Blader door transcripties » Stadsarchief Mechelen

archieftoegang 2, inventarisnummer 534, pagina 3

Dit es de core brief vander stad van Mechelen
Dat elcs iaers alse die commoenge meesters vernuwet siin, ende haren eet ge-
daen hebben, comen selen die nuwen commoenge meesters, ende alle
die commoenge bruedere elc met sinen conestavele te ere
stad ende op dien dach toe daer toe gheordineert sal siin metten
rade vander stad, ende daer selen commoenge bruedere haren commoen-
ge meester hulden, ende die commoenge meester hem weder trouwe
ende onste mallic anderen te houdene in allen orboren der stad.
Vort, wat die commoenge meester ochte en van hen, enegen commoen-
ge brueder ghebieden op der commoengen recht omme ghemeinen
orbore der stad, wie dat hare ghebot niet en dade verbort, c. s. Ende
yegheliic portere mach conmoengie roepen op vremde liede heeft hiis te
doene sonder verboren. Ende wie commoengie hoerde roepen ende onse comoen-
gie brueder ware, ende quame hi niet te helpen den ghenen die commoengie
riepe hi verbort xx. s. Ende wie dat wt comt aldus te helpen sinen
commoengie brueder mach ane ende met hem bringhen wat wapene
dat hi wille sonder mesdaet, ende moet hem pine te vane ende te houde-
ne den ghenen daer commoengie op gheropen es, sonder dien te quet-
sene op dat die ghene home willen laten vaen ochte op gheven. Ende
en woude die ghene hem niet laten vaen noch op gheven maer hem
piinde te werve met crachte wat onse commoengie bruedere mesgrepen
of mesdaden ane dien weder sine mencten of doot sloughen dies souden
si quite bliven van den here metten rechte ende onghescaedt in allen
maniren.