Blader door transcripties » Stadsarchief Mechelen

archieftoegang 2, inventarisnummer 534, pagina 38

lakene coept ochte vercoept op dat hi recht versouct.
Vort, die gheen recht en versouct soe moet die werd doen betalen binnen
dien derden daghe marct daghe op die boete ende wie eer besloughe
en ware betaelt hier binnen verborde die boede.
Vort, soe wat coemanne die dach onder sprake langher dan iii. marct
daghe wie hem lakene vercoept hi moet tghelt houden an dien selven
coeman. Ende daer en sal siin weerdt niet vore antwoorden ende si dat
sake dat die weerdt ofte ieman van sinen weghen metten coeman gheet
gheet soe sonderre die weert ane ghehouden siin.
Vort, wie beproeft worde dat hi gheselscap hilde met weerde ochte
met samecoepers van lakenen te coepene ochte vercoepene, hi
verbort die lakene ende euwelike wollewerc te makene ende die
weerdt ochte die samecoepere verborde euwelec samecoep te heffene.
Vort, alle die weerde har cnapen ende alle samecoepere die binnen
onser vriheit siin selen alle iare sweren ten heyleghen dat si daer toe
nemmer meer helpen noch raden en selen. Dat enich vremd man
laken en mach maken ochte verwen sal noch doen verwen wt
ghenomen dat elc vremd man wel sal doen maken stoer ten iemene
van onsen porters. Ende dan selen die portre ende die vremde man
moeten comen vore die deekene ende ghesworne van den wollewerke
ende hare vorwerden moeten vertrecken daer eer men die soerten
beghinnen sal te makene. Ende waer si dies niet en daden ochte daer
fallatie in scuulde of ware anders dan siit verstrocken hadden soe
souden die lakene verboert siin.
Vort, en gheen weerd en mach laken coepen noch doen coepen
hine hebbe sine herberghe, verbort na die groetheit van siere herberghen.
Vort, nieman en mach siin ghelt comen manen van wollen op die
halle noch die hem sculdich siin wachten vore die halle om te mane
noch in die huse sitten wachten noch op die strate manen noch waer
men die lakene draghet dien tiit dat die halle open es wiet dade,
verborde xx. s. alsoe dicke alse hiit dade.
Vort, wat vremder coemannen lakene coepen binnen Mechelen,
daer men en ghenen dach af en sprect moeten betaelt siin eer mense
wt Mechelen voert oft hi verbort een iaer op thuus te comene lakene
te coepene ende alle die hem toe behoeren ende quamen siere op of iemen
van haren weghen telken male verborden si x. lb.
Vort, en mach gheen vremt man die te Mechelen leit op die halle
comen met andren vremden coemannen, ende lakene coepen ochte
besien en ware siins selves behouf ende dan moet hi comen met
sinen samecoepere sonder andren vremden coeman met hem te
bringhene wiet dade, verborde x. lb. alsoe dicke alse hiit dade.
Vort, wat weerde of samecoepere binnen Mechelen wisselde ochte
barenteerde ochte ane sochte te barenterne vremder liede greyne
om lakene, wie hier af beproeft worde waert weert of samecoepre,
verborde elc x. lb. ende ii. iaer die halle hem daer in te gheneerne
ochte buten der hallen alsoe verre alst gheriint ten wollewerke.
Item die draperier die aldus barenteerde verborde oec x. lb. ende een
iaer hem te gheneerne avel alder hande wolle werc.
Vort, wat vremder manne binnen Mechelen lakene coept
ochte coepen doet hi ochte siin weerdt moeten betalen ochte doen
scriven siin ghelt den ghenen die de lakene vercoept inden wissel.
Die men hem bewisen sal binnen den drien marcht daghe, wie niet
betaelt en ware ochte bewiist inden wiisel ende dies niet en claghede
ochte en toende den deeken snaests daghes na den marct dach, hi
verborde c. s. Ende die weerd van der herberghen verborde c. s. ende
dat hi binnen xiiii. nachten niet coepen en mach noch van sinen,
niemen van siere herberghen wie daer ieghen dade, verborde een
iaer siin coepen binnen Mechelen. Ende wie hem lakene toende
na dat die deeken op die halle verboden hadde, verborde oec c. s.
Item en mach gheen vremdt man lakene voeren wter stad si en
siin betaelt ochte tghelt ghescreven inden wissel.
Item wat vremder manne lakene coepen wille op borch die coepre
ende vercoepere te gadere moeten ii. ochte meer orconden daer
over nemen ende comen vore die deekene ochte vore haren clerc
die vore die hale sit om dese poente te wachtene van der deekene
weghen ende doe die vorwerde vander coemenscap bescriven,
int boec dat die clerc hout vander deeken weghen.
Item wat draperiere eneghen weerdt ghelt leende ochte onder
siten in enegher manieren beheude, verborde een iaer siin wolle
werc ende die oet meer name verborde een iaer siin ambacht vanden
samecoepe.
Item wat ghelde dat men betaelt van lakenen die op die halle ghecocht
siin, moet betaelt siin den royael vore xvii. grote ochte de weerde
in andren goeden ghelde ende wiese anders name ochte gave die der