Blader door transcripties » Stadsarchief Mechelen

archieftoegang 2, inventarisnummer 534, pagina 39

stad toe behorde ochte wat wisseleren dies anders cochte, verborde
van elken stucke goms v. s.
Item wat weertde die verborde eneghe van desen boeten voreseit
moet hi bi daghe lichte den deeken ghenouch doen met panden
of met penningghen ende en dade hiis niet soe moet de deeken
naest merts daghes hem te toene verbiden op de halle tote dat
hi ghenouch ghedaen heeft ende wie hem lakene toende na
dien dat hem die deeken verboden hadde op die halle eer hi
ghenouch ghedaen hadde, verborde c. s. alsoe dicke alse hiit dade.
Item wie beproeft worde van desen vorseiden psonen dat
in enegher manieren met fallatien ieghen desen ghebode dade
ochte met enegh liste daer ieghen quame, verbort een iaer siin ambacht.
Item hier toe moeten die deeken hebben enen clerc
ochte meer die strinen ende wachten alle die lakene die men
vercoep op die halle waerbi dat die deeken beproven mach
wiere ieghen doet.
Item wie lakene vercoept op die halle hi moetse alvorvoets
wt sinen pilen doen en henen senden ende laet hise op sinen
piil staen ofte vore hem, hi verbort van elken lakene xx. s.
Vort, doet hi andre lakene halen ende die vore hem comen
eer die vercochte henen siin, hi verbort van elken lakene dat men
brinct xx. s.
Vort, wie lakene vercoept op die halle moetse al vorvoets
doen henen draghen vander hallen ende hem volghen
ochte siin bode ende doense scriven der deekene clerc, wie
dats niet ende dade, verborde van elken lakene xx. s.
Vort, wat weerde of samecoepere lakene coept op die
halle ter vremder liede behouf moet tomen der deekene
clert alse hi van der hallen gheet ende doen hem scriven
den coeman die de lakene ghecocht heeft ende iaghen wien dat si ghecocht
siin. Ende wat si dat si costen wies dats niet en dade verborde c. s.
Het was over een ghedraghen in den ghemeinen raet des maen-
daghes na sente deniis dach in iaer ons heren mccc. ende xxxvi. dat
gheen vremt man van buten binnen mechelen barenteren en mach
gherande goet dat ten wollewerke hoert. Dat hier na volget dats
te wetene lakene wolle greyne meede ende allium, wie dat dade, hi verborde
dat selve goet dat hi barenteerde ende die ghelike verborde die portre
daer hi ieghen barenteerde. Dat selve goet daer hi omme barenteerde.
Item, het was over een ghedraghen van den ghemeinen draperiers
int iaer ons heren mccc. ende xxxix. Dat hem eclc goet cnape die
portre es gheveren mach ane wollewerc wt ghenomen die van richte
gheen wollewerc maken alse die boete in heeft.
Vort, dat gheen man coepen en mach die selve lakene die hi ghereidt
heeft of ane gheslaghen.
Vort, dat gheen man sal coepen lakene die in sinen piil staen.
Vort, sone sal nieman moghen coepen ghehele lakene dan op die halle.
Vort, sone sal niemen piil houden die selve ghene lakene en heeft.
Vort, sone sal niemen lakene vercoepen om hueren dats te verstane
daer hi van den stucken sinen loen heeft, wie hier ieghen van enegher
derre poentten dade ende beproeft worde, hi verborde van elkene x. s.
Vort, dat gheen snidere sal moghen vercoepen gheheele lakene dan
op die halle waer men anders vonde, hi verborde van elken lakene c. s.
Vort, wat weerde of wat zamecoepere die coemanne leide ter perssen
of ten ramen of in drapriers huse om lakene te besiene of te coepene,
verborde x. lb. alsoe dicke alse hiit dade ende die draprier die hem
toende verborde x. lb.