Blader door transcripties » Stadsarchief Mechelen

archieftoegang 2, inventarisnummer 534, pagina 40

Dit es die ordinantie hoe men striipte lakene maken mach binnen Mechelen.
Dat es te verstane van ghesmouter wollen warp wt wevele ghetrocken mach
men maken in alle diere manieren ende van alle diere varwen dat men
mleyn lakene maken mach binnen mechelen ende weder tfelt es pleyn
of ghemingt met greyne of met meden of met houte na dat men
pleyne lakene maken mach te mechelen. Daer mach men in slaen stripel-
garen in die stripte ghevarwet met houte of met greynen wt ghenomen
dat men daer in niet legghen en mach roet hout van witten ghevarwet
ende greyne van witten ghevarwet dat en mach niet te gader ligghen
in een laken. Ende es te verstane dat dese lakene op die ramen moeten.
staen xli. ellen ende een halve lanc waert dat mense l. corter vonde
dat daer ane verbort ware x. s. ende si moeten staen ix. vierendeel.
breet op die rame. Ende waert dat si tharen ghetughe niet comen
en comien noch en mochten in die breide soe ware daer ane verbort
van elken stilen ii. s. vort ware daer ane enich ghebreech van wiedene
of van onghaefheiden, soe souden si staen te selven rechte dat pleyne
lakene staen.
Vort, soe mach men maken in drie manieren striipte lakene dat
es te verstane op gheleende warpte ende daer op mach men slaen alder-
tieren ghemingt ofte playn dat men te men te Mechelen maken
mach ende dat laken moet hebben i. cruce op den deen ende tuschen
die ii. striipen ende daer mach men op slaen alderhande striipelgaren
gheliic dat men mach op ghesmoute ende dese lakene selen staen
tallen dien rechte ende tallen dien coren dat die ghesmoute lakene
staen wt ghenomen dat si op die ramen een half vierendeelsmaelre
selen staen dan ghesmoute lakene.
Vort, es te verstane dat men dese striipte mach maken tfelt in alle
diere manieren dat men pleyn ghewisselt, ghedobbelsteent getraelget
of ghescaect maken mach binnen Mechelen. Ende mach en gheen garen
striipte te Mechelen maken ware ment vonde waert in lakene of
in stucken het ware verbort ende alle dese striipte moet men legghen
in deen ende van den lakene ende dese sal men seghelen in deende
daert cruce steet.
Vort, alle striipte lakene daer men die striipren af sceert moeten.
ghestoren siin van egge te egge enen wel dlaken al dore die des niet
en dade, verborde van elken lakene xx. s.
Vort, soe moet elc ghecordeert siin van enen egge toeten andren enen
wel dies niet en dade daer men beprovent mochte, verborde van elken
lakene xx. s.