienst moet hi doen hen dade hem noetsake 
van ziecheiden ende ontghinge hi eer verborde hi xx. s. ende den ghenen
te voldene dien ontgaen es wt genomen wollewevers ende volders.
Vort, wat mesdade dat ghevalt int wollewerc ochte in eneghe
randesake dat den wollewerke toe behoert in soe wat manieren
dat valt soe siin die deekene maenres ende die ghesworne wisers
wt ghenomen dat ane liif of ane leet gaet.